Helgin

Fleiri afmæli: Guðmundur, bróðir pabba, átti afmæli í gær. Ég sendi bara hamingjuóskir út í loftið, þar sem hann les þetta ekki. Og Besti bróðir á afmæli í DAG. Til lykke, Besti!!!

Ég dreif mig á línuskauta eftir vinnu á föstudag. Var tæpan klukkutíma að dóla mér á stígnum. Kíkti svo á bjórfund og eftir einn Murphy's var ég farin að kætast aðeins.
Singles-liðið, sem eftir var, gekk svo niður á Vitabar í hamborgara og meðonum og annan rauðan kláraði ég svo á leiðinni. Tók handahlauð á Klambratúninu og flissaði
það sem eftir lifði kvölds. Jájá, það var bara gaman. Var komin eldsnemma á fætur til að sauma daginn eftir. Buxurnar eru nú nær tilbúnar, á bara eftir að falda.
Fór á bekkjamót um kvöldið. Já. Það var, ágætt, áhugavert. "Og hver ert þú? Heitirðu ekki Laufey?" Neiiii, en eg fór með veggjum.... "Og hvað gerir þú? Ertu gift?" Blabla, nei, segi ekki veðurfréttirnar, nei, ein og hjá mömmu...
Ætti að reyna að bæta stöðu mína fyrir næsta mót. Æi, er annars alveg saman þótt ég hitti hópinn allan ekki fyrr en eftir nokkur ár. Eða bara mörg ár. Það er skemmtilegast þannig. Jamm.
Ég smakkaði ekki dropa af öðru en vatni en var samt með dúndrandi hausverk allan gærdaginn. Eftir að hafa legið hálfsofandi úti á svölum drattaðist ég loks út. Breiddi úr teppi á Klambratúninu og lá í sólinni í
smá stund. Dagurinn endaði þó vel því ég kíkti í heimsókn til Berglindar og fékk þennan
líka fína mat sem Evvi hafði eldað. Ummm. Maðurinn er snillingur í grænmetisréttum. Rúllaði út eftir að hafa fengið súkkulaði köku í eftirrétt og horft á þrjá þætti af Beðmálunum.
Ég held ég þori ekki að bjóða þeim heim í mat í bráð. Síðast slettist úr sósan úr hristiglasinu út um allt eldhús!!!

I'm the operator with my pocket calculator

Já, ég skemmti mér stórvel á Kraftwerk-tónleikunum í gærkvöldi. Stemmningin var fín, enginn að troðast, ekkert upphitunaratriði, kapparnir byrjuðu bara að spila á slaginu níu og, mér til mikillar ánægju, byrjuðu þeir á titillagi plötunnar Mensch-Maschine. Eitt olli mér þó vonbrigðum: að fá ekki uppáhaldslög eins og Das Model á þýsku, heldur ensku. Lagið er miklu svalara á þýsku, ég gat heldur ekki sungið með... Æ, en þetta er bara smáatriði. Þeir eru með flotta sýningu, mikið fyrir augað.

Eins, zwei, drei und der Knabe war wieder fort...

Kraftwerk heute abend. Ja, Ja, Ich fraue mich sehr darauf. Enn eru til miðar ef e-rjir vinir vilja slást í för með okkur Pálínu.
Ég náði mér líka í miða á bekkjamót sem verður á laugardaginn næsta. Úff, það verður skrítið að sjá liðið eftir öll þessi (12) ár. Suma hef ég rekist á af og til. Aðra alls ekki. Ætli ég muni nöfnin á öllu þessu fólki? Efast um það. Ætti að taka upp árgangsmyndina og nafnalistann og undirbúa mig svo ég móðgi nú ekki neinn. Málið er bara að ég hef ekki hugmynd um hvar myndin er niðurkomin. Fann hana a.m.k. ekki í vanalegu skúffunni. Það er orðið svolítið þreytandi að búa svona í kössum.

Annars er sama gluggaveðrið í dag.

Tuð um veðrið

Tæplega tveggja stiga hiti. En sólin skín og ég þrjóskast enn við og fer í sumarjakkann á morgnana; set samt á mig húfuna. Mér varð nú samt alveg nóg um þegar ég sá snjófjúk í lofti áðan.
Leiðrétting: 0,8 gráður. Nei, hættu nú alveg!!! ;-(

-halló, er búin að skrifa færsluna tvisvar og alltaf tapast hún. Argghhh
prump blogger.
Reyni í þriðja sinn á eftir...

Afmælismánuður

Já, upp er runninn afmælismánuður fjölskyldunnar. Í dag hefði Hjalti langafi átt afmæli. Minn dagur (og Beckhams!) var í hins vegar í gær. Ég þakka fyrir góðar kveðjur, tölvuskeyti og SMS héðan og þaðan: Reykjavík, Ulvik-Noregi, Berlín, Canterbury, Glasgow, Árósum-Danmörku. Já, vinirnir og ættingjarnir úti um allar trissur.
Ég bakaði tvær kökur á laugardagsköld. Önnur var voða létt (úr að megninu til úr léttjógúrt, kókosmjöli, möndlum og ferskum jarðarberjum), hin aðeins þéttari. Stelpurnar komu í hádegiskaffi og færðu mér hitabrúsa svo ekki þurfi ég neitt að vola af kulda þótt ég sé ein og karlmannslaus á gönguferðum mínum hér eftir, hehe. BroþarogSara og mamma gáfu mér frábæra tónlist: Radiohead-Hail to the Thief, Echo and the Bunnymen-best of, og Talking Heads. Fékk líka tvo höganesdiska, þríhyrnda, í safnið. Nú, var svo boðið í kvöldmat með annarri afmælisprinsessu og fór að lokum í bíó með bror.
Veislan hélt svo áfram í morgun því ég kom við á pósthúsinu og sótti tvö böggla á leiðinni í vinnuna. Fékk þessa líka æðislegu húfu og prinsessukisukort frá Árósum. Ú, varð eitt bros þegar ég tók upp upp pakkann, rauk beinustu leið inn á klósett og mátaði fyrir framan spegil. Bíð nú eftir leiðindakuldakasti svo ég geti spókað mig um með hana. Kærar þakkir. Hinn böggullin var frá Berlín. Sitthvað frá pabba. Býflugnavaxkerti og flauta um hálsinn. Hmm. Flautan kemur sér vel því bílflautan er enn í ólagi. Nú get ég bara skrúfað niður rúnuna og blásið hressilega í flautu á gamla mátann. Ætli mönnum bregði ekki?

Ekkert plat

Ég er bara farin að halda að þetta sé ekkert plat. Sumarið er komið fyrir alvöru. Það er svo fallegt veður að ég gat ekki hugsað mér að fara í leikfimina áðan er fór þess í stað á línuskauta. Var svolítið með skjálfandi fætur fyrst en batnaði eftir því sem leið á. Það er kominn alvöru-sumarfiðringur í mig. Langar bara til að vera úti, fara í sund, hlaupa upp á fjöll, hvað sem er. Sit og læt mig dreyma...

