Stórflutningarnir miklu eða Stóra flutningsmálið

Þegar kona hefir hlotið áminningu fyrir bloggleti síðastliðinn mánuð er ekki seinna vænna en að taka við sér skrifa nokkrar línur.

Fyrst smotterí um fröken Viðutan:
Fröken Viðutan gleymdi víst að skrifa inn í e-r jólakortanna. Hún skrifaði víst myndatextann fyrir eina vinkonu sína en hvorki nafn né jólakveðju með. Usssumsuss. Henni til afsökunar var hún víst að fram yfir miðnætti við þessi jólakortaskrif, rétt fyrir jól. Þið ykkar sem fenguð jólakveðju í kortið ykkar getið verið upp með ykkur og ánægð.

Fröken Viðutan er alltaf að ,,týna'' nýju leðurhönskunum sínum. Þeir hafa þó blessunarlega alltaf e-n veginn komið í leitirnar aftur. En mikil angist grípur frökenina æði oft er hún áttar sig á því úti í bíl að þeir eru bara ekki á höndunum á henni. Þeir finnast oft í úlpuhettunni, eftir mikið stress.

Fröken Viðutan er oft ansi þreytt og syfjuð þessa dagana. Í síðustu viku fór hún í svörtum kjól í vinnuna. Á hádegi sá hún, sér til mikilllar hrellingar, að hún hafði víst aldrei rennt lásnum upp þann morguninn. Og við blasti skærBLEIKUR brjóstahaldari. Til allrar blessunar er rennilásinn í hliðinni, svo kannski tók enginn eftir þessu hvort eð er!

Fröken viðutan á það til að gleyma því að fá sér að borða í miklu annríki um helgar. Sefur illa þar að auki. Þetta fer jafnan illa saman og úr verður skapvonska og viðkvæmni sem aldrei fyrr.

Og af hverju er svona mikið annríki um helgar? Við komum þá að Stóra flutningsmálinu...

Það hefur staðið til að flytja síðan e-n tíma í haust. Þegar það var útséð með "fyrir jól" var tekið frí milli jóla og nýárs. Þá daga var svo eftir allt ekkert flutt. Hins vegar var unnið að því fram á kvöld að mála, parketleggja/leggja lista inni í kjallaraherbergi í Meðalholti, þar sem geyma á frk. Viðutan þegar hún er sérlega skapstirð. Neeeeeeiiii...

Herbergið verður notað sem vinnustofa fyrir stúdenta og handvinnukonu og er orðið ansi hreint fínt. Við fórum líka í IKEA í þarsíðustu helgi og fjárfestum í tveimur fataskápum, gardínustöngum og efni. Það er búið að umraða í svefnherbergi, henda út gömlum fataskápum og sófa og bora upp hillur. Staðan í Stóra flutningsmálinu er því sú að nú á að flytja búslóð frk. Viðutan næsta laugardag því væntanlegur leigjandi vill komast þar inn um næstu mánaðarmót.

Frk. Viðutan ætlar nú að leggja sæti undir rass og sjá hvort hún geti ekki fundið lausn á Litla sturtuhengjamálinu. Hvert á að fara? Í Egg. Er ekki útsala ennþá þar?

En hvað varð svo um frk. Myndó? Hrökk hún upp af í desember þegar hún sá fram á að ljúka ekki við smákökusort númer þrjú?

Síðast fréttist af henni á Sauðárkróki í afslöppun. Hún tók þó við sér í vikunni sem leið og prjónaði bóndadagsgjöf handa spúsa sínum. Og lauk við aðra flík handa sínum innra manni í gærkvöld. Hún er því ekki alveg dauð.

Jólastress hvað?

1. Við mamma bökuðum vanilluhringi í síðustu viku. Aðeins ein tegund eftir (þ.e. sem ég var sérstaklega búin að kaupa í).

2. Lauk við jólagjafainnkaupin í gær. Samt ekki búin að pakka inn.

3. Skúraði í gær. Jahhh, svona inn á milli draslins.

4. Lifi stúdentalífi í 1 og 1/2 dag og geri e-ð í púff-ritgerðinni. Sum sé í gærkvöld (og fram á nótt) og í dag. Tók þessu meira að segja svo alvarlega að ég borðaði rosa-slísí hamborgara áðan af ónefndu sjoppugrilli með Böðvari og co. Tók þetta með enn meiri stæl og sullaði tvisvar niður á mig frönskum með tómatsósu. Sest nú við á nýjan leik og pikka inn e-t bull í kafla 2.

Er þetta ekki allt að koma?
Hef svo gaman af svona skipulagi og listum. Gerir kaótískt líf ögn bærilegra...

Senn rýf ég 10 kílóa múrinn. Sté á baðvogina í gær. Og ég á meira en tvo mánuði eftir!!! Og enn á eftir að bætast við. Þetta er erfitt upp á að horfa fyrir fyrrum megrunarþráhyggjusjúkling!

Samt fékk ég mér malt og appelsín í gær. Og nammi. Þykist ekki muna hvað vogin sýndi. hahaha...

Jólastressið er að ná tökum á mér eins og öðrum. Og hvað geri ég í því? Nákvæmlega ekki neitt. Jólakortin bíða mín, óáskrifuð. Er heldur ekki enn búin að baka þessa tvær smákökusortir í viðbót. Allt í skít. Gólflistarnir?

Og ritgerðin...

Púff.

Af aulahætti og fyrri hetjudáðum

Um helgina lágum við í makindum seint á laugardagskveldi og horfðum á e-a bíómynd, sem ég get ekki fyrir mitt litla líf munað um hvað snerist. En það er nú heldur ekki aðalatriðið. En í myndinni var sýnt frá útför háttsetts hermanns. Verið var að brjóta saman fána á kistu mannsins þegar ég sé hvernig þeir fara að við verkið og hrópa upp yfir mig: Nei sko, þeir brjóta fánann alveg eins og ég brýt plastpokana! Böðvar skellti upp yfir sig, átti ekki orð yfir bjánaskapnum í mér og spurði mig hvort ég vissi virkilega ekki hvernig fánabrot væri.

Hvernig í fjandanum átti ég að vita það. Ég hef aldrei verið skáti. Og fánastöng var aldrei til á mínu heimili. Ég hef heldur aldrei unnið í Nóatúni, IKEA eða nokkurri annarri verslun þar sem fánar eru dregnir að húni hvern morgun. (Hef reyndar aldrei unnið í verslun en það skiptir ekki höfuðmáli hér.) Ég var hins vegar frekar sár yfir því að gert væri grín að mér (vegna þess að ég á að vita allt). Er þetta annars almenn þekking? Hvernig brjóta skuli saman fána? Eða er þetta e-ð sem allir strákar kunna? Ég lærði aldrei lífsleikni í skóla. Ætli fánabrot sé ekki tekið fyrir þar. Pokabrot kannski líka. Líklega.

Ég eyddi ekki mörgum stundum í nóvembermánuði í að skrifa á bloggið. En þeim mun meiri tími fór í að lesa gamlar færslur. 13. nóvember síðastliðinn stóð ég undir sturtunni, á leið í meðgöngusund, í upphitaðri innilaug. Mér var kalt og hugsaði með hryllingi til þess að nákvæmlega tveimur árum áður hafði ég verið á svamli úti í Skerjafirði á leið á Bessastaði! Jaháá, þá var nú meira um hetjudáðir. Ég myndi sko ekki hafa látið hafa mig út í þess konar ævintýri í ár. Onei. Enda mun meiri frosthörkur þennan mánuðinn en fyrir tveimur árum. Svo efast ég líka stórlega að laumufarþeginn hefði verið nokkuð hrifin af slíku uppátæki. Verandi afkvæmi föður síns (sem er víst ekkert allt of hrifin af of köldu eða of heitu vatni). Samt var gaman að rifja þetta upp. Ég þarf greinilega að vera duglegri að skrifa;-)


Jú, núna man ég eftir kvikmyndinni á laugardagskvöld: Mulholland Falls. Og hún var bara hreint ágæt...

Barnið vex og belgurinn með

Og enn finnst mér ég vera að springa. Og ég er orðin leið á andvökunóttum sökum hósta sem fylgir þessu leiðindakvefi sem ég ætla að því er virðist aldrei að losna við.

Annars hef ég það bara ágætt. Mér tókst samt að hlassast á rassinn í kjallaratröppunum í fyrrakvöld, þrátt fyrir að vera afar varkár. E-n veginn runnu lappirnar undan mér á svellbunka, ég bar hendurnar aftur fyrir mig og tókst að rispa mig vel, og gullúrið mitt líka. Slapp svo bara með auman rass, skrámur og marblett á baki. Og skældi smá. Aðallega af hræðslu. Ég virðist vera farin að skæla yfir ýmsu þessa dagana.

En að öllu skemmtilegri fréttum. Ég eignaðist litla frænku í morgun. Hún er ljósrauðhærð og kann að syngja. Og er Þorsteinsdóttir. Ég er því orðin föðursystir og brosi hringinn. Óskaplega hlakka ég til að sjá litlu fjölskylduna fyrir norðan!

Samviskubit

JGE spurði mig í hádeginu hvernig gengi með listana sem eftir á að setja á eftir parketlögnina. Ég er náttúrulega ekki búin að gera neitt í þeim málum. Og fékk ógurlegt samviskubit er ég var spurð. Dæmalaus leti er þetta!
Mér er ekki við bjargandi...

Prófið um daginn gekk annars vel. Mér gengur hins vegar ekki jafn vel að koma mér í skrifham. Ohh, vildi að þetta væri jafn auðvelt og í vi: i í ritham, Esc úr ritham...

Asskoti getur brjóssviði annars verið hvimleiður kvilli! Sér í lagi þegar hann plagar daglega...

Laumufarþeginn virðist stækka. Og æfir samviskusamlega sprikl og kollhnísa. Kviðurinn gengur stundum í bylgjum. Og mér finnst ég vera að springa!

Próflestur, eina ferðina enn

Sit við, alltof sein að vanda. Fyrirlesturinn fyrir morgundaginn er þó langt kominn.
Ótrúlegt hvað ég er orðin kærulaus varðandi allan undirbúning. Ég gerði ekki rassgat síðustu helgi; samt er ég að fara í síðasta prófið mitt að sinni. Á sama tíma á morgun verð ég búin. Og get kannski haldið haus. Og kannski ekki. Verð ábyggilega líka búin að eignast meira garn. Svona til að halda upp á. Hvers vegna ekki? Sumir nota hvert tækifæri...

Sagan er ekki öll

Sagan af Kaupmannahöfn er ekki alveg öll. Hverfum aftur á flugvöllinn...

Upphaflega ætluðum við fimm saman í ferðina. En sökum anna í vinnu höfðu tvær frestað brottför. Kata ætlaði með eftirmiðdagsfluginu, þennan sama dag. Það stefndi því allt í það að hún færi í loftið á svipuðum tíma og við. En fluginu hennar var líka seinkað, um 1-1 og hálfan tíma. Þá var farið í það að reyna að koma henni í flugið okkar, svo við gætum allar orðið samferða. Það er nú eiginlega skemmtilegra. Svona í hópferð. En allt kom fyrir ekki og starfsmenn flugvallarins sögðu aðra farþega sem áttu pantað tengiflug hafa forgang. Við bitum í það súra epli að skilja við Kötu við útganginn í vélina. Fengum okkur sæti. Og biðum svo. Í dágóðan tíma í þvílíkri mollu inni í vélinni. Hver birtist svo allt í einu á gangi vélarinnar? Kata. Hún hafði talað sig inn í vélina, enda voru enn fjögur sæti laus. Farangurinn hennar var hins veger ekki með, kom með næstu vél. Og hún átti að fá hann daginn eftir. Svo varð hins vegar ekki. Hann kom ekki í hús fyrr en með Berglindi á hádegi á laugardag. Svo allt fór þetta vel að lokum;-)

Ég eyddi sunnudeginum ein á menningarlegum nótum: Fékk mér tesopa og alveg óskaplega góða efteraarskage í elsta konditori í Kaupmannahöfn, La Glace í Skoubostræde 3 (sem Árdís hafði einmitt mælt með; kærar þakkir, Árdís). Svo skundaði ég til baka á Thorvaldsenssafnið, að þessu sinni markvert til að skoða húsakynni safnsins og þá einkum gólfmynstrin. Ég þurfti á smá hressingu að halda eftir safnið, settist inn á kaffihús með appelsínusafa og alveg óskaplega óspennandi ,,brownie''. Skundaði svo aftur niður í bæ og eyddi þeim tíma sem ég átti eftir á erótíska safninu í Köbmagergade. Athyglisvert, en ég verð þó að segja að ég hafði meira gaman af fyrri hluta safnsins.

Við komumst svo áfalla- og tafarlaust alla leið heim til Íslands, allar fimm í sömu vél. Synd að ég skyldi ekki eiga hópmynd til að setja hér inn... Ég fékk annars þær sorgarfréttir í gær að stafræna Sony-myndavélin mín er ónýt. Hún var dæmd úr leik med-det-samme á rafeindaverkstæðinu. Myndflagan ónýt; hún er frekar flókin rafeindatæknilega séð og það tekur því víst ekki að skipta um. Assssskotans. Þriggja ára ending er fremur lélegt, verð ég nú að segja. Litla greyið dettur í fyrra horf af og til, en mjög óvænt og æ sjaldnar. Meðfylgjandi er svo ein artífartí mynd sem átti að verða voða flott:

Hva, sjáiði ekki hver þetta er? Ég, kanallinn og Thorvaldsenssafnið í baksýn. Þessi er hins vegar nokkurn veginn í fókus:

Lítið kríli sem sneri sér lengi vel undan á miðvikudaginn var og vildi lítt sýna sínar betri hliðar. Eftir pot ljósmóðurinnar ákvað það þó að líta aðeins við, til að fá svo e-n svefnfrið. Allt virtist annars vera í stakasta lagi:-) og ég sveif um á dúnmjúku, bleiku skýi það sem eftir lifði dags...

Biðin langa

Ég lá í greinalestri fram á miðvikudag í síðustu viku, og náði að klára síðasta greinaskammtinn áður en ég hélt í vinkvennaferð SNEMMA á fimmtudagsmorgni. Saumaklúbburinn hafði sum sé skipulagt þrítugsafmælisferð til Köben síðastliðið vor og nú var loksins komið að því. Við höfðum verið svo heppnar að fá leigða íbúð í einni af elstu götum bæjarins til þriggja nátta, í Magstræde. Magstræde liggur rétt við einn kanalinn, einmitt þann sem Thorvaldsenssafnið stendur við. Ég var harla kát er ég uppgötvaði það. Þar að auki uppgötvaði ég líka að í tveggja mínutna göngufæri var garnverslun, Sommerfuglen, sem ég eyddi dágóðum tíma í. Ferðalagið varð þó öðruvísi en vonast var til...