Erfið sundferð

Já, það er fátt jafn aumingjlegt og að endurtaka oftar er einu sinni Magnetic Moment í stað Seismic Moment. Fékk að heyra það eftirá. Uss. Ég gat nú ekki annað en brosað að þessu og prísaði mig sæla yfir því að svo fáir mættu. Þegar ég kom heim ákvað ég að taka mynd á leigunni. Ég valdi The Core því, merkilegt nokk, hafði ég aldrei séð hana og svo fannst mér ekki veita af því að læra hvernig virkilega svalir jarðeðlisfræðingar eru. Ég var nú ekki hrifnari en svo að ég sofnaði eiginlega yfir myndinni og varð að horfa á hana morguninn eftir. Þvílíkt bull maður. Og að handritshöfundar geti ekki einu sinni haft einfaldar staðreyndir á hreinu, eins og hvar plötuskil eru. Uss bara. Og aðalhetjan var aðeins of svöl til að ég geti nokkurn tíma leikið allt eftir.
Annars fór helgin í að sinna hlutum sem lengi hafa setið á hakanum: Bera á gönguskóna og bursta götuskó, þvo þvott, þurrka af ryksuga, uppvask, þrengja buxur. Og svo brá ég mér í sund. Held bara, svei mér þá, að það sé rúmt hálft ár síðan ég fór síðast (á Geysis hótelinu). Ég ætlaði varla að þora að fara. Og eftir að hafa synt minn kílómetra og buslað um í lauginni var mér farið að verða ansi kalt og langaði að setjast í pottinn. Ég var líklega korter-hálftíma að telja í mig kjark til að fara upp úr lauginni. Og þegar ég var svo búin að vera í pottinum góða stund og mér löngu orðið allt of heitt, taldi ég í mig kjark til að standa enn einu sinni upp og strunsa inn í sturtur.
Af hverju allt þetta hik? Jú, hugsunin um allt of feitan rass, sverar lappir og skvapkennt mitti!!! Það er greinilega ekki alveg í lagi með suma. :-)

Pínan yfirstaðin. Það veitir mér alltaf svolítið góða tilfinningu að geta strikað yfir á verkefnalistanum. Fyrirlesturinn vestur í Öskju búinn. Bögglaði þessu einhvern veginn útúr afar þurrum munninum og með stresshnút í maganum. Og það mættu bara sárafáir. Meira að segja færri en vanalega. Og ég sem hélt að fundirnir færu að verða fjölmennari eftir flutningana þegar jarvísindaliðið úr Háskólanum væri líka á staðnum. Kannski fólk hafi bara ekki haft áhuga. Hmm. Og innst inni varð ég fyrir svolitlum vonbrigðum. Búin að hamast við að gera þetta vel og svo mætir bara varla hræða!
Jæja, ég er svona að henda reiður á hugsunum mínum og hlutum. Er búin að taka svona líka ágætlega til á skrifborðinu, spila Fraz Ferdinand og er að hugsa um að slá öllu bara upp í kæruleysi í dag.

Gleðilegt sumar

Já, gleðilegt sumar! Hér er þetta líka frábæra sumarveður, brakandi blíða sól og hiti (9,8°C)! Ég sit í vinnunni svolítið rám með ógeðslega reykjarlykt í hárinu eftir að hafa dansað villtan sumardans í nótt á skemmtistað einum í bænum. Það var farið að birta í lofti þegar ég kom heim en samt glaðvaknaði ég klukkan átta! Á eftir að gera heilan helling fyrir morgundaginn en vonast samt til að komast i sund í dag til að bæta í freknusafnið og losna við vetrarslenið. Eða kannski ég fari bara út á sjó í staðinn? Hver veit...

Hvað er þetta eiginlega með konur og skó?

Ohhh, ég er sko kolfallin fyrir alveg dásamlega rauðum skóm!!!
Ætli þeir verði mínir?

Streitudraumar

Ojjj, pína framundan á föstudaginn. Er byrjuð að finna fyrir smá stressi í maganum og vaknaði upp í morgun af draumi um brotfleti og jarðskjálfta. Ég er búin að vera óþekk og skrópa í dans síðan í síðustu viku. Þori ekki að tala við stelpurnar af hræðslu við að þær fari að skamma mig. Hmmm. Sumir eru bara ægilega litlir í sér og meika ekki að dansa uppi á stóru sviði fyrir fjölda manns. Ég klúðra líka öllu þegar ég er stressuð. Gangi ykkur bara vel á morgun, stelpur!

...Sól í sinni...

Já, svo sannarlega. Ég veit fátt betra snemma á morgnana en að vakna við glampandi sólskin, þótt klukkan sé ekki nema sex hálf sjö. Og þegar ég drattast loks fram úr eftir klukkutíma aukadúr, gerið ég það með stóru brosi á vör. Ö, er ég of væmin núna? Get bara ekkert að því gert, það verður bara allt svo miklu fallegra og betra þegar sólin glennir sig svona, jafnvel þótt það sé ekki nema fimm stiga hiti hérna úti í mælireit.
Ég var í letiksti í gær. væflaðist um heima og las blöðin fyrir hádegi. Eldaði mér svo eggjaköku og borðaði hana i sólinni úti á svölum. Dreif mig svo út í sólina. Náði í hjólið mitt og hjólaði um Fossvogsdalinn og vestur í bæ í rokinu. Á leiðinni upp á Veðurstofu stoppaði ég uppi á holtinu, lagði hjólinu og lagðist niður undir steini og lét sólina baka mig í nokkrar mínútur og hummaði. Ímyndaði mér að ég væri e-s staðar úti í móa milli þúfna og útilokaði algerlega umferðarniðinn í kringum mig. Endaði svo kvöldið með Jazzi og sóló djæf-sveiflu í stofunni. Haha.
Fimm-listi dagsins er með ljúfum vortónum frá Air:
1. Sexy boy (Moon Safari)
2. You make it easy (Moon Safari)
3. People in the city (10.000 Hz Legend)
4. Don't be light (10.000 Hz Legend)
5. Cherry blossom girl (Talkie Walkie)

Ég er svona enn að meðtaka nýjasta diskinn. Hann sígur inn smám saman. Hann er annars mjög rólegur, ólíkur tíu þúsund herzunum, sem er enn í miklu uppáhaldi hjá mér.

Annars datt ég aldeilis í lukkupottin á laugardaginn. Ég var rétt komin heim þegar Berglind hringdi og bauð mér með fjölskyldunni í mat og leikhús og þar með var kvöldinu bjargað :-) .

Prent-martröðin

Alltaf sömu vandræðin að koma draslinu út á prentara. Er búin að hlaupa fram og til baka í morgun til að reyna að redda hlutunum. Vona að þetta gangi. Annars var ég nú bara kærulaus í gærkvöldi, fór heim til að horfa á Beðmál í borginni og nennti svo ekki aftur í vinnuna. Vaknaði bara snemma í staðinn og var komin í vinnuna klukkan sjö til að klára þetta litla sem eftir var. Nú er bara að bíða og sjá hvort mér takist að fá veggspjaldið á pappír fyrir hádegi.
Nei, því miður er ég ekki á leið til Nice. Fer ekki lengra en í Vatnsmýrina. Þar verður haldið Raunvísindaþing í dag og á morgun í tilefni formlegrar opnunar nýja hússins, Öskju, í gær.

Flýt sofandi að feigðarósi

Hvernig er þetta eiginlega hægt? Ég er með bókstaflega allt niðrum mig (umm, í óeiginlegri merkingu, auðvitað), kæruleysið er að fara alveg með mig og ég held það þurfi að gerast kraftaverk ef ég á að vera tilbúin með veggspjald fyrir föstudaginn. Ég er sumsé ekki byrjuð enn! Er enn að lesa greinar til að geta skrifað e-ð nógu gáfulegt. Langar mest til að stinga af, melda mig veika...
Vá og ég sem hélt hérna fyrir nokkrum árum að ég yrði eilífðarkúristi. Ólíklegustu hlutir geta nú breyst, segi ég nú bara. Því miður. Ég er líklega komin á gelgjuskeið hið síðara!!! Vona bara að það gangi fljótt yfir.

Hamfarir?

Úúú, allt að verða vitlaust úti fyrir Reykjanesi. Kíkið á þetta!

Gönguferð, kjetát, djamm og dans, og meira kjetát...

Þetta páskafrí er alltof fljótt að líða, væri til í að fá svona viku í viðbót!
Á föstudaginn langa dreif ég Berglindi með mér í fjallgöngu, enda var veðrið með eindemum gott. Ókum í Dyradal í Henglinum og gengum upp á Vörðu-Skeggja. Fengum frábært útsýni og renndum okkur niður nokkrar snarbrattar fannir á leiðinni niður. Góða veðrið entist reyndar ekki út allann túrinn því á niðurleið var komin hálfgerð slydda. Nú, Gerða Björk bauð mér svo í kvöldmat. Ég fékk danska osta í forrétt og svo nautasteik með rjómasveppasósu, ofnbakaðar kartöflur og meira að segja smá rauðvínslögg (mér fer fram...). Héldum svo af stað úr Breiðholtinu á miðnætti í partý hjá Óla Rögg. Þar var allt á fremur rólegu nótunum. Ákváðum svo að kíkja aðeins á dansgólfin í bænum, enda frábært að fara út að dansa með Gerðu. Þræddum nokkra staði, fyrst á 11, alltof löng röð á Sirkus, enduðum því í eftirminnilegu hipp hoppi á Vegamótum. Hittum þar líka fyrir einn úr partýinu hjá Óla. Þegar ég var búin að fá mig fullsadda af afar einhæfðri tónlistinni drifum við okkur á Sólon og dönsuðum þar nokkra stund. Ég skutlaði svo Gerðu heim í Breiðholtið og sat svo sjálf hálfsofandi yfir tölvunni hér heima í röskan hálftíma áður en ég drattaðist í rúmið að verða sex.
Við tók laugardagur með hangikjeti hjá ömmu í hádeginu og svo páskadagur með lestri og kvöldmat hjá fyrrverandi mágkonu. Fékk þar æðislegan mat að vanda, svakalegan gúmmulaði eftirrétt, Gammel dansk og smakkaði á þremur líkjörum. Úff. Búin að taka því rólega í dag. Bakaði (líklega misheppnaða) eplaostaköku fyrir kvöldið, við frænkurnar ætlum að hittast í mat í kvöld. Bror og Sara koma lika frá Englandi á eftir, jiiii hvað ég hlakka til að fá nýju diskana mína!

Tvífarar? Oder was?

Og það er borað í hausinn áá méééér...

Þreytandi til lengdar þetta tölvusuð. Fjórar tölvur hér inni sem mala og mala í sífellu. Held að nú eigi e-ð að fara að gera í málunum.

Heilinn er eins og gatasigti. Ég man ekki neitt. Sat róleg af mér vaktfund áðan hér niðri og kveikti ekki á perunni fyrr en ég sá alla koma niður. Þarf að skrifa allt á gula miða og lima á nefið á mér...

Bílflautan virkar ekki. Ég var að spá í hvort ég ætti ekki að láta líta á málið en ákvað svo að reyna a.m.k. svolítið sjálf áður en ég hleyp eftir hjálp. Smá fikt getur varla skaðað. Ég tók því bílahandbókina með mér upp í gærkvöldi og fann út hvar helstu öryggin liggja. Reyndi í morgun að opna öryggisboxið undir húddinu en það gekk e-ð brösulega. Ætla að verða mér úti um e-ð heppilegt tól og reyna aftur síðar í dag. Menn verða nú að geta bjargað sér sjálfir með einföldustu hluti, ekki satt?

Íbúðarkaup? Jú, fátt annað komst að í huga mér í byrjun vikunnar. Útvegaði mér eyðublöð og pappíra hér og þar. Vildi helst drífa í þessu strax! Verð stundum alveg óskaplega óþolinmóð ef ég fæ e-a hugdettu. Verð að framkvæma strax, þoli ekkert hangs, enda er hik oft sama og tap. Nema hvað. Átti spjall við pabba um þessa hluti og hann kom mér aðeins niður á jörðina. Sem betur fer, segi ég nú bara. Ætla nú að bíða róleg fram á sumar og íhuga málið þá. Það er mun skynsamlegra. Ég lifi það nú alveg af. Og það hljóta að bjóðast jafnboðlegar íbúðir þá líka. Auðvitað.

Skringslið kemur í dag heim í páskaheimsókn. Jibbíííí!

Hár, meira hár, minna hár, eða bara öðruvísi hár

Ég fór í langþráða klippingu í morgun. Og ég verð nú bara að segja það að mér finnst ég samt hálf-lummó. Líklega krullurnar. Það er bara lummó að vera með krullur. Ég fór líka út allt öðru vísi en ég hafði hugsað mér. Ég ætti kannski að fara aftur og láta laga? Kannski bara láta snoða mig! Þá væri ég laus við þennan vandræðalubba sem ég þarf að druslast með.