Ég vaknaði rétt upp úr fjögur aðfararnótt fimmtudags. Ég hafði vakað yfir lestri fram á nótt í vikunni og var því ekkert voðalega vel upplögð, en átti þó ekki í miklum vandræðum með að drösla mér fram úr. Ég ætlaði nefnilega ekki að missa af rútunni, þeirri fyrstu sem fór þá nóttina, því ég var búin að mæla mér mót við tvær vinkvenna minna í henni. Ég kom í tæka tíð og sat ein, prjónandi í myrkrinu þar til við komum í Hafnarfjörð þar sem Arnþrúður og Ella biðu. Eins og vera ber kíktum við í Fríhöfnina og skoðuðum okkur um í öðrum búðum. Ég hélt hins vegar að mér höndum, ætlaði nefnilega að vera ógurlega sparsöm í þessari ferð. Ég endaði því með að kaupa e-ð smotterí handa Böðvari og útskriftargjöf handa vinkonu; ekkert handa sjálfri mér. Eftir að hafa náð mér í skyr og banana, bland i poka og setið og prjónað var tími til kominn til að fara út í vél. Landgangur nr. 2. Engin röð. Enginn starfsmaður við hliðir. Ellu minnti ekki betur en að vélin hafi verið ,,on time'' þegar við skráðum okkur inn niðri. Furðulegt. Okkur varð litið á skjáinn: Delayed. Ohh, gaman. Við settumst niður, ég fór aftur að prjóna. Eftir smá stund gall við rödd í hátalarakerfinu: ,,Okkur þykir leitt að tilkynna seinkun á flugi...'' Næstu upplýsingar klukkan tíu. Ég tek það fram að upphaflega átti að fljúga kl 07:15. En það er skemmst frá því að segja að við stöllurnar þrjár eyddum öllum deginum á flugvellinum. Allt þar til við stigum út í vél um 15:30. Til þess eins að bíðan nærri klukkustund í viku þar úti. Níu tíma seinkun og heill dagur af fjögurra daga ferðalagi farinn til einskis. Bömmer. Þeir sem mig þekkja vita þó að ég hef ekki getað setið iðjulaus allan þennan tíma. Sem betur fer hafði ég vaðið fyrir neðan mig og var með hin ýmsu handavinnuverkefni til reiðu. Ég náði að klára smekk sem ég var byrjuð á, tók þar næst til við þvottastykki, sem ég náði að ljúka við líka. Þar næst notaði ég afganginn af garninu til að byrja á öðru með nýju mynstri sem mig langaði til að prófa. Í vélinni byrjaði ég svo á handstúkum með perlum. Ég get því ekki neitað því að dagurinn hafi verið ,,pródúktífur''...

Annars er ég voða spennt núna. Á pantað í sónarskoðun upp úr hádegi. Ætli ég fái að sjá hvors kyns laumufarþeginn er? Annars er voða mikið líf og fjör oft niðri í koti hans, mikil spörk og læti, sér í lagi þegar ég leggst út af á kvöldin. Ég get legið stundum saman og fylgst með poti hér og þar á mallanum. Alveg einstaklega furðuleg upplifun. Engu öðru líkt...

Huhh, svo gleymi ég að minnast á Nick Cave! Við fórum sum sé öll saman, fjölskyldan að bera ofurtöffarann augum. Sátum uppi í stúku. Ég var bara frekar ánægð með tónleikana, þótt ég sé reyndar svolítið sammála Hjörleifi með það að það hefði stundum verið skemmtilegra að heyra meiri melódíu frá píanóinu og minna glamur. En Nick tók óskalagið mitt, þótt ég hafi ekki æpt það yfir skrílinn: Rock of Gibraltar. Og gerði það stórvel;-) Ég var reyndar líka að vonast eftir Henry's Dream. En hva, það er víst ekki hægt að fá allt!

Fréttir?

Ég gerði þessi líka reyfarakaup í gær: Eftir að hafa farið marga, marga hringi í Stóra Gólfefnamálinu (eldhúsið mitt, holið, hef hlíft ykkur alveg við öllu því rugli) dreif ég mig í Húsasmiðjuna og keypti mér plastparkett á útsölu. Fyrir valinu varð hvíttaður askur, ef ég man rétt. Nú þarf ég bara að finna tíma til þess að koma þessu á gólfið! Hvar sá tími er, veit ég ekki...

Nú, að öllu skemmtilegri hlutum: Örlitlar fréttir sem hafa kannski ekki borist til allra minna bestu vina:

Ábending 1: Tvö hjörtu slá næstum því í takt; annað bara helmingi hraðar en hitt.
Ábending 2: Langtímaverkefni.
Ábending 3: Fékk smá aðstoð;-)

Af frekari afrekum mínum er annars lítt að frétta. Nema ef vera skyldi að þið hefðuð e-n áhuga á prjónaskap;-) (Tengill til vinstri...)

Viðbrennt uppstúf í massavís og enn fleiri mistök

Það er víst ekki alltaf nóg að láta sig dreyma um hlutina. Ég fór því heim á fimmtudaginn var, setti bjúgun og kartöflurnar í pott og tók til við að gera uppstúf, í fyrsta sinn á minni annars viðburðaríku ævi! Nú, þeim sem til mín þekkja finnst ég yfirleitt vera ansi þolinmóð, einkum er kemur að handavinnudútli. En þegar kemur að eldamennsku... Mér finnst yfirleitt tímasóun að standa yfir pottunum, a.m.k. er það ekki alltaf það skemmtilegasta sem ég geri. Mér tókst sum sé að brenna uppsúfið, heldur betur. Afraksturinn voru tvær fullar skálar af óætri hveitisósu og mjög svo svartar skófir í pottinum. Þar sem Böðvar var ekki kominn enn tók ég fram stálullina og byrjaði upp á nýtt. Það er ekki hægt að hætta á miðri leið...

Nú. Eftir matinn fór ég að huga að því að ljúka skrautritunarverkefninu. Það vantaði aðeins punktinn yfir i-ið, smá skraut neðan við textann, er ég uppgötvaði ,,smá'' mistök. Það vantaði eitt té í ljóðið

Þú sem kveikir ástareld...
í stað
Þú sem kveiktir ástareld...

Smávægileg mistök? Veit ekki. Böðvar fór með mér á rúntinn og við reyndum að finna aðra eins minningarbók. Fórum í þrjár bókabúðir en án árangurs. Var orðin heldur stressuð en ákvað að redda þessu morguninn eftir og mæta klukkan átta í Pennan í Hallarmúla.

Bókin var ekki til þar heldur. Og ég átti að skila af mér þennan sama morgun. Ég rauk heim í ofboði og ákvað að skrifa á karton og líma yfir. Þá uppgötvaði ég önnur mistök, sem ég vildi alls ekki að nokkur sæi: Ég hafði af e-m undarlegum ástæðum skrifað vitlaust millinafn í bókina. Í snarhasti hætti ég við kartonið og tók fram dúkahnífinn. Það var lítið mál að skera fyrstu síðuna snyrtilega úr og með mikilli einbeitni og hæfilegu stressi tókst mér að skrifa allt saman upp á nýtt, áfallalaust.

Ég slapp með skrekkinn.

Og sultaði af miklum móð um helgina. Ég á nú 13 krukkur af dásamlega fallega rauðu rifsberjahlaupi og svolítið af sólberjum fyrir sultu. Eins gott því ég þarf að fóðra heilann vel af sykri fyrir næsta verkefni. Það er nokkuð víst.

Vansvefta

Ég fékk fyrsta skrautritunarverkefnið mitt í gegnum símaskrána í gær. Ég ákvað að klára verkið í gærkvöld og vakti allt of lengi. Ég er því hálfvansvefta í dag (sem oftar). Læt mig nú dreyma um heit kindabjúgu og uppstúf.... Ummmm.

Fýla

Ég tók 2-3 tíma í þrif og þvott heima í gær. Ég er að reyna að stræka á að þvo sameignina þegar öðrum bera að vinna verkið. Ég gafst þó upp í gær og skúraði niður stigann eftir að hafa gert hreint inni hjá mér; en þó ekki jafnvel og venjulega. Og sem verra var, reykingarfnykurinn náði alveg að kæfa skítafýluna á ganginum. Og er ég var komin niður bættist við spíralykt. Þannig að rétt eftir hádegi á sólríkum sunnudegi lyktaði stigagangurinn heima eins og knæpa klukkan þrjú að nóttu til. Þetta er alveg hreint dásamlegt!

Mér tókst að klára að prjóna lopapeysuna á laugardag, ég þvoði hana svo í gær. Ég er harla ánægð, held ég bara. Rennilásinn keypti ég í dag og kannski nenni ég að sauma hann í í kvöld, þegar ég fæ Siggu Sif í heimsókn í prjón og spjall.

Hvað á maður annars að gera við svona lata og óþekka nágranna?

Sneypuför að Langasjó

Á föstudag héldum við Böðvar og Björn austur á bóginn. Förinni var heitið inn í Hólaskjól, þar sem við ætluðum að hitta aðra göngufélaga um kvöldið. Ég vildi nota daginn í skoðunarferð svo við stoppuðum hér og þar, skoðuðum Seljalandsfoss, Gljúfrabúa, Skógarfoss (Björn er sérlega hrifinn af fossum). Kíktum líka í sund í Vík og strákarnir fengu sér þar ,,djúsí'' hamborgara. Hmmm, og ég kannski líka.

Það var súldardrulla allan daginn, og þar eð við höfðum fengið þau skilaboð frá ferðafélögum okkar að þau ætluðu að gista í Landmannalaugum, sáum við þann kost vænstan gista í gamla húsinu á Norðurhjáleigu, í stað þess að keyra í myrkrinu inn í Hólaskjól og tjalda þar í vætunni.

Enn rigndi daginn eftir. Hópurinn lagði af stað hálf-eitt frá suðurenda Langasjávar, norður eftir vatninu. Svo var gengið með stoppum til sex, þegar við tjölduðum þar sem við höfðum gengið h.u.b. 2/3 inn vatninu, eða rúmlega til móts við Fagrafjörð. Og enn rigndi. Skyggni var lítið og Fagrafjörð sáum við aldrei. Menn fóru snemma inn í tjöld sín, og allflestir voru sofnaðir um níu-leytið! Ég sat þó inni í tjaldi og saumaði út til ríflega hálf-tíu. Þá var mér farin að leiðast einveran (Böðvar var búin að ,,durra'' síðan um átta-leytið) og ég kom mér í háttinn. Enn herti rigninguna um nóttina, og heldur hvessti líka. Ég vaknaði öðru hverju við veðrið en svaf að öðru leyti vel á nýrri dýnu og í hlýjum og þurrum pokanum. Morguninn eftir kom þó í ljós að það voru ekki allir jafn þurrir og greyið hann Björn hafði hríðskolfið mest alla nóttina. Enn aðrir voru með raka poka, og enn rigndi svo það var afráðið að snúa við, enda skyggni afar lítið.

Í Hólaskjóli beið okkar skáli og heit sturta, gnægð matar og drykkja og í stuttu máli sagt var etið, drukkið og sungið til hálf-fjögur þá nótt. Menn vöknuðu svo í brakandi blíðu næsta morgun. Enginn minntist þó á að snúa aftur og ganga á Sveinstind!

Björn fékk því aðra og betri útsýnisferð á heimleiðinni, og var bara harla sáttur.

En ég hef aldrei nokkurn tíma þurft að snúa við áður. Einu sinni er allt fyrst, býst ég við. Réttast er að láta skynsemina ráða. Eða eru þetta e-r ellimörk???

Slurp...
Er á öðrum frostpinnanum í dag. Síðan á hádegi. Varð að athuga hvort að sykurlaus ananas hlunkur bragðaðist jafnvel og venjulegur ananas hlunkur.
Svo reyndist vera:-)
Rúmar 14 gráður á Celsíus úti.
Þessi sumarhiti, fer alveg með mann!

Á í dag von á gesti alla leið frá Uppsölum.
Björn Bergman ætlar að gleðja okkur með nærveru sinni og ég dreg hann með í Eyvindargöngu í kringum Langasjó næstu helgi. Vonandi fær hann skaplegt veður, strákurinn.

Alger þögn rofin

Mér brá heldur betur í brún áðan er ég fékk aðvörun frá ,,The Blogg Police'' senda til mín, óforvarendis:

Attention Attention Attention

Message to: "beauty is pain!"

Date: July 21st 2006


WARNING!

This is an automatic blogg reminder, that activates itself after two months of no blogg activity from the reciever of this message .... or what is somtimes called "total silence". Since "total silence" is not at all good for the well-being of our beloved internet, action has to be taken - immediately. By you.

You are therefore and hereby strongly urged to break the silence and take full advantage of the internet.
...

Mér fannst þetta óskaplega fyndið en hrökk í kút og ákvað að gera e-ð í málunum.

Málið var að eftir að ég kom heim frá Uppsölum fannst mér allt falla í sama gamla horfið og óskaplega lítið spennandi gerast. Auk þess myndi ég hitta alla reglulega og fólk væri því lítið að kíkja þessa blessað síðu. Hér vil ég enn fremur minna á að ég hef heldur ekki uppfært prjónabloggið í enn lengri tíma! Svo ég er í vondum málum þar líka. Sem ég er annars að reyna að bæta úr þessa dagana því ég keppist nú við að klára lopapeysu svo ég hafi frá e-u ,,spennandi'' að segja;-) Það mætti því segja að viðburðarríkt líf mælist í fjölda prjónaðra lykkna um þessar mundir.

Áður en ég kvaddi vini í Uppsölum héldum við Stína og Pálmi kveðju-Mojito partý. Viðstaddir reyndu glænýjan grip sem húsfreyjan hafði gefið spúsa sínum í afmælisgjöf:

Mojito-drykkirnir höfðu tilætluð áhrif og jafnvel saklausustu stúlkur úr Hafnarfirði freistuðust til að prófa:


Daginn eftir lögðum við Böðvar af stað til Stokkhólms eftir ausandi þrumuskúr. Við héldum beint til hafnar og í þessa líka glæsilegu ferju sem bar hið sjarmerandi nafn M/S Romantica:



Gamli bærinn í Tallin er afar heillandi og vel þess virði að leggja á sig ferðalag fyrir. Við gengum um götur og torg, kíktum inn í hinar og þessar kirkjur og keyptum handprjónaða vettlinga. Ég varð þó enn kátari er Böðvar fann fyrir mig eintök af "Eistneskir vettlingar I og II" (=prjónauppskriftir) í bókabúðinni. Þvílíkur happafengur!

Böðvar var svo dregin um Gamla Stan í Stokkhólmi er ferjan kom til baka daginn eftir. Svo var fríið á enda og allt féll lífið í fastar skorður heima á ógnarskömmum tíma.

Er sumarið annars loksins komið? Bjórvinir ætla að grilla í dag til að fagna sólarglætunni. Ég ætla að kíkja með lopapeysuna mína og snúsnú bandið. Og reyna að prjóna sem mest svo ég hafið frá e-u merkilegu að segja sem fyrst;-)

Olnæter

Nú stefnir í lítinn svefn. Enn eina ferðina. Í þetta sinn í örvæntingu við að reyna að bjarga prófinu í fyrramálið!

Ojæja. Ég fann varalit, varalitablýant og gloss í veskinu mínu, sem ég gleymdi að nota í gærkvöldi. Er nú með afar vel málaðar og glansandi varir. Ekki verra við lesturinn! Mér tókst líka að ná mér í pízzu áðan, hálftíma fyrir lokun Bláhornsins hér í nágrenninu. Og ég get svo svarið það hun rann fljótt niður. Var ekki alveg buin að gera mér grein fyrir hversu svöng ég var orðin. Ég var nú samt ekki gráðugri en það að ég gaf Stínu tæpa hálfa pizzu. Held að hún sé líka enn að við greinarskrif, er víst með dellu á morgun (della=deadline).

Já, dásamlega stúdentalíf;-)

What's up dog?

Ég brá mér í heimsókn í gærkvöldi og kíkti á Júróvísjón. Jahhh, þvílík vonbrigði! Silvía okkar Nótt komst ekki í hóp hinna útvöldu í gærkvöld! Ég lagði samt mitt af mörkum til að svo yrði! Auðvitað. Þótt ég hafi reyndar verið frekar viss um að svona færi. En, mér til ómældrar ánægju rokkaði Finnland feitt og komst inn, svo og Dressman-liðið frá Lettlandi. Afar svalir;-)

Hér er ekkert sumarveður sem stendur. Skýjað og dumbungslegt, sem er kannski ekki svo slæmt þar sem ég er að fara í próf á mánudaginn næsta. Og ég á eftir að lesa slatta.

30

Er ekki alltaf rétti tíminn fyrir freyðivín og jarðarber með súkkulaði og kókos?
Jú er það ekki?

Bauð upp á slíkt hér upp úr þrjú úti í garði. Hefði bara átt að kaupa tíu flöskur, en ekki þrjár. Það hefði bara verið svo helv... þungt að bera þær hingað úr bænum.
Ætlum út að borða í kvöld á e-n tyrkneskan stað niðri í bæ.

Ég hef ekkert heyrt frá Böðvari. Ætli hann hafi gleymt mér? Ég trúi því ekki!

Eldhús í spariklæðunum

Í dag rignir. Mér sýndust trén rétt vera að taka við sér í vætunni.

Minn elskulegi bróðir gerði mér þann greiða að taka fáeinar myndir um páskana af eldhúsinu mínu. Ég setti þær inn hér.

Ég vildi hafa sem mest hvítt og málaði því veggi hvíta og lakkaði innréttinguna einnig í þeim lit. Svo hafði ég keypt þessar möttu, svörtu flísar fyrir rúmu ári síðan (þær biðu aðeins of lengi undir rúmi...) og ég ætla mér að flísaleggja gólfið, og ganginn líka, með grásvartri, mattri skífu, þ.e.a.s. þegar ég hef ráð á. Í þriðja lagi vildi ég burstað stál (háfurinn, aukahlutir) en til að lokaútkoman yrði ekki allt of kuldaleg ákvað ég að hafa viðarplötu á eldhúsbekknum og velja límónugrænt sem aukalit (fyrir aukahluti). Það er auðvelt að skipta honum út.

Jæja, hvernig líst ykkur svo á?
Til samanburðar getið þið hér séð e-r myndir daginn sem ég tók við íbúðinni: Grænt og gult, sjá myndir 4 og 11-15.

Sveppaþema

Já, lífið á Truffluveginum er bara fínt. Rólegt og gott. Á sunnudgasmorgun fór ég í smá könnunarferð út í Haukadal og skóginn, sem er ekki nema hálfa mínútu frá útidyrunum. Ég rölti um í klukkutíma í sólinni, sá blóm stinga sér upp úr þurrum og enn litlausum sverðinum. Verst að ég gleymdi myndavélinni, hún hefur ekki verið mikið notuð síðan ég kom.

Ég tók eftir því er ég skrapp í búðina um helgina, að strætóstoppistöðin mín ber nafnið Sveppatorgið. Þegar betur var að gáð eru göturnar í kring kenndar við hinar og þessar sveppategundir. Skondið:-)

Gleðilegt sumar

Sumarið kom alls ekki með bros á vör til Uppsala í gær. Ég vaknaði í grenjandi rigningu. Mér fannst það næg ástæða til að láta hjólið eiga sig og taka strætó. Mér fannst það óbærileg tilhugsun að sitja skjálfandi í nokkrar klukkustundir í rennblautum gallabuxum. Svo ekki sé nú minnst á vandræðin sem ég lenti í á heimleið í fyrradag: keðjan fór tvisvar af aftara tannhjólinu. Mér tókst að koma henni aftur upp á en var öll útötuð í olíudrullu.
Rigningin í gærmorgun breyttist svo í slyddu þegar leið á morguninn. Já. Ég gerði mér samt glaðan dag. Rölti niður í bæ og keypti mér nammigott í konditorí Fuglasöngnum. Fór svo í prjónabúðina og keypti mér ennþá meira "nammigott fyrir sálina" þar:-)

Annars er ég búin að vera voða, voða dugleg við að halda mér frá sætindum síðan ég kom hingað. Að páskaegginu undantöldu. Samt virðist vigtin ekki vera mér sérlega hliðholl. Djöfulli er það nú fúlt!#$%%!!#$%)!

Ojæja sólin er þó aftur farin að skína í dag. Ég er líka flutt á Tryffelvägen til Cedrics, kunningja míns svissneska. Og það lítur allt út fyrir að ég geti verið þar þar til ég fer heim. Vúííí. Ég var nefnilega farin að hafa verulega áhyggjur að þurfa vera eins og jójó hingað og þangað þar til ég færi.

Ef flugur lenda á bakinu verða þær algerlega bjarglarlausar! Furðulegt.

Þegar ég er ástfangin verð ég algerlega berskjölduð og stressuð. Ergilegt.

Dagurinn silast áfram. Hvað á ég að hafa í matinn á eftir. Spagettí? Er það ekki bara?

Heyrðu mig. Flugan bjargaði sér víst. Hún er nú aftur farin að suða í glugganum hjá mér. Glugganum sem ég má víst ekki opna.

Hmmm. Nei, ég er reyndar ekki alveg komin með lestraráætlunina á hreint, en ég gerði gott betur og bókaði far til Finnlands til að hitta Siggu Sif 13.-15. maí. Vííí. Ég hlakka til! Það er ódýrara að ferðast til Helsinki með Flyme heldur en að fara með nettilboði á Sauðárkrók (frá Reykjavík, þ.e.a.s). Menn geta vart kallað mig ,,heimska'' eftir þessa Svíþjóðardvöl!

Sólin skín

Já, sólin hamast við að skína, vorið hefur hafið innreið sína til Uppsala, sem og annars staðar, geri ég ráð fyrir. Ég reyni að pína mig til að lesa. Einbeitingin er svona svona, kannski allt í lagi í dag en ég les allt of hægt. Ég er því orðin svolítið (mikið) stressuð og hyggst gera smá lestraráætlun í dag. Hræddust er ég þó um að ég nái ekki að skrifa staf í ritgerðinni. Hmmmm.

Ég tók þá ákvörðun að nota síðustu dagana mína hér úti til að skoða mig um. Ég náði í flugmiða með IE á feykigóðu verði og býð því Böðvarimínum hingað í fjóra daga. Við fljúgum svo heim sama dag, en með sitthvorri vélinni. Svolítið leiðinlegt, en það eru aðeins 40 mínútur á milli flugvélanna. Ég gerði gott betur, og pantaði siglingu fyrir okkur á helmingsafslætti til Tallinar! Við munum því eyða tveimur kvöldum/nóttum á dalli á Eystrasaltinu, og höfum svo tæpan dag til að skoða okkur um í borginni! Ooooo, ég er farin að hlakka til.

Helst þyrfti ég þó að komast líka í heimsókn til Siggu Sifjar í Helsinki. Og plana e-ð sniðugt með mömmu, sem kemur hingað fjögurra daga heimsókn í byrjun maí. Það er því nóg að gera.

Ég sakna samt sumra heima alveg óskaplega...

hey Ya...

My baby dont messaround caus she loves me sooooo auhhhhh


Vorið hefir hafið innreið sína hingað til Úfsala. Snjórinn sem lá hér víst yfir öllu fyrir viku síðan hörfar nú óðum, einstaka skaflar eftir. Sólin vermir Frónbúa á heimaprjónaðri lopapeysu. Ég er búin að fá úthlutaðri þessari líka notalegu skrifstofu, með útsýni yfir afar sænskt og fallegt, gult hús hinum megin götunnar (þarf að ná á mynd fyrir ykkur). Ég hefi líka endurheimt hjólfákinn minn glæsilega, svörtu þrumuna (útheimtir einnig mynd) og mun nú reyna að rata hjólandi heim á eftir. Hér er víst 9 stiga hiti, ótrúlegt en satt! En sveiflast niður fyrir núllið að næturlagi.

Mér sýnist ég vera í þrusukúrs, RR skrifa jöfnur með krulli og dívergens á töfluna í þrjár klukkustundir á dag. Á morgun bætist svo við tveggaj klst dæmatími síðdegis. Ég er þvi vart í afslappelsi hér, a.m.k. ekki á meðan ég næ upp dampinum!

Halló heimur!

Þá er ég komin til Svíþjóðar, nánar tiltekið á Altfiolvägen í Gottsunda. Hér var ágætisveður í gær og síðdegis í dag, léttskýjað og ekki svo kalt (um 2 gráður, svo við höfum nú smáatriðin á hreinu;-) Nú, ég rogaðist með mína 25 kílóa tösku í lestina og svo í troðfullan strætisvagninn. Var uppgefin (en þó aðallega svöng) er ég kom loks inn í íbúð og réðst á goslaust kók (já!) og flögupoka inni í skáp. Ohhhh.
Ég afrekaði þó um síðir að rölta út í Gottsundacenter og kaupa sitthvað ætilegt í ICA: jógúrt, ávaxtasafa, mandarínur, sultu, og alveg hræðilega óspennandi sænska limpu... Það er satt sem Pálmi segir: Svíar kunna ekki að baka brauð.

Í morgun fór ég á alcapóne-bílnum í skólann í fyrsta fyrirlesturinn. Mér tókst að rata, eins og ég ætti heima hérna, líka út á völl að sækja húsráðendur. Ojæja, mér er fátt skemmtilegt ofarlega í huga. Sakna bara strax sumra heima, það er nú bara svo. Ægilegt að verða svona háð sumur fólki;-)

Persónuleiki

Hversu vel þekkið þið mig? Ég apaði eftir Skringsli og setti upp stutt próf sem tekur ekki nema hálfa til eina mínútu. Prófið það!

Sólin vermir harðfennið í mælireitnum. Ég fitjaði upp á enn einni peysunni í gær, og náði að prjóna upp að höndum (þetta er lítil peysa). Ég kíkti líka á bráðskemmtilega tréútskurðarsýningu í Tjarnarsal Ráðhússins, kíkti í bókabúð niðri í bæ og keypti mér bráðgirnilega köku. Ég kíkti líka í bíó og sá þessa líka góðu mynd, The Constant Gardener. Hún fékk mig til að hugsa um þann fjölda manns sem lætur lífið árlega við það að reyna að gera heiminn ögn betri, þar sem siðferðisleg blinda og spilling ráða lofum og lögum. Mynd sem svo sannarlega skilur margt eftir. Ég mæli með henni.

Enn ein peysan

Eitthvað er ég farin að vanrækja þessa síðu. Nú, til að vera kona með konum (sbr. maður með mönnum) er ég búin að koma mér upp prjóna-dagbók, þar sem ég segi frá afrekum mínum í því sviði og handavinnuhugleiðingum hvers konar. En það er ekki þar með sagt að ég geti ekki montað mig hér líka!

Síðustu helgi dvaldi ég í sumarbústað nærri Laugarvatni með Böðvari og allri hans stórfjölskyldu. Veðrið var dásamlegt, stilla og heiðskýrt, og þar af leiðandi svolítið kalt. Ég var búin að gleyma því að til væru svona margar stjörnur! Vá, það er langt síðan ég hefi farið út úr bænum að vetrarlagi á svona stjörnubjörtu kvöldi. Að sjálfsögðu prjónaði ég sem mest ég mátti og náði að klára Fönn, létt-lopapeysuna á Böðvar, á sunndugagskvöld. Hún lítur svona út:


Ég keypti garn í aðra peysu á B. í febrúar, og er rétt byrjuð á bolnum. Af eldhúsinu er það að frétta að JGE hefur eytt dágóðum tíma í að hjálpa mér og er nú búinn að festa upp háfinn, ljós undir efri skápum og færa loftljósið. Það er því bara smotterí eftir og spurning hvort ég fari ekki að henda inn myndum af nýja elhúsinu, og hvernig það var áður!

Kvöldstund við sjónvarpið

Sit og prjóna og horfi á sjónvarpið. Bráðavaktin á dagskrá. Slösuð kona kemur inn og er að fæða barn með miklum ópum og kveinstöfum. Ylfa Rós (5 ára) segir íbyggin: Ég ætla sko aldrei að eignast barna þegar ég verð stór. Ég ætla að verða eins og mamma og vera ekkert að eignast börn.
Ég: Núhhh, en mamma þín á börn, ykkur tvær!
YR: Já, en núna er hún ekkert að eignast börn og ég ætla að verða eins og hún.
Ég: Aha
Þögn
YR: Hvenær ætlar þú að eignast lítið barn?
Ég: Uhhh, ummm, þegar ég finn einhvern sem vill eingast barn með mér.
Stutt þögn.
YR: Af hverju spyrðu ekki bara pabba?

Alveg hreint kostulegt;-)

Flísalögn

Á laugardaginn var kom pabbi og lagði með mér flísar. Hann kemur væntanlega í kvöld og lýkur við verkið. Ég get ekki beðið eftir að þetta klárist. Ég er orðin svoooooo leið á að hafa allt í drasli og skít!