Ég fór líka í mitt fyrsta starfsmannaviðtal áðan. Var bara mjög jákvæð á allt saman og kvartaði lítið, enda geri ég ekki mikið af því venjulega að láta í mér heyra ef ég er óánægð, nema kannski hér. Og það er auðvitað vita gagnslaust. Nei, en mér líður í alvöru bara vel hér á Veðurstofunni og er sátt við flest. Væri samt enn sáttari ef ég byggi hér nálægt. Og svekkelsi gærdagsins var einmitt að finna í fasteignaauglýsingunum tvær fínar og ekkert of dýrar íbúðir á frábærum stað og eiga ekki enn fyrir útborgur. Aaarrrghhh. Getur e-r lánað mér hálfa milljón! U, já ég væri líka alveg til í að vinna milljón!

Ég spila nú lon og don Air-10.000 Hz Legend. Frábær diskur. Og ég skil eiginlega ekkert hvað ég var að pæla þegar ég gafst upp á honum eftir eina eða tvær spilanir þegar ég fékk hann fyrir löngu síðan. Ætli það séu tvö ár? Man það ekki. Ég er a.m.k. fyllilega sátt við þessa tónlist og hef virkilega farið á mis við mikið allan þennan tíma! Það sem olli þó vonbrigðum mínum til að byrja með var að ég saknaði raddar Beth Hirsch. Hún söng einmitt tvö af þremur uppáhaldslögum mínum á Moon Safari. Nú bíð ég bara spennt eftir að heyra Walkie Talkie, ég læt broþar kaupa hann fyrir mig í Fríhöfninni, til að spara, auðvitað! :-)

Vaktstörfum dagsins lokið og ég á leið á safnið að lesa. Já, á VRII! (Ætla aldrei að verða laus við þann stað...) En fyrst smá skemmtun. Ætla að kíkja á verð og úrval af GPS-tækjum í bænum. Betra að hafa eitt slíkt til öryggis ef ég fer að þvælast e-ð ein á fjöll í sumar. (Og til að friða fjölskylduna.)

Enn eitt netprófið...

You Should Date An Australian!

You're a down to earth, outdoorsy kind of girl

And you need a guy who can keep up with your adventures

A rugged Austrailian guy is just your style

Better start learning how to surf!



Which Foreign Guy Should You Date? Take This Quiz :-)
Find the Love of Your Life
(and More Love Quizzes) at Your New Romance.

Ég er nú alveg viss um að það er líka til e-r íslenskur sem uppfyllir þessar kröfur. Það væri líka einfaldara, þá þyrfti ég ekki að læra að sörfa.
Og svo væri nú betra að hann ætti afmæli í maí líka, svona til að fitta inn í fjölskylduna. Góðar ábendingar vel þegnar. (Nehhh, bara að djóka!)

Dagurinn í dag er e-ð frekar súr. Sit vaktina þessa vikuna. Er að reyna að hafa mig í að fara í Mýrdalsjökulskjálfta dagsins. Ekki alveg uppáhalds...

Þar sem ég lá í sófanum á föstudagskvöld, alveg við það að gefast upp fyrir syfjunni, byrjaði myndin Donnie Darko. Og hvaða lag haldiði að þeir hafi valið í byrjun myndarinnar? Killing Moon. Mér fannst það alveg nógu góð ástæða til að sækja vökustaurana og horfa á alla myndina. Nú, næsta kvöld sýndu þeir High Fidelity (topp fimm). Og haldiði að þeir hafi ekki talað um lagið þar líka! Skrítið. Ætli ég taki e-ð sérstaklega eftir þessu af því það er í uppáhaldi? Veit ekki.

Ég er að sjálfsögðu búin að næla mér í miða á tvenna tónleika í maí, Kraftwerk og Pixies. Að því tilefni hefur Krafwerk-Computerwelt verið í spilaranum síðustu daga. Sökum leiðinda blankheita verð ég að bíða með að kaupa Tour-de-France diskinn þeirra.

Hjólaði í vinnuna í gærmorgun. Í Garðabænum brá mér heldur betur í brún þegar betri bremsan virkaði ekki. Vírinn í framhjólsbremsunni hafði tæst í sundur og hangir nú saman á bláþræði. Úúúú, ætli e-r sé að reyna að ráða mig af dögum? Þessi ferð var mér dýrkeypt því ég held að mér hafi líka tekist að gera gat á afturdekkið. Þar að auki tókst mér líka að ofteygja nárann og meiða mig í bakinu með rykkjunum og teygjunum í dansinum í gær svo ég var orðin ansi örg í gærkvöldi. Suma daga gengur bara allt á afturfótunum.

PS. Þetta er ömurlega leiðinlegt blogg, æi læt það samt fara...

Þetta er nú meira hel..... kjaftæðið:

You're Colombia!

You do a lot of drugs, and these have kind of distorted your view of
reality, to the point that everyone looks like an enemy.  You keep trying to restore
order over your schizophrenic world view, but you don't even know which goal is your own
and which is someone else's.  You're pretty sure someone needs to be punished for all
this, but who that is changes all the time.  Things would be a lot better for you if
you switched to coffee, or even to decaf, but all this money would be hard to give up.

Take
the Country Quiz at the href="http://bluepyramid.org">Blue Pyramid

Bretta upp ermarnar, taka sér tak og setja lífið á "hold"?

Já, ég vaknaði upp í morgun með þennan líka svakalega kvíða-hnút í maganum. Ástæðan var að öllum líkindum sú að mér hafði boðist að koma með í gönguskíðaferð upp á Fimmvörðuháls/Eyjafjallajökul og ég var búin að ákveða í gærkvöldi að fara. Það er bara ekki hægt að missa af svona tækifæri, sérstaklega þar sem lítil von er á skíðaferðum annars staðar en uppi á jökli. Nú. Ég áttaði mig sum sé í morgun. Alger fásinna að vera að hlaupa upp á fjöll, sér í lagi þar sem ákvað fyrr í mánuðinum að sleppa helgarferð til Gerðu í Árósum og tónleikum Einstürzende NeuBauten til að geta tekið mig á í greinalestri. Þetta er spurning um að taka sér tak, ganga í verkefni sem allt of lengi hefir setið á hakanum og njóta lífsins síðar. Bara nákvæmlega það sem stóð í stjörnuspá minni fyrir vikuna. Og hver segir svo að þessar spár séu tómt kjaftæði? Það er bara eins gott að mikið verði lesið um helgina. Yeah, on with the butter!

Það er allt útlit fyrir að ég fari ein á Pixies í maí (og e.t.v. Kraftwerk líka, ef ég verð svo heppin að fá miða). Á ég e-a vini sem ætla og ég fæ að fljóta með? Það væri nú mun skemmtilegra :-(

Fleiri tónleikar

... Og Violent F. ætla að spila hér 22.apríl. Eða það las ég a.m.k. í blaðinu í gær. Asssk. Hef ekki efni á því líka. Af hverju þurfa allir þessir tónleikar að vera á nær sama tíma? Af hverju fæ ég ekki stóra vinninginn í HHÍ núna?