Ég prjóna og prjóna og er nú komin vel á veg með peysuna á Böðvar; bolurinn er ég búin að prjóna upp að höndum og er langt komin með fyrri ermina. Ég byrjaði fyrir 10 dögum. Þótt ég sé í vinnunni núna er ég alltaf að fá nýja og nýja hugmynd að peysum eða útfærslum, litasamsetningum o.s.frv. Hmmmm, það er nokkuð ljóst hvað ég er með á heilanum núna;-)

Fyrsta greinin birt

Í kvöld ætla ég að skála. Fyrir sjálfri mér. Ég er nú búin að fá eintak af Jökulgreininni um skjálftavirkni árið 2004 og þar með búin að fá birta fyrstu ritrýndu greinina sem ég er aðalhöfundur að (hún fékk nú reyndar svona skyndiritrýningu, en hvað með það). Húrra fyrir því!!!

Stelpurnar koma í saumó til mín í kvöld. Ég náði að pússa borðplötuna og olíubera í gær. Eldhúsið er því svona smátt og smátt að taka á sig endanlega mynd. En í kvöld verður kjaftað. Og prjónað.

Ég er vanalega á þönum að gera hitt og þetta meðan ég borða morgunmatinn; til að nýta tíman á meðan ég tygg múslíið. Það er nú eiginlega hollara að setjast niður og gefa sér tíma í að næra sig. Svo ég ákvað að prjóna á meðan ég mataðist. Þá gat ég nefnilega gert tvennt í einu. Og setið kyrr. Sniðugt. Peysan á Böðvar potast sum sé áfram.

Skrautritari óskar eftir verkefnum

Ohhhh. Dásamlegt. Ég fékk þessa stórgóðu hugmynd hvernig ég get fengið sjálfa mig til að lesa fleiri vísindagreinar (á eftir að lesa slatta t.d. fyrir ritgerðina...): Ég prjóna á meðan ég les!!!

Breytingar á eldhúsinu standa enn yfir. Um helgina sótti ég eikarlímtrésplötuna sem ég var búin að panta. Hún var nú ekki gefins! JGE kom í gærkvöld og hjálpaði mér að fella hana inn á sinn stað og skrúfaði fasta. Ég á því eftir að pússa hana fína og olíubera og mun ég hefjast handa við það verk í kvöld. Annars er eldhúsinnréttingin nú þegar tekið stakkaskiptum því ég er búin að hvítlakka hana nær alla. Nokkrar hurðir þurfa eina til tvær umferðir í viðbót. Það hefir birt mikið til. Pabbi kemur á laugardagsmorgun og hjálpar mér við að flísaleggja milli skápanna og við eldavél og vask. Ég er farin að hlakka til. Svei mér þá.

Ég ákvað að taka að mér smá aukastarf sem mér bauðst, og hef hafnað hingað til. Ég kenni nú einum hóp verklega eðlisfræði í Háskólanum á föstudögum, og hef nú þegar kennt tvisvar, tvö skipti eru eftir. Það hefur gengið svona lala, en ég hef bara gaman að þessu. Það er heldur ekki slæmt að fá svolítinn aukaskilding í budduna, þótt það verði varla neitt að ráði. Það munar þó um það. Eftir að ég fékk skrautritunarverkefni frá Veðurstofunni fyrir síðustu áramót, og ágætlega greitt fyrir, hugsaði ég með mér að ég ætti að reyna að koma mér e-ð á framfæri og hafa þetta sem aukabúgrein. Svo nú er ég titluð í símaskrá sem jarðeðlisfræðingur og skrautritari. Mig er einnig að finna í gulu síðunum en hvort ég fæ e-ð að gera út á þetta er annað mál. En það sakar ekki að reyna.

Ég þarf að fara til Uppsala til að taka einn kúrs í viðbót. Auk þess ætla ég að reyna að skrifa RITGERÐINA. Ég verð því væntanlega úti mestallan apríl og maí. Ég er því alvarlega að velta því fyrir mér að leigja út íbúðina í þessa tvo mánuði með húsgögnum og fl. Ef þið vitið um e-n sem hefði áhuga og er snyrtilegur, og ábyrgur (og reykir ekki inni) megið þið gjarna láta vita.

Nútíminn

Ég er komin með dyrasíma;-? Rafvirkinn kom loks síðdegis í gær og hófst handa við að tengja. Það tók dágóðan tíma að draga gömlu vírana úr, þeir voru nánast grónir við leiðslurnar. Strákgreyið var að til hálf-tólf. Ég bauð honum upp á e-a hressingu og hljóp að síðustu niður með glasið með appelsínusafanum því hann gaf sér ekki tíma til að klára. Hann sagðist að sig langraði varla heim, það væri dekrað svo við hann;-) Mér finnst nú lágmark að menn næri sig e-ð...

Ég hélt áfram að stússast í innréttingunni í gær. JGE, sem er nú sem áður hin besta hjálparhella og haukur í horni, kom og náði stálkantinum framan af eldhúsbekknum og gaf mér góð ráð við lýsingu, sem er þar engin. Mamma kom líka og hjálpaði til við að grunna skápahurðir, á meðan ég renndi yfir með lakki á skúffur og vaskskáp. Þetta mjatlast.

Ég gerði svolítið af mér í gær:-} Keypti nokkrar dokkur af léttlopa í peysu. Ég ætla að breyta litunum og er að hugsa að nota tóna í stað eins lits í mynstrið. Hmmmm, skiljiði hvað ég á við? Dökkblágrænan neðst, svo ljósblágrænan og efst ljósgráan. Grunnliturinn er hærusvartur. Æ, veit ekki hvort þetta virkar ætla að gera prufu fyrst. Er annars með varaplan.

Í kvöld fer ég með Dóru vinkonu að kíkja eina á eina nýfædda og færa henni sams konar sokka og dóttir mágkonu minnar fékk (er sum sé búin að gera tvö slík pör). Ég er byrjuð á hjálmhúfu í stíl:

Hamast og ryk í öllum vitum

Og enn pússaði ég og pússaði um helgina. Ég er nú langt komin með vaskborðið og skúffurnar tólf; klára líklega í kvöld. Mamma kom og hjálpaði mér í gær að grunna skápagrindina. Ég byrjaði líka á að grunna skápahurðirnar tíu. Mikið verk eftir.

Ég lauk líka við húfuna gulu handa júníbarninu. Er byrjuð á annari eins í stíl við hosurnar yrjóttu og ætla að gefa barninu hennar mágkonu minnar, í viðbót við hosurnar sem ég afhenti á föstudaginn var. Iða nú í skinninu eftir að komast í að velja lopa í peysu handa Bö. Er með hugmynd í kollinum og þyrfti að bera saman liti. Ég þyrfti að komast upp í Ístex og verða mér úti um litaspjöld...

Unaðsstundir í eldhúsinu?

Nei, ekki alveg. Þótt ég dvelji þar löngum þessa dagana. Ég tók mig nefnilega til síðustu helgi og málaði loks eldhúsið hvítt. Eftir þrjár umferðir á loft og veggi var ég komin í framkvæmda gír og ákvað að pússa aðeins yfir gluggann og lakka. Og taka innréttinguna í gegn líka. Ég tók mér frí frá vinnu í gær og sat við að pússa skúffurnar og grunna. Ég er líka byrjuð á að pússa upp skápahurðirnar. Þetta er ansi mikil vinna og nokkuð ljóst hvað helgin mun fara í;-) Ég keypti flísar fyrir ári síðan (já!!!) og fæ pabba til að hjálpa mér að flísaleggja þegar innréttingin verður orðin klár. Mig dreymir líka um að flísaleggja gólfið hið fyrsta, þar sem línoleum dúkurinn á eldhúsinu er svo skelfilega slitin að hann virðist alltaf vera skítugur. Ég er líka búin að sletta vel af málningu og lakki á hann. Er spennt að klára því á meðan framkvæmdunum stendur er allt í drasli inni í stofu. Ég þoli ekki óreiðu. Ordnung, Danke schön.

Fréttir af hannyrðum. Er nú búin að prjóna tvenna sokka fyrir stúlkurnar tvær sem fæddust í janúar. Í gærkvöld byrjaði ég svo á gulri húfu fyrir júníbarnið. Sum sé, allt á fullu.

Fæðingar á fullu tungli

Matseldin fyrir hátíðarfund í síðustu viku tókst líka bara svona rosalega vel að allir voru hæstánægðir, að ég held. Böðvar hjálpaði mér að skera niður lærin sex í gúllas, kvöldið áður; eða öllu heldur nóttina áður því við vorum að til þrjú! (Byrjuðum reyndar seint). Vorum svo aftur að til þrjú, en að þessu sinni við bjórdrykkju og hangs á Celtic Cross.

Ég var því frekar þreytt morguninn eftir þegar ég var vaknaði við Sms-píp klukkan átta. Druslaðist þó fram úr til að kíkja. Þarna fékk ég gleðifréttir því í skilaboðin voru þau að æskuvinkona mín hafði eignast sitt fyrsta barn fyrr um morguninn, stúlku. Ég skreið svo aftur upp í rúm. Um 10-leytið var ég aftur vakin og í þetta skiptið hringdi sími Böðvars. Hann nennti þó ekki að ansa og snéri sér á hina hliðina. Í hádeginu kom þó í ljós að mamma hans hefði verið að hringja með þær fréttir að systir hans væri loks búin að eiga; stúlku. Þess má geta að á laugardaginn var fullt tungl.

Um kvöldið fór ég í afmæli vinkonu. Fannst ein úr saumaklúbbnum vera orðin svolítið gild. Og hvað haldiði? Ólétt, á að eiga um páskana. Nú, vinkonum mínum færði ég svo þau gleðitíðindi að önnur úr saumó væri líka ólétt, á að eiga í byrjun júní. Ég sit því við á kvöldin og prjóna barnasokka. Eins gott að ég fari að gefa svolítið í, ekki veitir af. Þvílíkt og annað eins.

Hvenær ætli komi að mér?

Prjónamanía

Halló, halló. Still alive and kicking!
Gleðilegt nýtt ár, kæru vinir/lesendur. Ég hef það bara ágætt, mig hrjáir helst óskapleg rit-leti, hef ekki nennt að skrifa hér staf (né í "ritgerð" minni) í mánuð. Skammdegið hefur farið soldið illa í mig þetta árið. Ferðin til San Fran var fín fyrir lundina, en ég hefði helst þurft að halda áfram suður á bógin og vera e-s staðar í sólinni fram yfir áramót. Það er komin svolítil snjóföl hérna núna, svo það hefur birt dulítið til.

Í vinnunni er ég að reyna að kreista út úr mér skýrslu um efni sem ég hef verið að vinna að í desember. Er líka að skipuleggja stórmáltíð fyrir hátíðarfund Bjórvinafélagsins á föstudag. Fer í Fjarðarkaup á morgun og kaupi sex læri sem ég pantaði í dag! Hvað ætli þurfi marga bolla af hrísgrjónum fyrir 30 manns:-?

Er líka haldin prjónamaníu um þessar mundir. Er með hitt og þetta í gangi, var að byrja á peysu fyrir mater, sem mér finnst ekki alltof skemmtilegt að prjóna, keypti því efni í húfu fyrir frænku mína sem ég prjónaði í fyrrakvöld og gærkvöld, en leist ekkert alltof vel á svo ég rakti hana upp. Er hins vegar komin með stórfína hugmynd að jólagjöfum og langar til að hrinda henni strax í framkvæmd. Langar líka að byrja á vesti á sjálfa mig núna strax. Var svo að klára þessa sokka, sem eru á myndinni hér að neðan, og var byrjuð á peysunni við... Sum sé, nóg að gera, en hef lítinn tíma fyrir nokkuð annað en prjónaskap!;-)

San Francisco?
Kom heim á sunnudagsmorgun, snemma
Gott að komast úr skammdeginu í birtuna syðra
Kannski ekkert of hlýtt, en samt...
Stór ráðstefna
Fyrirlesturinn gekk vel
Fór með herbergisfélögum mínum i siglingu undir Golden Gate-brúna og í kringum Alcatraz.
Öngvir skandalar. Öhmmmm, ekki ég a.m.k., kannski aðrir...

Ég fór á æææææðislega tónleika á sunnudagskvöld. Sigur Rós og Amina spiluðu í Laugardagshöllinni. Þau voru nýkomin úr tónleikaferð í Evrópu og greinilega í fínu formi. Sigur Rós heillaði mig upp úr skónum og Amina kom frábærlega á óvart! Ég var einmitt að hugsa í gær að mig langaði eiginlega að sjá tónleikana aftur, og ég er ekkert hissa á að gagnrýnir Moggans hafi gefið tónleikunum 5 stjörnur. Húrra fyrir þeim. Eftir tónleikana fór ég með B og co baksviðs, og svo seint og um síðir í eftirpartý á Kaffibarnum. Þar var allt troðið, ég var ekki í miklu stuði, orðin syfjuð og átti auk þess eftir að baka bollur úr deiginu sem hafði verið að lyfta sér síðan fyrr um kvöldið. Ég fór því fljótt heim. En það var soldið þreytt Sigurlaug sem mætti í vinnuna, heldur seint, á mánudagsmorgni.

Fyrirlesturinn er nú tilbúin. Ég er reyndar alltaf að breyta e-u. Hef gefið mér allt of mikinn tíma í þetta. Æfi mig svo í kvöld og held æfingarfyrirlestur á morgun. Úfff, ég er svooooo stressuð:-( Þrír dagar í brottför.

Ég fór út að dansa í gær. Rölti fyrst yfir á hverfispöbbinn minn, Kaffi Stíg, þar sem B sat með skólafélaga sínum úr landafræðinni. Við Gengum svo niður Laugarveginn þar sem skólafélaginn ákvað að fara heim en ég dró Böðvar á Grand Rokk þar sem við svelgdum í okkur einum stórum Murphy's hvort. Síðan var stefnan tekin á 22 þar sem við hristum skankana fram á rauða nótt. Við komum snemma svo við áttum dansgólfið í dágóðan tíma. Eða svona næstum því, það voru nokkrir aðrir að dansa líka. Það er dásamlega gaman að fylgjst með B dansa, hann er fótafimur með afbrigðum, strákurinn;-)

Ég tók myndir áðan af peysunum tveimur sem ég minntist á í gær. Önnur ermin á brúnu peysunni er nokkuð víðförul, miðað við svona nýja flík, því hún var með í farteskinu í Hornstrandahlaupinu í sumar. Tók svona í nokkrar lykkjur í bátnum á leið inn í Hornvík og á áfangastað í Aðalvík. Ég er ekki alveg nógu ánægð með hana, litavalið er afleitt og ég hefði getað haft svolítið meira fyrir því að finna fallegra mynstur. Ojæja, hún smellpassar þó...

Vegir liggja til allra átta: San Fran og Uppsala

Jæja, ég fæ væntanlega farseðilinn til San Fran á næstu dögum. Ég ætla mér að flytja erindi um sprungukortlagninguna á AGU-ráðstefnunni. Hef verið svo heppin að fá þá styrki sem ég sótti um svo ferðin verður að veruleika. Ég er svolítið spennt. Hlakka reyndar lítið til núna, kvíðinn fyrir erindinu er öllu yfirsterkari. Erindið er ekki tilbúið, en ég held ég eigi nóg af efni og myndum til að púsla saman, svo vandamálið verður aðallega að nálgast það á réttan hátt og hafa það ekki nógu langt því menn eru víst voðalega strangir á tíma þarna úti í Ameríku.

Síðari utanförin verður væntanlega á næsta ári í apríl-maí. Þá verður haldið námskeið úti í Uppsölum sem mig langar að taka svo ég geti vonandi útskrifast e-n tíma. Ég þyrfti kannski að fara að blikka e-a góða vini þarna úti og athuga hvort ég geti legið e-s staðar á gólfinu! Ég efast um að ég komist inn á stúdentagarð svona seint á önninni. Sjáum til...

Ég komst aftur í prjónaham í haust og get nú vart stoppað. Ég lauk loks við renndu lopapeysuna sem ég byrjaði á í sumar. Er líka búin að prjóna eitt par af barnasokkum og gefa gamalli vinkonu, sem eignaðist barn í haust. Hitt sokkaparið er langt á veg komið. Svo er ég búið að prjóna peysu í jólagjöf á lilta vinkonu mína. Systir hennar fær eins peysu, í öðrum lit þó, og ég er að sjálfsögðu byrjuð á henni líka. Það er spurning hvort ég eigi ekki bara að fara að monta mig soldið (eins og fleiri bloggarar) og henda inn myndum:-?

Vélin durrar, borinn urrar

Argghhh. Úti undir glugganum mínum stendur durrandi rafstöð. Það er verið að brjóta niður veggi hérna undir mér niðri í kjallara. Hávaði og læti. Og það sorglega við þetta allt saman er að herbergið þarna niðri sem um ræðir hefur einmitt verið aðsetur bjórvina í þau tíu ár sem félagið hefur starfað. MOBS er sum sé á vergangi.

Hendurnar eru í hálfgerðu dái. Reyndi klifur í fyrsta sinn í gærkvöld. Stóð mig einstaklega illa miðað við alla hina í gönguhópnum; samt er ég með harðsperrur frá fingurgómum upp að olnbogum og það er hálfþreytandi að pikka á tölvuna:-) Mig langar samt að fara og reyna aftur og er sum sé ekki alveg á því að gefast upp strax...

Ég dreif mig á árshátíð jöklarannsóknarfélagsins síðasta laugardagskvöld. Þar var miki stuð á liðinu, og ég held ég hafi dansað til hálf-þrjú. Jafnvel þótt e-ð virðist hafa farið illa í magann á mér og gert mig hálfskrítna. Hmmm. Það skyldi þó ekki hafa verið hvítvínsdreitillinn sem ég drakk á undan matnum. Það fer kannski ekki vel í tóman maga?

...En krúttið mitt ég vil þig, því hugur þinn er svo ofboðslegt flæmi!

Ég sat hér á vakt um helgina, potaði í nokkrar stöðvar og pikkaði skjálfta með Megas í eyrunum. Gluggi skrifstofu minnar veit að mælireitnum, sem er snævi þakinn um þessar mundir. Ég var fegin að komast út upp úr hádegi og hóaði í Böðvar og Berglindi. Skíðin voru sett í bílinn og svo var brunað upp í Skálafell. Við fundum nægan snjó meðfram veginum upp að möstrum. Púluðum áleiðis upp brekkuna og renndum okkur svo niður. Á leiðinni reyndum við Þelamerkurbeygju til hægri. Vinstri beyjan var ekkert æfð í þessari ferð; til þess hefðum við þurft að fara yfir veginn.

Aumingja Böðvar, fær ekkert kjet hjá mér! Ég eldaði grænmetissúpu á föstudagskvöld og bauð vinkonu minni og unnusta hennar í mat. Eftir skíðaferðina á laugardag gerði ég grænmetisböku. Ég var líka búin að skipuleggja matarboð á sunnudagskvöld og gerði fiskisúpu og gúmmulaðisúkkulaðikökur með hindberjasósu. Reyndi að hafa það svona í fínna lagi, því foreldrar Böðvars og mater komu í mat. Held þetta hafi heppnast ágætlega, nema það var fátæklega lítið af fiski í súpunni. Kona verður nú að reyna að sýnast svolítið húsmóðurleg, er það ekki? Slatti af uppvaski bíður mín heima núna. Jei...

Jökulgreinina sendi ég núna áðan fyrir kaffi. Vei. Þetta hefur tekið miklu meiri tíma en mig óraði fyrir. Það tók langstysta tímann að skrifa uppkastið. Það hefur tekið ívið lengri tíma að laga og láta lesa yfir og laga, og láta lesa yfir... Dæs. Var orðin svo niðurbrotin af allri gagnrýninni frá vinnufélaga mínum að mig langaði til að hætta hér med det samme! Langar það soldið enn. Mér þykir það skítt að hafa ekki drifið mig í að skrifa helv... greinina í sumar svo hún kæmist í ,,review''. Það hefði verið öllu skárra.
Þarf helst að koma frá mér tveimur skýrslum í viðbót fyrir mánudag. Það er því nóg að gera. Get ekki kvartað yfir verfefnaskorti.

En út í léttari sálma. Við mamma og Böðvar drifum okkur norður á Sauðárkrók síðustu helgi. Bróðir minn og mágkona voru að kaupa sér sitt fyrsta hús og við hjálpuðum þeim við flutningana. Atið náði hámarki þegar þrír röskir karlmenn, bror, Böðvar og tannlæknir á staðnum, komu Kornelíusi öfugum upp stigann og inn í stofu. Kornelíus er antíkskápur, sem fylgdi núverandi eigendum sínum frá Þýskalandi, allbreiður og illmeðfærilegur í fremur þröngum stiga í húsi sem þessu! Eftir að hafa gert vistlegt í svefherbergjum, eldhúsi og stofu töfraði Böðvar fram hamborgara og svo var djúsað í öllu búsinu sem keypt var fyrir sunnanliðið. Kíkti svo í leikhús er ég kom heim á sunnudagskvöldið. Híbýli vindanna, ágætis stykki, en svona í það langdregnara á köflum.

Hressandi: Mæli með Cleaning Women-Clean up Your Body (af Pulsator)...

Dreymdi í nótt að ég væri að kemba hár mitt. Er svo sem ekki í frásögur færandi nema hvað hárið var orðið svo óskaplega sítt. Það hefur ábyggilega náð mér niður að hnjám. Hmmm. Ég held það sé fyrir e-u fjarska góðu að dreyma sig með svona sítt hár:-o Dreymdi líka að e-r furðulegur drengur að nafni Bjarki Þór Einarsson (þekki í vöku ekki nokkurn með því nafni) gengi eftir mér með grasið í skónum. Ég reyndi að koma mér undan, og var svo voða voða leið yfir því að bara furðufuglar og nötts gaurar, en ekki nokkur með fullu viti, yrðu ástfangnir af mér!!!

Jökulgreinin er enn bara uppkast. Er að útbúa myndirnar í dag.
Ég var annars búin að hugsa upp e-ð svo óskapleg sniðugt til að skrifa hér á síðuna á leið minni í skólann fyrir hádegi. Furðulegt, sú hugsun er bara bókstaflega gufuð upp og ég get ekki fyrir nokkra muni rifjað hana upp!

Tilfinningasemi óhófleg

Það er sá tími mánaðarins. Mér finnst ég vera gangandi vandamálapakki. Tárast af minnst tilefni. Rýk út í fússi frá mínum nánustu út af tittlingaskít og engu. Tárast í vinnunni af tilhugsuninni af því að vera búin að klúðra e-u sem er mér afar dýrmætt. Almáttugur. Ég var ekki svona í langan tíma. Hélt að svona hegðan hyrfi alveg með tilbúnu hormónunum. Verandi laus við þau ætti þetta ekki að gerast. Meika ekki alveg að vera svona sentimental. Held bara líka að ekki nokkur í kringum mig meiki það heldur. Og það er heldur slæmt. Helvítis hormón!

Jökulgreinin er langt frá því að vera tilbúin, en ég gerði uppkast í síðustu viku. Helgin mun því líklega fara í viku. Ég leyfði mér að slugsa síðustu helgi, fór upp í sumarbústað með Bö og systrum. Spilaði Popppunkt fram á nótt, svaf út, prjónaði meðan rigningin lamdi á rúðurnar og skaust út í heita pottinn. Notalegt, allt saman.

Tíminn líður. Sumarið leið hjá án þess að ég næði að gera helming af því sem ég ætlaði mér. Fyrr en varði kom haust, með enn meira stressi, og áður en september er liðinn er farið að vetra hér líka. Mér brá heldur betur í brún er ég var á leið heim frá Danmörku á miðvikudagskvöld og flugstjórinn tilkynnti slydduél og tveggja stiga hita heima!Fyrr um daginn hafði ég strunsað um miðbæ Kaupmannahafnar, á stuttermabol, sveitt og með poka í höndum. Já, ég ákvað að ljúka sumrinu með því að bregða mér í langþráða heimsókn til tveggja vinkvenna í Árósum. Ég fékk þokkalegt verð á fari í september og kíkti á Söndru Sif, vinkonu úr MR, sem var að ljúka læknanámi í janúar, síðastliðinn, og er nú á kandítatsárinu, trúlofuð kærasta sem ég hafði aldrei séð og farin að skipuleggja flutning suður að landamærum Dk og Þýskalands. Gerðu Björk, vinkonu úr HÍ, heimsótti ég líka og saman röltum við allar um bæinn, kíktum á Aros, listasafnið í bænum, alveg geypilega góðan brönsj í latínuhverfinu, fórum í bíltúr til Ebeltoft á nýju drossíunni þeirra Söndru Sifjar og Bjarka, fengum okkur cosmópólítan (ég í 1. skipti!) á voða hipp og kúl bar í Árósum, út að borða á skemmtilegan fjúsjón stað, Le Basilic (en þangað mega matargestir taka með sér vín, því það er ekki selt á staðnum) og síðast en ekki síst var rætt fram og til baka um alls konar stelpustöff og tabú;-) Ég tók svo lest á miðvikudagsmorgun til Kaupmannahafnar og strunsaði (eins og mér er lagið) fram og til baka um Strikið og nágrennið, og bætti náttúrulega aðeins á pinklana! Tók svo kvöldflugið heim í kuldann. B var svo sætur að koma og sækja mig. Hann fékk reyndar nokkra pakka og fullt af knúsi fyrir vikið!


Reyndar hefur B nafn. B er sko ekki Big. B vinnur ekki á Orkustofnun (systir hans er reyndar þar:-o). B er ekki einu sinni jarðeðlisfræðingur! Neibbbs, B heitir Böðvar. Í Böðvar krækti ég (uhh, eða hann í mig) í brúðkaupi æskuvinkonu minnar í maí. Hún laumaði því að mér að maðurinn hefði gaman af að ganga á fjöll og fyrnindi og væri ábyggilegar tilvalinn fyrir mig. Mér fannst þess vegna allt í lagi að gefa mig á tal við hann. Það virðist hafa virkað, því við höfum talað heilmikið saman síðan þá. Erum núna byrjuð í dansi, þeytumst um gólfin í djæf, chacha og vals. Maðurinn er bara þessi líka fíni dansari!


Við skelltum okkur í berjaferð á Snæfellsnesið í lok ágúst. Týndum glás af bláberjum. Og ég sultaði. Á núna heil ósköp af bláberjasultu, krækiberjahlaupi, rifsberja-bláberjasultu, rifsberjahlaupi og sólberjasultu. Þvílíkur dugnaður. Ég vildi að ég væri jafn-dugleg að mála eldhúsið hjá mér. Eða að skrifa ritgerð og greinar.


Sit núna í vinnunni og hlusta á Gotan project, æðislegan tangó-electró disk sem ég heyrði úti hjá Söndru Sif og keypti hið snarasta. Er vonandi komin í ágætis skrifham og ætti að geta drifið Jökul-greinina af í snarhasti fyrir kvöldmat.

Úff. Dagurinn í dag er aðeins bjartari en í gær. Það var eins og ég hefði allar byrðar heims á herðum mér. Fór að hugsa og hugsaði víst aðeins of mikið. Smá fjármálaáhyggjur urðu að ofsapaniki og ég veit ekki hvað. Það er víst dýrt að reka eigin heimili og bíl, ein. Ég er ekki á neinum rokna-launum og verð víst að draga saman seglin. Engin óþarfa fata- eða skókaup. Enginn sófi. Enginn óþarfi. Ég keypti mér þó þvottavél fyrir vaxtabæturnar sem ég fékk um daginn. Er orðin þreytt á að þeytast með þvottinn til mömmu í Hafnarfjörð. Það tekur sinn tíma að setja í vél, bíða, setja í þurrkarann, bíða, brjóta allt rakt saman og hengja svo upp heima, minnst fjögurra tíma ,,prósess'' og e-n veginn varð það alltaf þannig að mamma bauðst til að taka þvott fyrir mig þegar við hittumst og hún þvoði. Mér var farið að finnast það óþægilegt. Finnst ég óþarflega gömul fyrir svoleiðis lagað. Þótt ég taki stundum að mér saumaskap fyrir mater í staðinn Svo, næst þegar ég sé ómótstæðilega skó eða alveg möst bol, sem ég á eftir að gráta yfir að fá ekki... rölti ég mér niður í þvottahús og reyni að hugga mig við að klappa nýju, fínu Electrolúx þvottavélinni MINNI. Ohhh.

Ég fór í tvær göngur nýlega. Ég skipulagði tveggja daga helgargöngu að Langavatni og Hítarvatni í júlí. Við B fórum tvö á bíl bróður hans seint á föstudagskvöldi. Ferðin byrjaði ekki betur en svo að pústið hrundi í heilu lagi undan bílnum í einni brekkunni upp að Langavatni. Þá var ekki um annað að ræða en að bakka bílnum niður brekkuna, ég rölti á undan með pústið, og svo var tjaldað. Leiðin lengdist því um a.m.k.um 5 km þann daginn. Næstu tvo daga var svo gengið í steikjandi hita fram að miðnætti. Gengum okkur upp að hnjám, líkleg um 45 km leið, og komumst að raun um að við vorum í alveg jafn góðu formi og við héldum...