Rembingur

Sat í gærkvöldi við sjónvarpið og heyrði þá auglýsingu frá Nóatúni þar sem þeir buðu mér að ,,verzla'' íslenzkar vörur á sérlega hagstæðu þjóðarrembings-verði á íslenskum dögum. (Ég fer líklega ekki alveg rétt með hér, man ekki nákvæmlega hvernig þetta var orðað eða hvar þjóðarrembingurinn kom inn í.) Ég get nú bara ekki setið á mér og ætla að vera með smá hreintungu-, málræktarrembing hérna: Mér finnst þessi verzlun ætti að ráða textahöfund fyrir auglýsingar sínar sem getur a.m.k. komið hlutunum rétt út úr sér. Við ,VERZLUM ekki vörur í Nóatúni eða neins annars staðar, við KAUPUM þær. En ég get vel verslað í búðum eða við kaupmennina og þá er ég nú yfirleitt að kaupa e-a vöru. Ég keypti mér t.d. buxur á föstudaginn var, en ég verzlaði þær ekki. Nei, nei.
Þurfti bara að koma þessu til skila, þótt það sé nú reyndar vita gagnslaust að tuða þetta hér.

Yfir bænum liggur svo svört þoka að varla sér milli húsa. Ég vissi að rjómablíðan myndi ekki endast. Vissiða.

Fyrstu vordagar

Eftir gífurlega leiðinlegt og langvarandi drulluveður er sólin farin að skína á ný og Kári vonandi farinn í langt frí suður í lönd! Í gær var rjómablíða. Ég hafði hugsað mér að drífa skattaskýrsluna af en ákvað að drífa mig fyrst út í góða veðrið, af ótta við að það entist ekki lengi. Fór í langa fjöruferð. Gekk með Ægissíðunni og út fyrir Suðurnes og Seltjarnarnes. Ég skrapp líka út í Gróttu þar sem svo heppilega vildi til að það var að fjara út. Veðrið gat ekki verið betra, allt svo fallegt, flugurnar lifnaðar við í þaranum í fjörunni, tjaldar og lóuþrælar og sendlingar á vappi í fjöruborðinu, fullkomið.

Á laugardag, svo við tökum þetta afturábak, var einsetukonan búin að fá meira en nóg af sjálfri sér. Áttaði sig reyndar ekki alveg á því fyrst. Skildi ekkert í því að hún nennti ekki einu sinni að sauma sér til skemmtunar. Já, það er víst nauðsynlegt að fara öðru hverju út á meðal fólks (ekki bara í vinnunna). En einmitt þegar ég þurfti á e-m að halda var bara engin vinkvenna minna heima. Skrapp þá bara í bæinn. Kom svo við hjá vinkonu að kíkja á mánaðargamla dóttur og færa henni gjöf. Sú litla er alveg ógurlega mikil rúsína. Ég meina, ég er nú alls engin barnagæla en gæti alveg hugsað mér að eiga þessa litlu, eða svona næstum því. Hmm, ætli aldurinn sé farinn að segja til sín? Dreif mig svo aftur inn í Rvk í heimsókn til Berglindar og Evva, þar sem við borðuðum EldsmiðjuPizzu með bestu lyst og horfðum á 28 days later og Monster's Ball. Sú seinni var alveg ægilega hæg miðað við þá fyrri (en góð samt). Maginn var kominn í einn rembingsspennuhnút eftir þá fyrri, en ég mæli með henni. Við horfðum á einn Friends þátt á milli til að trappa okkur niður.

Það er ekki mikið útlit fyrir skíðasnjó um páskana. Fékkk þó aðra hugmynd í gær. Það væri líklega vel hægt að fara á Hvannadalshnjúk eða upp á Fimmvörðuháls og áfram á Eyjafjallajökul. Jafnvel að renna sér e-ð á skíðum þar. Eða að ganga Reykjaveginn einu sinni enn. Eitt er víst. Ég ætla ekki að sitja ein heima á rassinum alla páskana (eins og í fyrra úti yfir skólabókunum). Nó sörí.

He's a jolly good fellow...

Cave-Murder Ballads í spilaranum. Æi, var bara e-a hluta vegna í skapi fyrir Crow Jane í morgun. Ætli það sé ekki veðrið?
Iggi Pop og Peaches poppa svo upp með kick it og mig langar að taka léttan hopp-dans. Reyni að halda aftur af mér, enda í vinnunni!

Ég hafði gaman af að lesa frásögn Magga um öryggistékkið á tilrauninni hans. Haha. Og mér varð hugsað til Kalla og félaga af íslenskri rannsóknastofnun sem fóru síðasta haust að gera bylgjubrotsmælingar fyrir húsgrunn stórverksmiðju sem á að rísa úti á landi. Nú. Amerískt fyrirtæki sér um eftirlit með framkvæmdum og þar með öryggismál. Íslenskir starfsmenn fyrirtækisins (eða undirverktaka) tóku amerísku kröfurnar svo bókstaflega að það var bara hreint orðið mælingamönnum til mikilla trafala. Menn áttu að bera með öryggishjálma alltaf við mælingarnar á vandlega afgirtu framkvæmdasvæðinu. Samt voru allar stórvirkar vinnuvélar víðs fjarri. (Reyndar getur stundum orðið svolítið grjótflug við mælingarnar, en í mesta lagi hefur maður hlaupið í burtu i var fyrir sprengingu og borið hendur fyrir höfuð sér til öryggis.) Svo urðu allir mælingamenn að vera með öryggisgleraugu alltaf, jafnvel við að setja niður geófónana, sem er nú með öllu hættulaust. Þeir gáfust fljótt upp á gleraugunum enda sáu þeir ekki neitt sökum móðu og bleytu sem safnaðist á gleraugun á augabragði í rigningunni. Það er ekki mikið öryggi í því að útbúa sprengju án þess að sjá rassgat fyrir öryggisgleraugum. Þegar eftirlitsmaðurinn kom svo að mönnum gleraugnalausum varð hann trítilóður og skammaðist. Þetta er nú bara enn eitt dæmið um það þegar staðlaðar reglugerðir ganga langt út fyrir allt sem skynsamlegt er, og algerlega þvert á upphaflegan tilgang.

Titill færslunnar? Lag vikunnar. Um helgina reyni ég að ná fyrstu þremur gripunum í bókinni.

Leiðrétting: Skýringin er komin á hinni fullkomnu tröppufallshegðun úrkomumælisins: Hann núllstillist á miðnætti. Auðvitað. Úrkoma alltaf mæld sérstaklega fyrir hvern sólarhring. Ég er nú meiri kjáninn. En þetta lítur vel út á skjánum!!!