Hornstrandaferðin... bíður betri tíma

Mér var boðið í partý á laugardagskvöld til Mörtu. Hún flutti inn í nýja íbúð í vor og ég hef lengi verið á leiðinni í heimsókn. Kíkti því aðeins inn með B og dreif hann svo niður í bæ að dansa, því mér finnst svo óskaplega langt síðan síðast... Eftir að hafa farið á nokkra misjafna staði (og hálf-dansdauða) enduðum við á 22. Auðvitað. Fyndið hvað við vorum feimin fyrst við að dansa og sleppa fram af okkur beislinu. Og þá aðallega út af hvort öðru. En eftir mikið ,,headbang og slam'' var ég með vöðvabólgu dauðans í herðum og hálsi í gær. Lítið eitt skárri í dag. Þetta tekur á:-o

Sat og reiknaði og reiknaði í gær. Upprifjun á hornafræði fyrir forrit svo ég geti farið að koma draslinu frá mér (skriðvektorar lagðir saman, finna ofanvarp meðalvigurs á bestu sléttu í gegnum skjálftadreif og horn milli vigra o.s.frv.). Reiknaði (með smá hléi þó) til tíu og rölti svo með B eftir Ægissíðunni í kvöldgjólunni og léttum úða. Wunderbar...

Í hita leiksins (=dansins) á laugardag gengur upp að mér ungur maður (sem ég þekki ekki neitt) og segir við mig: Fyrirgefðu, en ég varð að koma og segja þér það, mér finnst þú alveg ofboðslega falleg! -og gekk svo í burtu. Ég varð hlessa, lendi ekki alveg í þessu á hverjum degi, stundi upp: Takk. Gott að fá smá búst fyrir egóið. Mér veitir ekki af. Í búðinni áðan ætlaði ég að næla mér í sætabrauð en gömul kona hafði lagt körfunni sinni fyrir framan og var lengi að næla sér í það sem hún ætlaði að fá. Ég náði mér í poka, var alveg að verða pirruð en ákvað að vera smá þolinmóð og bíða bara. Sú gamla tók sér pistasíuvínabrauð og fór svo að tala um að hún hefði heyrt af þessum brauðum og smakkað, og þau hefðu nú aldeilis verið góð en hún hefði bara alls ekki munað hvað þau hétu, bara e-ð sem byrjaði á Péi og svo frv. Ég bara jánkaði og brosti. Svo hafði hún á orði að það væri nú aldeilis ekki á hverjum degi sem hún fengi svona fallegt bros við svona blaðri, og fannst það nú aldeilis gaman og mér hlýnaði um hjarta og brosti enn breiðar. Hmmmm. Það borgar sig nú aldeilis að vera viðmótsþýð:-)

En einna vænst þótti mér þó að heyra ungan mann segja: ,,Þú ert svo yndisleg...'' Sumir dagar eru bara hreint ekki svo slæmir!

Veðrið er svona lala en ég hjólaði með bros á vör í vinnuna áðan:-)

Hitti stelpurnar á Vegamótum í gærkvöld. Rölti mér svo heim og tók til við að losa stífluna í baðvaskinum. Eftir árángurslítið pot vopnuð gúmmíhönskum fann ég forláta flöskubuska og ýtti honum í gegn upp rörið. Upp frussaðist meiri drulla (út um allan vask) og hárvöndull, hálf-grænn og slímugur. Ooojjjjj. Skrúfaði frá krananum til að hreinsa rörið betur en steingleymdi því að allt var opið í gegn svo nú frussaðist bæði vatn og drulla niðrá gólf! Sumir eru utan við sig. En stíflan er farin lönd og leið.

Í kvöld verður fiskur. Skötuselur og steinbítur í vínberjasósu. Ætla að reyna að heilla ungan mann með jarðaberjunum með kókosflögunum. Ætli það takist? Kannski óþarfi að vera að reyna; held mér hafi þegar tekist það! Held það barasta...

Skötuselurinn varð að lúðu ("Já, það er af því að þú ert svo femínísk, sagði gestur"!!!) og forrétturinn að engu en maturinn heppnaðist vel; súkkulaðikakan varð himneskt, eins og hún átti að vera, og við stóðum öll á blístri. Pjúff. Óhætt að segja að þetta kvöld mun teljast með betri mánudagskvöldum. Ég tók smá kökubita og jarðarber með í göngu í gærkvöld. Eftir óvenjulegan vinnudag úti á Reykjanesi (Jobbi bauð mér með að sækja þrjá mæla á nýja prufustaði og tölvu og græjur upp á Þorbjarnarfell) hjólaði ég heim í einum grænum og stökk svo af stað í gönguferð. Gangað hófst uppi á Hellisheiði og gengið var niður í Reykjadal og áfram niður í Hveragerði. Kvöldsólin braust fram úr skýjunum og geislarinir köstuðu leyndardómsfullri birtu á ummyndað og litríkt bergið. Rómantískt!

Aaaa, ég er að fríka út hérna við tölvuna. Mig langar til að kasta af mér skónum, hlaupa út í gras eða taka sundsprett í sjónum! Fór í göngu með broþar í gær. Við tókum þriggja og hálfs tíma göngu á Geitafell. Fór svo og fékk rosalega góðan mat á Austurlandahraðlestinni með "soldið" sætum vini. Ekki amalegt;-) Það verður meira inverskt í kvöld því ég ætla að bjóða nýgiftum vinum mínum í mat í kvöld. Ég á hvítvínsflösku í skápnum, skötuselurinn klikkar aldrei og svo var búið að panta himneska súkkulaðiköku í eftirrétt. Basillikan i eldhúsglugganum er orðin svo hávaxin að hún fer að falla um sjálfa sig. Keypti því tómata og mozarella til að hafa með í forrétt. Ætli fólkið hafi nokkuð lyst á svo miklum mat í þessum hita?

Tólf stiga hiti úti og stígandi?
Allt of gott veður til að sitja inni. Hjólaði á stuttermabol í vinnuna í morgun. Fór í notalegan labbitúr í fjörunni úti á Nesi í gærkvöld. Sólin var að setjast og það var eins og bál væri bak Gróttu. Öldugjálfur og vorangan. Ummm.

Speki ýmisleg

Óskaplega er hún orðin þunn, þessi síða. Er ekki mál að bæta úr því?

Ösp - Óvissa
04.02-08.02 & 01.05-14.05 & 05.08-13.08

Manneskjan hefur ekki mikla trú á sjálfri sér en er kjarkmikil þegar á reynir. Hún þrífst best í þægilegu umhverfi og þarfnast velvilja frá vinum sínum sérstaklega.

Manneskjan er oft einmana, enda vandfýsin með afbrigðum og býr oft yfir mikilli og djúpstæðri reiði. Hún hefur listræna hæfileika og er góður skipuleggjandi, aðhyllist sérstaka lífsspeki og er mjög traust í hvaða aðstæðum sem er. Manneskjan flanar ekki að neinu þegar náin kynni eru annarsvegar.

Sp: Er þetta ég? Hmmmm. Ekki laust við að ég trúi því.

Áfram hélt ég...

Naut
Ef þú ert ekki ástfangin(n) er vissulega erfitt fyrir þig að stunda gott kynlíf því þú ert oftar en ekki bundin(n) eigin tilfinningum. Þegar öll skynfæri þín eru örvuð í einu ert þú ánægð(ur) og þegar þú æsist væntir þú fullnægingar.

Aha...

Hætti svo að finna sniðugar persónulýsingar og stjörnuspár og snéri mér aftur að Scholz og brittle-plastic transition...

Frábært annars að eiga góða að í vinnunni. Listinn var laus á bílnum. Ég bað um ráð og áður en ég fékk þau var búið að redda málinu. JGE er gull að manni!!!

Um helgina fór ég á Iron Maiden-tribute tónleika á Grand Rokki. Hmmm. Aðeins svona meira dauðarokk en metall. En áhugavert engu að síður. Daginn eptir gekk ég við annan mann á Trölladyngju. Það var brakandi blíða er við lögðum af stað og skálmunum var fljótt rennt af buxunum. Eftir að toppnum var náð var haldið niður hinum megin, niður í lágina milli Trd. og Grænudyngju á afram út á hálsinn. Settumst þar niður í sólinni og nörtuðum í smákökur. Heyrðum allt í einu drunur miklar, og síðan kom hver þruman á fætur annarri. Úfff, það setti að okkur óhug. Höfðum séð svört ský í austri yfir Bláfjöllum en fannst ólíklegt að þau rækju til okkar. Lánið var þó eigi meira en svo að þegar við vórum komin upp á Oddafell kom þetta líka svakalega haglél sem dundi á okkur með þessum líka látum að þegar við loksins komum í bílinn var allt rennandi, og pollur í bakpokanum. Gránað hafði í fjöll. Þvílíkar öfgar! Með líflausa fingur og hroll í kroppnum brunaði ég í bæinn, sótti sundfötin og náði loks í mig almennilegum hita i laugunum. Varð því ekki meint af, ferðin verður bara eftirminnilegri fyrir vikið;-)

Ég á afmæli í dag, mamma er víst búin að baka handa mér köku og vinir eru því velkomnir í tesopa í kvöld.
Ég er sum sé komin aptur frá Vín, rosafín, með ný sólgleraugu, og sitthvað fleira.
Í heildina hin bezta ferð. Kom heim rétt áðan, tveggja tíma seinkun á vélinni. Er e-ð löt, er að hugsa um að koma mér heim og opna litinn pakka. Aaaa. Segi ferðasögu síðar...

Gleðilegt sumar, elsku vinir;-)

Er mætt í vinnuna, hressari en síðustu daga. Annað veggspjaldið tilbúið til prentunar en hitt alveg eftir. Búin að vera hér fram á nótt síðustu tvo, þrjá daga, með hausverk og yfir 38 stiga hita og hálsbólgu (ææææ, aumingja ég, aumingja ég, aumingja ég). Ojæja. Svona hefnist manni skipulagsleysið. Reyni að massa þetta í dag og á morgun svo ég hafi e-ð að sýna. Þrír dagar í Vín.

Var líka að vinna á sumardaginn fyrsta í fyrra. Var með fyrirlestur daginn eftir. Þá var líka sól, 13 stiga hiti og mér var boðið í siglingu á Karlsfarinu úti á Fossvoginum...

Hugsi hugs...Gone on a thinking walk

Hugsi hugs, eins og Bangsímon sagði e-u sinni. Á það sameigninlegt með bangsagreyinu að hugsa stundum svolítið. Eða eiginlega aðeins of mikið. Hér kemur lítil saga að hugsi-labbitúr fyrir viku síðan. Ég hafði sum sé farið í leikhús á laugardagskvöldi með mater. Við höfðum ákveðið að kíkja á pöbba eftir á og þar eð ég drakk soldið viskí á tveimur stöðum sá ég þann kost vænstan að skilja bílinn eftir á bak við Þjóðleikhúsið. Núnú. Daginn eftir var hið besta veður og í hádeginu rölti ég niður laugarveginn. Skoðaði í glugga á leiðinni og fékk skyndilega þessa líka fínu hugmynd að belti sem ég er að pæla í að sauma. Núnú, þar sem ég var í þungum þönkum að pæla í mismundandi útfærslum rekst ég á frænda minn fyrir utan listagallerí. Tókum tal saman og svo strunsaði ég áfram. Kíkti í Iðu niðri í bæ, þurfti að kaupa mér límstifti fyrir fermingarkort sem ég var að gera. En áður en ég komst svo langt greip tímaritarekkinn athygli mína og ég ég kíkti í Burdablað. Nú, sá þetta líka fína pils í blaðinu, fékk skyndilega aðra hugdettu að skemmtilegri útfærslu á pilsinu sem gæti gert það svolítið sérstakt (og passa við nýju gullskóna mína:-). Greip blaðið með mér og á leiðinu að líminu rakst ég á gjafakort og við það fékk ég þriðju hugdettuna þann hálftímann og hugsandi um allar þessar hugmyndir, raðandi saman mismunandi litum og formum í huganum, gekk ég að líminu, borgaði fyrir, steingleymdi auðvitað hinu sem ég ætlaði að fá líka, og hélt af stað til baka heim upp Laugarveginn. Í mjög þungum þönkum. Það var fyrir tilviljun að mér varð litið til hliðar og gegnum húsasund við Laugarveginn blasti Þjóðleikhúsið við mér. Var auðvitað löngu búin að gleyma að ég hafði upphaflega farið af stað til að sækja bílinn. Hahaha. Hugsi hugs...

Hef verið að reyna að lifa eftir mottóinu: Gerðu einn hlut í dag sem þú gætir vel frestað til morguns. Jámm. Hef með þessu afrekað að skipuleggja húsfund, láta laga rafmagnið á ganginum (nei, er ekki í hússtjórn en farið að leiðast slugsið:-( )og straujaði dúk og boraði upp spegil á ganginum í auglýsingahléum þegar ég horfði á þátt á skjá einum á miðvikudagskvöldið var. Ég hef aldrei fyrr BEÐIÐ eftir næsta auglýsingahléi jafnspennt... Spegillinn hefir staðið á kommóðunni síðan ég flutti inn. Þetta lítur miklu betur út núna. En þvílíkt slugs. Úffff.

Your Inner European is Spanish!

Energetic and lively. You bring the party with you!

Who's Your Inner European?

Think pink

Mig langaði ekkert sérlega mikið framúr áðan. Æi. Skrítnar draumfarir. Lufsaðist þó á fætur, dró fram bleiku inversjón-skóna (Uppsalir 2003), bleika semelíueyrnalokka og nýja bleika, teinótta slifsið og leðurjakkann. Klæðumst drottni til dýrðar hugsaði ég og minntist orða konunnar á Omega í gærkvöldi (ég skrapp í heimsókn, sko:-). Var fegin að hafa skolað af bílnum á leið heim úr vinnu í gær þegar ég kom að honum héluðum í morgun. Mói, greyið, þarf þá ekki að vera svo skítugur í komandi frostkasti. Held hann sé líka ofsakátur með nýja nýju pústviðgerðina. A.m.k. varð ég himinlifandi þegar ég heyrði að viðgerðin kostaði ekki nema 3500-kall, en ekki 10-20 þúsund, eins og ég hafði búist við.

FIAT LUX-FACTA EST LUX

Í fyrradag gerðist sá stórmerkilegi atburður að ég gat kveikt ljós frammi á gangi við íbúðina mína í fyrsta skipti síðan ég flutti inn... Rafmagnið var nú líka endanlega farið af öllum ganginum og dyrabjöllunum svo ástandið var orðið nokkuð slæmt. Eftir að hafa hringt tvisvar í gjaldkera húsfélagsins og bankað upp á hjá nágrönnum mínum sá ég að ástandið yrði óbreytt ef ég tæki ekki sjálf af skarið. Þegar rafvirkinn kom á staðinn kom í ljós að öryggin voru farin og rofarnir stóðu á sér. Ég hafði nú keypt mér brúsa af WD-40 um daginn, vitandi að hann myndi e-n tíma koma að góðum notum, og svo var spreyjað í rofana og ... VOLA! Þvílík gleði;-) Nú er næsta mál á dagskrá að kaupa ný ljósstæði, perur og öryggi og hóa fólki á húsfund. Meiri gleði...