Tuð um veðrið

Ég er löngu búin að fá mig fullsadda á þessu veðri. Það jákvæða við það er reyndar að það er tilvalið að sitja inni og vinna/læra. Alltaf gott að sjá ljósu punktana í tilverunni. Það er reyndar heilmikil fegurð í veðrinu. Ég fylgist reglulega með veðurtölunum úr mælireitnum fyrir utan, þar sem ég er svo heppin að hafa skjáinn við skrifstofudyrnar. Þrýstingsferillinn var ótrúlega flottur í gær (og reyndar líka um daginn). Hann hafði nær fullkomna lögun ferils sem mætti kannski lýsa með y=(1+x*x)íveldinu-m (m=1,2,3 hér um bil). Úrkomuferillinn í gær og í dag er svo tröppufall með tröppu á miðnætti. Ferillinn byrjar svo að rísa upp úr þrjú í nótt, okkur á SV-horninu til mikillar ánægju. Ég held þetta hafi litið nær eins út í gær. Það merkilega við þetta allt saman er að loftþrýstingurinn fer varla niður fyrir 1006HaPa þessa dagana. Við erum sum sé alls ekkert í djúpri lægð, eins og halda mætti af veðrinu. Ég ræddi þetta við veðurfræðingana í gær. Við erum hins vegar á milli tveggja lægða, yfir okkur liggur hæðarhryggur með þessum gífurlega vindstreng. Eða eins og e-r hér kallaði það: náttúruleg vindgöng.

Djöf...... drulluhali!

Ég skrapp út í Kringlu fyrr í kvöld til að kaupa mér e-ð í gogginn. Ætlaði mér að vinna e-ð fram eftir þar sem ég var loks komin í stuð. Ég fékk mér hressandi göngutúr í rokinu, enda búin að fá nóg af mollulegu loftinu á skrifstofunni. Það er varla hægt að opna nokkra glugga fyrir rokinu. Nú nú, þar sem ég geng eftir gangstéttinni kemur e-r djöfulsins drulluhali á ofsaferð, gerir sér lítið fyrir og stefnir beint í vænan poll og eys yfir mig, og það var ekkert smá. Helvítis asninn, verst að hann heyrði ekki fúkyrðin sem ég sendi á eftir honum (#$!!!N&N... ARGHHH).

Neibb, þessi mánudagur var greinilega ekki minn dagur. Annars eru laugardagsmorgnar minn uppáhaldstími. Vaknaði eldsnemma síðasta laugardag, fyrir átta held ég. Dundaði mér við að skoða blöðin og eyddi godum tima i að spila nokkur einföld lög upp úr bókinni sem eg keypti. Er nú komin með óð til gleðinnar á hreint (svona næstum því) en er ansi klaufsk við að ná að plokka rétta strengi eða að lenda með mína klunnalegu putta á réttum stad. En ég hef gaman að þessu, er það ekki fyrir mestu? Verð kannski tilbúin í rafmagns-rythma-gítarinn eftir nokkur ár og almennilegt rokk. Ég myndi skemmta nágrönnum mínum þvílíkt með því. Haha.

Er að hlusta á Cleaning Women. Þetta er stórskemmtileg finnsk grúppa sem kom hingað á menningarnótt (?) fyrir tveimur árum kannski? Er ekki viss. Leiðréttið mig ef þið vitið betur. En þeir hafa sérstaka sviðsframkomu, spila á e-s konar þvottabretti eða -grindur klæddir kvendrögtum. Ég mæli með Ricewestern, Za Bounakh, Delay, Speed-O-Machina og sidast en ekki sist Clean up Your Body af plötunni Pulsator.

Uppáhalds

Ég brá mér í Skífuna í síðustu viku. Ég hafði gert stuttan lista yfir það helsta sem mig langaði að kaupa og ætlaði að tékka á útsölunni. Ég endaði með því að kaupa þrjá diska (enginn þeirra á innkaupalistanum):
Jet Black Joe
Police, the classics
Bang Gang (þann nýja)
Ég hafði takmörkuð fjárráð og varð að stoppa þarna. Franz Ferdinand, Jet, Ske, Talking Heads, Echo and the Bunnymen, Air-Talkie Walkie og fleiri verða að bíða betri tíma. Leaving here með FF finnst mér alveg stórgott lag, fæ líka enn fínt "kikk" af því að heyra Jet-are you gonna be my girl. Annars er eitt lag búið að vera í uppáhaldsuppáhaldi síðustu tvær/þrjár vikur. Það er Killing Moon með E.and the B. Frábært lag, svolítið rómantískt og þunglyndislegt um leið (góð blanda o'ní mig). Held líka upp á PJ Harvey-This is love og ohhh annað sem ég get bara ekki munað hvað heitir í augnablikinu (af plötunni Stories from the City, Stories from the Sea). Bæti líka við hér Cult-Wildflower, Fire Woman, Ciao baby o.fl. Fékk þetta allt saman frá broþar um daginn. Er farin að hlakka til að kynnast FF betur, þegar ég eignast diskinn.

Hálfónýtur sunnudagur

Ég fór á árshátíð í gær. Ballið stóð ekki til nema tvö og ég slóst með í för sprækra vinnufélaga sem ekki voru búnir að fá nóg af djammi og dansi. Við fórum niður á Laugaveg og ég fór ekki heim fyrr en rétt fyrir sex í morgun. Það var bara svo gaman að dansa á 22 að það var bara ekki hægt að fara heim fyrr, þótt skórnir sem ég var í væru að drepa mig (ég tók reyndar ekki eftir þvæi fyrr en ég var hætt að dansa og komin út af staðnum). Dagurinn í dag var því hálfónýtur. Ég píndi mig til að sofa til hálf-tvö (það er erfitt fyrir suma að sofa svo lengi fram eftir og gerist ekki oft á ári). Ég fór á fætur hálftuskuleg og dreif mig í góðan tveggja tíma göngutúr um Hafnarfjörð. Fór upp að Flensborg, niður leynistíg af Hamrinum, yfir í Vesturbæinn í gegnum Hellisgerði, ýmsa króka niður að sjó við Herjólfsgötu og svo frv. Ég gekk fram á brúðarpar í myndatöku í Hellisgerði. Reyndi að trufla sem minnst og tók krók fram hjá þeim. Sama parið var svo mætt í fleiri tökur í fjörunni við Sundhöllina. Sniðug hugmynd, rammíslenskt og voða rómó. Það vantaði bara þurrkhjallana með harðfiskfökunum í baksýn. Ég lét hugann reika og hugsaði með mér að kona á faldbúningi og skinnskóm, með sóleyjavönd tæki sig líklega ekkert verr út á mynd þarna í fjöruborðinu en stúlkan í hvíta brúðarkjólnum með rauðu rósirnar. Alltaf gaman að láta sig dreyma.

Hitt og þetta

Afi Þórður kvaddi á laugardaginn var. Hann var ekki búinn að liggja lengi á líknardeild og hrakaði mjög hratt undir það síðasta. Ég hafði heimsótt hann í sömu viku, á 91 árs afmælinu. Það er erfitt að horfa upp á sína nánustu veslast svona upp og sjá lífið fjara út. En það hefur hver sinn tíma. Ég sat hjá ömmu um helgina og hélt henni félagsskap. Ég sótti bollur á sunnudag fyrir okkur og við duttum ærlega í bolluát, eða ég öllu heldur. Á mánudag þegar ég kom við hafði hún eldað baunasúpu, ömmu súpa er alltaf best. Ég slapp því við eldamennsku það kvöldið, sem og flest önnur kvöld.

Það er ekki útlit fyrir að ég komist út á neinar ráðstefnur þetta árið. Niðurskurður í utanlandsförum. Svolítið svekkt, en það minnkar þá bara stressið. Ég reyni bara að sækja um að fara næsta vor, þá ætti ég að vera komin með allar niðurstöður og í þann mund að klára. Stefni þá bara á jarðfræðaráðstefnuna hér heima í maí þetta árið. Svo verður Raunvísindaþing haldið í nýja Náttúrufræðahúsinu í apríl og ég er búin að sækja líka um að hafa seminar á Norrænu í apríl. Það er því nóg af stress-verkefnum framundan.

Ég faldaði toppinn í gær og setti inn tvær myndir (að ósk Stínu). Þetta var skemmtilegt verkefni, en því miður eru myndirnar afleitar, fékk ekki almennilega fyrirsætu í myndatökuna. Sorrý! Er nú farin aðeins að pæla í hvað ég geti gert við fullt af fínu svörtu efni sem ég keypti þegar gömul vefnaðarvöruverslun í Austurstræti hætti fyrir nokkrum árum. Á alveg nóg í síðan svartan sparikjól. Var að pæla í túrkis og broslituðum útsaum og pallíettum. Er samt hrædd um að það verkefni verði að bíða betri tíma.

Þjóðlegir réttir

Eftir ærleg hádegisátök þurfti ég á nóg að próteinum að halda. Sit því hér og treð í mig köldum hrognum, kartöflum og steiktum þorski, sem pabbi sendi mig heim með í gær. Ég var svo heppin að vera
boðin í mat. Og reyndar í kvöld líka, til Bergrúnar. Þvílíkur lúxus, og á meðan safnast ekki upp óhreint leirtau heima. Sólin er farin að skína aftur eftir síðustu rigningardaga. Frost og þunn, hvít föl yfir öllu. Svona aðeins meira í takt við árstímann. Helgin framundan. Lífið barasta alveg bærilegt, held ég.

Tímaskortur

Ég var e-ð ægilega lúin þegar ég kom heim í gær. Rétt náði að setja í vél áður en ég datt í sófan og nærri sofnaði yfir veðurfréttunum. Ég var rétt að festa blund þegar Ella Sigga kom í heimsókn. Settum upp netdagbók fyrir hana svo nú getum við hinar fylgst með ævintýrum hennar í Ítalíu, hún fer út á föstudag.
Ég var e-ð upprifin þegar ég fór loks í rúmið um niðnætti. Var rétt búin að leggja höfuðið á koddann þegar ég fór að fá hugmyndir að hinu og þessu, aðallega e-r saumaverkefni. Hvenær á ég eiginlega að hafa tíma fyrir þetta allt? Ég fæ reyndar svona tímabundna dellu af og til. Sökkvi mér niður í e-ð í nokkrar vikur, missi svo áhuga á því aftur einn daginn og stend upp frá hálfkláruðu verki. Sem betur fer eiga mínar dellur "comeback". Saumadellan á sum sé comeback núna. Og prjónadellan. Skrautskriftardellan hefur því miður legið niðri allt of lengi, verð að fara að gera e-ð í því. Langar líka að hitta vini mína oftar. læra að spila á gítar, ganga meira á fjöll og og og... Hjálp, mig vantar tvo aukadaga í vikuna. Gjarna frídaga!

Ella orðin bloggari!!!

Jæja, nú er Ella Sigga komin í Blogg-hópinn, bætti henni á listann hér til hliðar. Eigum ábyggilega eftir að "heyra" svaka krassandi sögur frá Ítalíu á næstu mánuðum...

Slagveðursrigning

Uppsalabúar, stúdínur í Kantaraborg og aðrir sem hafa verið að kvarta yfir logni og of góðu veðri hjá sér undanfarið ættu að vera hér í drulluveðrinu á Íslandi núna. Eðal-, íslenskt rok og rigning og alltof hlýtt miðað við árstíma. Snjórinn orðinn að krapi og fossandi lækjum uppi á fjöllum og ekkert hægt að skíða. Á laugardagskvöldið síðasta næddi svo um húsið heima að ég hélt að allt ætlaði um koll. Dreif mig í úlpu og setti á mig húfu og rauk út til að athuga hvort það væri stætt. Það var ansi hvasst er ég gekk fyrir hornið í vindinn, enda strengur milli húsanna. Uppi á vellinum var þetta hins vegar ekki jafn slæmt og ég hafði búist við. Líklega einhverjir 15m/s. Ég ákvað nú samt að færa Móa litla í skjól undir húsvegg, bara svona til öryggis.

Annars kætti það mig mikið að heyra að Kraftwerk ætlar að koma og spila í byrjun maí. Það er því nokkuð ljóst hvað ég fæ í afmælisgjöf frá sjálfri mér þetta árið!!!

Rautt flauel, bleikt flauel, blátt flauel og svart, og allt rifflað...

Ofangreind fyrirsögn lýsir helginni í hnotskurn. Ég sat við saumavélina nærri alla helgina og saumaði. Er í e-u stuði núna. Ég byrjaði á að klára á laugardagsmorgni skokk sem litla dóttir Dóru vinkonu á að fá, en hún fæddist einmitt þann morgun. Svo réðist ég loks í að klára rauðar flauelisbuxur sem ég saumaði reyndar í haust en nennti aldrei að klára. Jú, tvinninn var reyndar búinn. Ég gerði hnappagat og festi á hnapp og dreif mig í þeim í vinnuna í dag. Þær eru Eeeeldrauðar og eiginlega of víðar. Ég sé að ég þarf að setjast við saumavélina í kvöld og setja á þær beltislykkjur og þrengja. Allt sem ég sauma á sjálfa mig verður alltaf a.m.k einu númeri of stórt, sem þýðir helmingi meiri vinnu í allt. Nú, nú. Ég sneið líka topp úr svörtu riffluðu flaueli sem ég átti og fína Hong-Kong silkinu sem Stína gaf mér fyrir saumaskapinn í desember. Er búin að sauma bútana saman og þarf nú að fara að kaupa rennilás, fóður og spangir. Ég átti rétt nóg af bleika silkinu til að hafa í fram og bakstykkin. Hliðarstykkin fjögur eru úr flauelinu. Svo datt mér í hug að kaupa dökkbleikar pallíettur eða e-ð annað til að sauma líka á flauelið, til að hafa hann svolítið skrautlegri. Bara hugmynd. Ég rétt kíkti út á laugardag til að kaupa tölur. Freistaðist líka til að kaupa bút af röndóttu flaueli á helmingsafslætti. Fannst það bara flott. Sé til hvað verður úr því.