Á meðan Árni rafvirki gerði krafptaverk á ganginum notaði húsmóðirin (jeje) á annari hæð til hægri tímann til að snyrta og beinhreinsa skötuselinn sem hún keypti á heimleiðinni. Hann var síðar um kvöldið matreiddur í indverskri sósu og Sigga Sif kom í mat, te og langt stelpuspjall. Það var voðavoða notalegt.

Framundan er kráarrölt Bjórvina á morgun. Þangað til ætla sumir að taka skurk í greinalestri eftir að hafa verið að leika sér í GMT í gær og dag. Afraksturinn er meiri þekking og tvær myndir í fyrirlesturinn þarnæsta laugardag. Ef ég verð voðavoða dugleg að lesa má ég fara á laugardag og kaupa mér liti og striga. Jibbííí, hlakka til. Er með stóran auðan vegg heima og nokkrar misgóðar hugmyndir sem mig langar að fara að hrinda í framkvæmd.

Rétt'úr kútnum

Hmmm. Held ég sé svona hægt og bítandi að rétta úr kútnum. Þegar öllu er á botninn hvolft held ég að menn eigi að fara varlega í að treysta nokkrum nema sjálfum sér... Og sumt fólk er bara ekki þess virði að eyða á það orðum eða augnatilliti. Fusss.

Fór annars á frábæra tónleika í Fríkirkjunni í gærkvöld. Arnþrúður vinkona var að syngja, og reyndar margar aðrar gamlar kórvinkonur. Þetta voru lokatónleikar Blúshátíðar í Rvk og kirkjan smekkfull. Sungnir voru negrasálmar, kannaðist við marga þeirra, og með Kammerkórnum sungu Andra Gylfa og Deitra Farr (frááábær söngkona). Vaknaði upp í morgun í sófanum hjá mater, hálf-hugsandi og hálf-dreymandi um S-bylgju hraða í skorpunni og Qs-gildi. Jeminn, en spennandi. Er samviskan e-ð að naga mig?

Leirburður

Þriðji í kvefpest...

Djöfulsins drullukvef,
dúndrandi hausverkur stíflað nef.
Hausinn fullur af hor.
Helvíti. Vildi'að það væri vor.


Jákvæð? Fusss. Ekki ég....

The Domestic Godess

Jeminn eini. Ég sló bara öllu sem heitir myndarlegt við síðustu helgi og lék the domestic godess. Þurrkaði af, sópaði hvurn krók og kima og skúraði. Fúgaði og kíttaði svo með pa inni á baði. Fór reyndar ekkert offörum í eldhúsinu að þessu sinni. En það gerir ekkert til, þar sem ég hef mig og aðeins mig til að elda og baka oní. Og nóg fékk ég af bollunum annars staðar. Er að hugsa um að eiga ljúfa stund með kíttissprautunni í kvöld og klára verkið (í kringum baðkarið, sko). Horfa svo á das Model ala Tyra á s1. Jiiii, hvað þetta verður huggulegt (og nei, er ekki að tapa glórunni;-)

Annars var þarsíðasta helgi ekki af verri endanum. Pakkaði niður sæng minni, nóg af greinum til að lesa og rauðvínsflösku og ók með Ara viðskiptastjóra norður á Sauðárkrók í heimsókn til broþar og Söruminnar. Þar var hlegið mikið, hörð barátta háð um vinningssætið í Siedler von Catan, fíflast, etið nóg af rosalega góðri og mikilli súkkulaðiköku og sungið. Sungum tvíradda norður yfir Vatnsskarðið og Old Durrham Town og fleiri Whittaker-slagara suður Holtavörðuheiði. Ég rétt náði að troða inn svona eins og þremur AC-DC lögum. Þá var strax skrúfað niðrí græjunum...

Ostabakkar í massavís

Mottó síðustu viku: Hold on tightly, and let go lightly!!!
Og næstu viku: Upp, upp mín sál og allt mitt geð...

Það er kominn svolítill vorhugur í mig. Það er kannski asnalegt að segja svona í janúar en mér finnst það nú samt. Það er svolítil þýða núna. Og í gær, er ég gekk hér að Veðurstofunni, fann ég lyktina upp úr sverðinum og af nýsöguðum trjánum og það minnti mig svo á vorið. Og hjartað tók smá kipp. Það er líka kominn mikill framkvæmdahugur í mína. Ég fór í gær í flísabúð fyrir vinnu og var svo heppin að ná í síðasta dag útsölunnar. Fékk þar flísarnar sem ég var búin að velja mér á smá afslætti. Keypti líka bindigrunn, lím og fúgur svo nú er ég til í allt. Þarf bara að byrja á að mála lopt og veggi, pússa upp innréttingu, mála hana. Svo get ég farið í flísalagninguna. Íííí, hvor jeg glæder mig til:-) Eldhúsið mun taka stakkaskiptum næstu mánuði...

Er nú á leið í bíltúr upp í Borgarnes að sækja forláta ostabakka sem var brotinn er ég tók utan af honum um jólin. Sendi hann í viðgerð. Á nú eina þrjá (nei, fjóra!!!) ostabakka og ætti að geta haldið verulega fínt ostapartý ef sá gállinn væri á mér. Hahaha...

Matur og mere

Abstraktinn er ég búin að senda, er auðvitað bjartsýn og geri ráð fyrir að hann verði samþykktur. Líka búin að fá vilyrði fyrir ferðinni svo það eru allar líkur á því að ég fari á EGU-ráðstefnuna í Vínar í lok apríl. Óvei. E-ð til að hlakka til; og kvíða fyrir...

Ætla að nota vinkonur mínar sem tilraunadýr í kvöld. Mun prófa nýja uppskrift með skötusel, karrímauki/mangómauki/kóríander. Fékk þá hugmynd að hafa jarðarber með mascarpóne osti/dökku súkkulaði/ristuðum kókosflögum í eftirrétt. Ummm. Hlakka til að sjá hvernig til tekst. Ef allt fer í hass eru pizzurnar frá Eldsmiðjunni alltaf góðar!!!

Bigmouth strikes again

Horfði á þau þar sem þau sátu í við eitt borðið og hún dró upp tappa með stjörnum, tyllti fyrir augun og sagði brosandi: "Sjáðu, ég er með stjörnur í augum!" Og hann horfði á hana og sagði: "Tókstu þetta meððér til gera þetta, ó guð, þetta er svo leeeeeeiiiiiim" með svo mikilli fyrirlitningu í röddinni að hún rétt gat kreist aftur tárin þegar hann rauk upp og fékk sér annan á barnum. Og ég hugsaði bara: Almáttugur.


Abstraktinn skal tilbúinn fyrir ellefu. Hamast... Skjálftavirknin aptur að taka við sér fyrir norðan. E-r kippir af og til. Og svo er ég frekar montin yfir því að vera komin hingað kortér FYRIR átta í morgun, jesss.

Uhhh. Já ansi var ég annars góð að vita það einn tveir og tíu hvað ég átti að fá í jólagjöf. Tíhihí. Fékk það staðfest um helgina. Sendingin reyndar ekki komin en hlakka til að sjá þetta:-)

The end is nigh (and revenge is sweet)

Já. Sá þessa líka brjáluðu mynd um daginn, Old Boy. Afskaplega svört og ömurleg og ljót á köflum en góð. Hefndarþorstinn heldur tórunni í manninum fjötraða. Ræninginn þó enn meiri fangi eigin tilfinningafjötra. Sá þó meira léttmeti um helgina. Vildi fá Big með á Alfie (jáhhh, sumir hefðu haft gott af því) en The Incredibles varð fyrir valinu. Myndin kom ótrúlega á óvart, mjög skemmtileg.
Annars var hátíðarfundur MOBS á föstudaginn. Jaaaaá, soldið skrautlegt kvöld. Sei nó mor.

Og: In my life, why do I smile at people who I'd much rather kick in the eye... (Smiths eiga alltaf réttu orðin;-)

Gleðilegt nýtt ár!!!

Hulló gæs, og gleðilegt nýtt ár. Þakka lesendum og vinum hið liðna.
Hefur e-ð drifið á daga undirritaðrar síðan síðast? Jólin liðu svona eins og vanalega. Fór í leikhús á annan með Big og sá þessa líka ágætu sýningu Eldað með Elvis. Vissulega stórskrýtin og fjölskylda og undarlegt lið en allt fór þó vel að lokum (nema fyrir blessaðan drenginn Stefán:-) Partýstand milli jóla og nýárs og meiri gleði á gamlárskvöld þegar ég datt í viský og spilaði Die Siedler von Catan fram á nótt (og tapaði náttúrulega, en það skiptir nú ekki máli, hmmm). Endurheimti Big frá útlöndum á sunnudaginn var og rúllaði náttúrulega út á flugvöll. Er annars búin að vera með afbrigðum löt til vinnu og búin að fá soldið leið á öllu saman. Held ég sé að taka gleði mína á ný og vil reyna að drífa þetta verkefni áfram og klára. Sem fyrst. A.m.k. vinnuna. Ætti að geta það, mesta vandamálið er að fara að setja e-ð niðrá blað og lesa þennan líka haug af greinum sem eftir er. Úfff. Úfff.
Framundan: Hátíðarfundur Bjórvinafélagsins á föstudaginn næstkomandi. Og átak í að vakna fyrr!!! Upp upp mín sál og allt það...

Já, ég var svona að hugsa um jólin (erfitt að einbeita sér að vinnuni núna) og hefðir eftir að hafa lesið pistil Stellu um ekki-hefðir á sínu heimili. Ég held þær séu ekki margar hefðirnar núna, nema að borða hamborgarahrygg hjá mömmu á aðfangadagskvöld og hangikét hjá ömmu í hádeginu á jóladag. Ég man hvað það var notalegt að vakna snemma á jóladagsmorgun, á undan öllum öðrum, fara upp í stofu með góða jólabók og leggjast í sófann og maula hnetur við lesturinn. Drattast í föt ekki fyrr en langt var liðið að hádegi og rölta út með mömmu upp í kirkjugarð í daufri vetrarbirtunni og fá heitt súkkulaði og smákökur um kaffileytið. Liðin tíð. Úff. Nú fæ ég nostalgíukast...

Big tjáði mér á mánudag að gjöfin sem hann hefði pantað handa mér væri ekki komin. Hmmmm. Ætli ég fái þetta???. Nei, þetta var nú bara það fyrsta sem mér datt í hug;-) Hmmm.

Annars óskar Silla glens lesendum dagbókarinnar nær og fjær gleðilegra jóla.
Hilsen pilsen...

Það er kalt og kólnar enn

Nú er frost á Fróni. mínus tíu til ellefur gráður á Celsíus í morgun. Skrítið, mér fannst ekkert svo kalt í morgun. Kannski af því að ég klæddi mig betur en venjulega. Vaknaði annars fyrir allar aldir í morgun, eða fyrir sjö. Hefði alls ekki þurft að stylla bæði vekjaraklukkuna og símann minn. Ég vildi bara vera komin mjög tímanlega til vinnu svo ég gæti farið snemma í dag. Það er nefnilega e-t óyndi í mér. Get ekki einbeitt mér að vinnunni og vil ekki þurfa hanga hér fram á kvöld. Auk þess á ég enn eftir að skúra mín gólf. Ég fékk nefnilega góða heimsókn í gærkvöld. Gerða Björk kom í te og við spjölluðum fram yfir miðnætti. Í fyrrakvöld hitti ég líka Stínu og Pálma og bar augum soninn unga Baldur (eða Balla bjútí:-) Alltaf gaman að hitta góða vini.

Stysti dagur ársins

Í dag vóru sumarsólstöður kl 12:42. Nú fer dag að lengja aptur, ó hvílík gleði!!! Hér í höfuðborginni er rigningarsuddi og varla hefur birt að ráði í dag. Ég er nær búin með allt jólastúss, búin að póstleggja flest öll jólakort nema þau sem ég afhendi prívat og persónulega og bara eftir að pakka inn tveimur gjöfum og skúra mín gólf. Vona að strákstaulinn á móti mér sjái sóma sinn í því að skúra nú ganginn einu sinni, svona í tilefni jólanna. Annars mun hann fá fá viðurnefnið drulluhalinn, skömmin, ef hann nennir þvi ekki.

Vesen!

Ég held það sé e-t vesen á öðrum íbúanum í kjallaranum. Í gær var hringt í mig frá innheimtu Orkuveitunnar til að reyna að hafa upp á manninum, sem ég hafði ekki séð í nokkra daga og pósturinn hans hafði ekki verið tekinn úr körfunni á ganginum. Í morgun vaknaði ég svo við rokktónlist upp úr sjö, heyrði er ég fór út að hún barst úr íbúð hans. Svo það er blessuðum drengnum að þakka að ég er mætt vel tímanlega í vinnuna:-)

Ég sótti Big (so-called-boyfriend ?) út á flugvöll í gærkvöldi. Maðurinn varð hissa, hélt ég væri kannski að sækja e-n annan!!! Uhhhhh. Ekki alveg rómantískasta móment. Held ég hafi hrætt úr honum líftóruna:-(. Kann ekki að haga mér rétt, læt hjartað of mikið ráða mínum gerðum, og það fer ekki alveg alltaf skynsamlegustu leiðina. Æææ.

Nýtt met og bráðnauðsynleg stígvél

Er ekki kominn tími til að láta aðeins í sér heyra?
Stranglers tónleikarnir voru ekki af verri endanum. Dró mater með mér. Stóð uppi við sviðið og dillaði mér og hnykkti haus í takt við tónlist Fræbblanna og Stranglers. Mater var líka í sjöunda himni eptir herlegheitin, sá mest eptir að hafa ekki verið niðri við sviðið með mér...

Ég sló nýtt met um helgina. Reyndar er það ekki neitt til að vera stolt af, en met engu að síður. Mér tókst sum sé að sofa fram að/yfir hádegi þrjá daga í röð og minnist ég þessa ekki að þetta hafi nokkru sinni gerst á minni aumu ævi, svo morgunhress sem ég optast er. Hmmmm. Og hvernig fór ég að þessu? Seint að sofa á föstudag. Vaknaði fimm til að skutla kærasta (???) á Umferðarmiðstöðina. Fór auðvitað beint heim í bólið og drattaðist ekki fram úr fyrr en rúmlega eitt. Úff. Átti ljúfan dag á Laugaveginum með mater í jólagjafaleit. Kíktum á kaffihús og ég fékk þetta líka dásamlega græna-mangóte og gúmmulaði, dökka súkkulaðiköku. Við fundum frábær stígvél og föt á mater. Ég kolféll líka fyrir æðislegum svörtum stígvélum (ást við fyrstu mátun!!!) og hafði náttúrulega ekki efni á þeim en keypti samt í jólagjöf frá mér til mín (jú ef kona hugsar ekki um sjálfa sig, hver á þá að gera það?). Kvöldið endaði á árshátíð Sjósundfélagsins, afar rólegu kaffiboði í Grafarvoginum, og hálftíma dansi á Thorvaldsen með Pétri presti og formanni félagsins. Spaugilegt:-) Nú, eftir allt þetta erfiði svaf mín til hádegis og drattaðist aptur í bæinn. Daginn eftir, á mánudegi gat ég með öngvu móti haft mig fram úr, fannst ég óendanlega syfjuð og þreytt og ákvað að ég hlyti að vera veik. Svaf til hádegis. Held að þráláta þriggja vikna kvefið hafi hér haft e-ð að segja, plús kvefið sem ég fékk ofan í það um helgina. Vona að það rjátli af fyrir jólin svo frekari met af þessu tagi verði ekki slegin þetta árið.

Stranglers

Mig langar á Stranglers tónleika á morgun en hefi öngvan til að fara með. Hver og hver og vill?

Viðburðarík helgi

Síðasta helgi var gríðarlega pródúktíf. Gerði sitt lítið af hvoru, að skemmta mér og vera myndarleg heima fyrir.
Á föstudagskvöldið síðastliðið fóru nokkrir af bjórfundi út að borða. Hmmm, nokkrir er kannski of djúpt í árina tekið, vórum aðeins fjögur, ég sumsé og þrír karlmenn (vúhúúú). Fórum á Indókína á Laugavegi. Sá fyrsti heltist úr lestinni þar eptir matinn. Ég og drengirnir skunduðum síðan á Grand Rokk og ég fékk þar einn kvartlítra af Stout-Murphy's. Gafst upp klukkan tólf og skundaði heim. Mér varð ekki svefnsamt fyrir háls-kitli (e-r kvefdrulla niðrí berkju) og reyndi að fá mér þrjá tebolla til að minnka pirringinn. Það sló ekki nógu vel á hostann og ég þurfti jafnframt að fara trekk í trekk á klóið til að skila af mér öllu vatninu! Reyndi þá púrtvín. Tvö lítil staup. Varla nógu sterkt. Ég held ég hafi rétt blundað milli sex og sjö frammi í stofu. Tók þá til við að þvo á mér hárið, þrífa klósettið, fékk mér loks teskeið af tabaskó sósu og skreiddist inn í rúm um átta-leytið. Gríðarlega skemmtileg nótt!!!

Á laugardagskvöld var mér boðið í mat. Skemmtilegt fólk og ég komst að því að annar gestgjafanna er svona hálf-partinn stjúpbróðir vinar bróður míns. Maður þessi hefur studerað japönsku, og varð eiginlega óbeint valdur að því að ég er nu með japanskt tattú á framhandlegg (japönsku áhugann fékk Þorsteinn bróðir að ég held hjá honum, stakk svo síðar upp á tattúveringunni...). Hlustuðum á Cave og drukkum rauðvín/koníak/viskí...

Ég var samt það brött á sunnudag að ég fór í leiðangur með mater og fann bæði flísar og parket sem mig langar í í Byko, keypti ruslagrind í eldhúsið og mottu í svefnherbergið. Við mater boruðum síðan fyrir ruslakörfunni og mynd inni í svefnherbergi, sem ég hefi dregið að setja upp í heila tvo mánuði.

Gerði smá tilraun í eldhúsinu í gærkvöld. Bauð gesti í mat og eldaði skötusel í vínberja-kókossósu. Ohhh. namminamm. Skildi helminginn af fiskinum eftir en held ég drífi mig í að elda úr afganginum fyrir mig á eftir.

Hmmm. Það eru ekki nema tuttugu dagar í að daginn fari að lengja aptur. Furðulegt. Ég hefi ekki fundið svo fyrir skammdeginu síðan í október, fyrr en í dag. Veit ekki af hverju. Og þó. En það er stutt eftir. Tíminn fram að jólum á eftir að fljúga áfram. Er farin að hlakka mikið til að hitta vini sem koma heim að utan um jólin...

Get ready for love

Jámm. Ég fékk loks nýja Cave & the Bad Seeds diskinn, Sláturhúsablús, í hendur á mánudag. Var ekkert alltof hrifin við fyrstu hlustun. Nema þá helst af fyrsta laginu, Get ready for love. Mér finnst annars vanta meira rokk í diskinn. Hinn, Lýru Orfeusar, hefi ég enn ekki gefið mér tíma til að hlusta á.
Anars er allt við það sama. Enn rignir.

Bloti

Enn einn rigningardagurinn. Enn snjórinn er óðum að hverfa. Fegin er ég. Þoli ekki slabb. Vil annaðhvort snjó eða ekki. Óþalandi að vera á ferðinni gangandi í svona drullufærð, bílarnir ausa yfir mann hroðanum.


Ég sá Bridget Jones-The edge of reason um daginn. HúnBridget er engri lík. Ég veltist um af hlátri. Þótti þó mest vænt um að heyra að hægt er að finna sanna hamingju þótt rassinn á konu sé á stærð við tvo keilubolta. Þvílíkur léttir;-o


Haustráðstefna Jarðfræðafélagsins var í gær, efnið var hafsbotnsrannsóknir á landgrunni Íslands. Fór og kíkti á fyrirlestrana, þótt ég hefði ekkert fram að færa. Langflestir voru áhugaverðir og skemmtilegir, vel unnir, fallegar myndir. Sáum líka neðansjávarkvikmynd af hverastrýtum í Eyjafirði.


Og að lokum, America's next top model! Ja hérna hér, og Yoanna vann! Ég er dulítið hissa. Var orðin nokkuð viss um að Shandy myndi vinna, þá hefði þetta nú orðið ekta Öskubuskusaga. En Yoanna átti þetta nú sosum skilið. Eða hvað finnst ykkur?

Þriðji í tandoori-kartöflum

Á miðvikudag fékk ég matargest. Hafði ákveðið að elda tandoori-kartöflur með cummin-hvítlaukssósu. Mundi það rétt þegar ég sturtaði rúsínunum í pottinn að ég hafði séð viðkomandi pilla það sem hann hélt að væru rúsínur úr sætabrauði deginum áður. Hmmmm. Gaffallinn hans virtist mun gisnari en minn og rúsínurnar sem rötuðu á diskinn e-n veginn runnu bara í gegn. Það voru einmitt rúsínurnar sem settu punktinn yfir i-ið þarna. Ojæja. Vona að hann hafi ekki farið of svangur heim... Eldaði fullan pott svo nú er þriðji í kartöflum hjá mér, og enn nóg eftir. Vííí...



Óskaplegur kuldi er þetta. Og ég sem var farin að hlakka til vetursins snemma í sumar. Lét mig dreyma um logndrífu, nýfallna, dúnmjúka mjöll og stjörnubjartar nætur. Fussa svo núna yfir öllum þessum snjó. Ég var ástfangin þá, týnd í draumórum. Óskaplega getur ástfangið fólk verið vitlaust. Svíf ekki lengur á þessu bleika skýi óraunveruleikans. Veð svona meira í mýkrófísísku regnskýi, með fullt af holum í og er dauðhrædd við að detta niður. Það er vandlifað í þessum heimi!!!

Um alls ekki neitt...

Ohhh. Það er hrollur í mér. Fæ mér heitt te með mjólkurdreitli. Væri til í að sitja núna á ensku tehúsi og fá cream scones og góða kökusneið. Eða kúra uppi í rúmi með góða bók, vitandi að ég þyrfti ekki að gera handtak næstu vikuna.

Enn af sundi

Með góðfúslegu leyfi Hjörleifs set ég hér tengil á myndir frá komu sundmanna í land á Álftanesi á laugardaginn var. Brrrrr. Er fegin að hafa ekki þurft að svamla þarna í veðrinu sem var á sunnudag. Úfffff. Fleiri myndir eru væntanlegar á síðu sjónsundfélagsins næstu daga. Set inn tengil þangað þegar þær koma

meira sjósund

Langt er síðan síðast. Ég held að þessi síða sé svona smám saman að lognast út af. Ég hefi verið æ latari að skrifa um það sem á daga mína drífur.
Varð þó að monta mig smá. :-) Þar sem ég stóð dauðleið í Öskju að kynna verkefni mitt í nær mannlausu húsi á föstudaginn var, fékk ég símtal. Forsprakki sjósundfélagsins bað mig um að taka þátt í Bessastaða-boðsundi á laugardag, sum sé í gær. Hmmm. Ég var nú ekkert sérlega spennt. Komið fram í nóvember, soldið farið að kólna...
Það varð þó úr að ég dreif mig. Og sé ekki eftir því. Hver synti 5-7 mínútur í 4,2 stiga köldum sjónum. Skalf ógurlega í bátun að loknu sundi og á leið í land. Fékk þó í mig hita í sturtunni og af teinu og rjómapönnsunum hjá Dorrit og Ólafi. Reyni að finna myndir e-s staðar af þessu þrekvirki, annars var þetta allt saman myndað alla leiðina, jiii, hver veit nema búin verði til mynd...

Ég tók prófið aptur. Ekki amalegt að vera járnmeyja...

What metal band are you? Iron Maiden You're Iron Maiden! You're a legend in the music industry. Your legacy has lasted close to 25 years. You're all about moderation...never too much of anything, but never too little. You've always remained true to metal, and the people love you for it. Up the irons!

Click Here to Take This Quiz Brought to you by YouThink.com quizzes and personality tests.

Howdy?

Ég eyddi síðustu tveimur dögum á gamla "góða"(???) bókasafninu í VRII. Var að lesa bókarkafla og greinar um Haskell-sources, source-spectra og annað enn skemmtilegra (já!). Þar sem ég sat og las fékk ágætishugmyndir um hvernig ég get hugsanlega útfært forritið til að finna mestu færslu á sprungunum. Fékk líka fleiri hugmyndir að hinu og þessu og rissaði þær niður til að gleyma ekki.
Setti upp loðhúfuna í gær. Brrrr. Drullukuldi. Var svona að spá í að drífa mig aptur í sjósundið... en er orðin óttalegur aumingi. Sussss

Howdy?

Ég eyddi síðustu tveimur dögum á gamla "góða"(???) bókasafninu í VRII. Var að lesa bókarkafla og greinar um Haskell-sources, source-spectra og annað enn skemmtilegra (já!). Þar sem ég sat og las fékk ágætishugmyndir um hvernig ég get hugsanlega útfært forritið til að finna mestu færslu á sprungunum. Fékk líka fleiri hugmyndir að hinu og þessu og rissaði þær niður til að gleyma ekki.
Setti upp loðhúfuna í gær. Brrrr. Drullukuldi. Var svona að spá í að drífa mig aptur í sjósundið... en er orðin óttalegur aumingi. Sussss

Rannsóknir

Hæ. Er búin að setja hér upp einfalda rannsóknasíðu og setti þar inn linka á pósterana mína og einn fyrirlestur (af vorráðstefnu Jarðfræðafélagsins í maí). Svona að því að ég er ekki búin að birta neitt enn, og það er líklega e-r tími í að svo verði. Ég vinn á hraða snigilsins, greinarskrif eru heldur ekki mín sterka hlið. Það er ferleg pína fyrir mig að reyna að setja e-ð niður á blað.
Sit enn í vinnunni. Ætla að reyna að pikka e-ð inn um sourc-spectra og lesa e-ð meira. Og ef ég er dugleg fæ ég að skutlast aðeins heim til að horfa á America's next top model. Juhhú...

Of mikið stress

Já. Ég er æði stressuð þessa dagana. Svo stressuð að ég borða allt of mikið af drasli og sætindum og fæ ógeð, en mjög tímabundið þó. Og ég hugsaði alvarlega um það í gærkvöldi, þegar ég var á leið heim gangandi, hvort það væri ekki bara sniðug hugmynd að byrja að reykja! Ég gæti þannig vonandi bælt fíkn mína í sælgæti og minnkað líkurnar á því að ég verði orðin fituhjassi í lok mánaðarins. Oooo, grönn og fín með rauðar neglur, munnstykki og mjóar sígarettur og ekkert súkkulaði. Hmmmm. Er þetta nokkuð svo galin hugmynd. Ööööö, eða er ég að missa vitið:-? (Ætti líklega frekar að drífa mig optar í leikfimi...)

Dauð???

Nei, ég er ekki dauð, enn. Er bara á kafi í vinnu og skólaverkefnum og upptekin af skjálfri mér. Er loksins að hökta í gang eptir allt of mikið slugs og hangs (en á sosum sínar skýringar) og reyni nú að taka mig á í lestri.
Skilaði fyrsta reikniverkefninu í verkfræðinámskeiðinu á mánudag. Það var reyndar gaman að komast að því að þessi kúrs er bara alls ekkert leiðinlegur. Ég var bara búin að ákveða það strax og ég skráði mig í námskeiðið að þetta væri óskaplega leiðinlegt, óskiljanlegt og erfitt, ekki alveg rétta hugarfarið. En það er líka slæmt að vera strax orðin langt eftir á, ekki búin að skila neinum heimadæmum, en, reyni að halda þetta út.
Þarf líka að skila sourc-spectra greinargerð sem fyrst (eiginlega í gær) og sat hér fram á kvöld í gær við lestur.
Ég leyfi mér þó að renna heim sum kvöld og kíkja á uppáhalds-sjónvarpsþættina, svo ég klári nú e-n tíma peysuna á barnið sem þegar er fætt. Það væri hálf-neyðarlegt að senda of litla peysu.

What metal band are you? Opeth You are Opeth! You are very poetic with your lyrics, and your music flows like a waterfall. Your emotions change from angry to sad very quickly. Some people don't like you because you can sound too depressing. You're one of the best metal bands in the world, and you worship your fans!

Click Here to Take This Quiz Brought to you by YouThink.com quizzes and personality tests.

Herzeleid

Æi. Soldið já.
Hér er annars napurt og næðir um holtið með norðan 17 metrum á sekúndu. Brrrr.
Og ekki mikið meira um það að segja.

Fór annars á geisladiskamarkaðinn í Perlunni í gærmorgun og keypti mér fjóra diska, þar á meðal var Reise Reise, nýi Rammstein diskurinn, ég mæli með honum. Varð fyrir nokkrum vonbrigðum með Mutter-diskinn. Fannst hann aldrei jafn-góður og fyrri tveir. Sá nýi er hins vegar rokkaðri og bara frábær. Ætla að kíkja aftur núna á eftir og athuga hvort AC-DC Back in black er til.