Kosningar!

Síminn hringdi áðan. Ég hélt að ég væri að fá e-r slæmar fréttir og fékk sting í magann. Þá var þetta bara e-r frá Vöku að minna mig á kosningar í Háskólanum og bjóða á kosningavöku á Pravda. Huhh. Mér gæti ekki staðið meira á sama. Hef nú um nóg annað að hugsa.

Alvarleg ritstífla

Er haldin slæmri ritstíflu. Þetta hefur komið fyir áður. Eftir að hafa setið í þrjá tíma fyrir framan auðan skjáinn setti ég Rammstein í tækið. Og bara allt af stað. Held þetta virki ekki núna. Þar eð ég er að skrifa á ensku. En ég er þó komin af stað. Með The Cult., Echo and the Bunnymen (the Killing Moon). Mæli með þessari meðferð. Varist bara að lögin leki inn í textann...
...crosscorrelation of waveforms, yeah yeah, ciao baby....
the study area has been divided into fifteen killing killing boxes....
Ha ha, kannski bara fyndið?

Enn eitt netprófið:

How evil are you?

Hannyrðir, kjetát og skíðagöngur

Ég mætti seint á þorrablótið á föstudag. Var samt búin að safna saman gleði-tónlist til að spila ef fólk yrði í dansstuði. Ég bjóst við að koma í rífandi stemningu og gleði. Hmmmm. Það var e-r bjartsýni. Það vantaði stuðliðið. Flestir voru farnir og þeir sem eftir sátu nenntu ekki einu sinni að dansa við harmónikkuspil Þórðar. Ég fór því fljótlega aftur.
Á Laugardag ríkti baðstofustemning heima. Ég sat öðrum meðin við stofuborðið og saumaði, Þorsteinn sat á móti mér með tölvuna sína og tók saman fjöldann allan af lögum sem síðan voru brennd á disk. Nú er ég loksins búin að eignast Cult-Wildflower og fleira gott sem bara var til á vínyl-plötum heima. Öngvan hef ég plötuspilarann. Undir hljómuðu níunda-áratugs poppslagarar. Um kvöldið fór ég með þeim Söru í þorramat vestur í bæ. Ég át yfir mig að hangikjeti og uppstúfi, fékk mér nokkra hákarlsbita fyrir ónæmiskerfið og við sátum og töluðum fram að miðnætti.
Skíðaganga helgarinnar hófst að þessu sinni uppi í Heiðmörk. Þar var fullt af fólki á skíðum. Fór líka upp í Bláfjöll og gekk vanalega hringinn. Það var ansi kallt. Ég var a.m.k. orðin illa köld þegar ég kom heim og lá hálftíma í baði til að ná í mig hita. Fór svo loks í mat til pa og horfði að sjálfsögðu á Nicolai og Julie. Ég er búin að bíða spennt eftir framhaldinu. E-a hluta vegna hélt ég í síðustu syrpu að þau næðu saman aftur. Mér líst ekkert á verðandi barnsföður Julie. Hmmm. Og hvenær ætla þeir svo að klára Beðmálasyrpuna sem þeir hættu að sýna fyrir jól? Er sjónvarpið hætt við þetta allt saman?

snjór

Í nótt snjóaði hér á Suðurlandinu. Sem og síðustu nótt. Hér er því allt á "kafi" í snjó. Mæni á fannhvita breiðuna fyrir utan og óskaði þess að ég væri uppi á fjöllum á skíðum.


Ég á von á helgargestum á Vallarbrautina í kvöld. Af því tilefni ákvað ég að elda (já!). Ég undirbjó 15 lítil hnetufuff í gær. Ég á því bara eftir að velta þeim upp úr eggi og hnetu/kókos raspi og steikja. Með verður sveppasósa, sams konar og mér tókst að sletta lengst út á stofugólf síðast þegar ég hafði matargesti fyrir jól. (Að þessu sinni mun ég ekki þykkja sósuna með sjóðandi vökva.) Ætli ég kíki svo ekki á þorrablótið hér á VÍ. Ætli það verði dansað jafnmikið og lengi og á októberfest fyrir jól?

Handlagin húsmóðir?

Ég er alveg hætt að prjóna. Ég er a.m.k. ekki tilbúin með neitt til að færa barni vinkonu minnar, sem von er á á föstudag. Hér áður fyrr notaði ég hvert slíkt tilefni til að koma út prjónaflíkum mínum. Ég fór því í Virku í gær og keypti tvenns konar efni til að sauma skokk á barnið (veit það verður stelpa). Það ætti ekki að taka langan tíma. Ég keypti líka garn í peysu. Fékk nefnilega góða hugmynd og langar að útfæra hana. Svo hefur mér fundist ég eyða allt of miklum tíma við sjónvarpið. Ég ætla að hafa það að reglu hér eftir að ég verði helst að gera e-ð í leiðinni. Hér eftir verður það því skylda að prjóna í sjónvarpsletiköstum. Og það er bara hreint ótrúlegt hvað hægt er að afkasta þannig. Og tímanum er ekki kastað á glæ!


Í gær tók ég mig líka til og hengdi upp kertakrónu upp í herbergið mitt. Hingað til hefur hún legið á gólfinu inni í stofu. Ég sótti tröppurnar niður í geymslu og stóð svo með vasaljósið í kjaptinum og reyndi að aftengja rússnesku ljósakrónuna sem hangir þar. Ég þurfti nefnilega að koma vírunum í gegnum dós sem ég skrúfaði í loftið. Það var hægara sagt en gert. Þeir hafa verið með e-t nýtt "system" á víratengingunum í stað gömlu hvítu tengjana (krónutengi?). Það tók mig óratíma að smella þeim í sundur til að geta losað vírana. Sérstaklega þar sem ég var hætt að sjá nokkuð til því vasaljósið lognaðist út af. En þetta hófst allt saman að lokum og ég er reynslunni ríkari.


Ég er svona aðeins farin að huga að snemmsumarleyfi ársins. Ætla að fara í lok maí til Englands og ferðast um með mömmu í svona 10 daga. Það er því borin von að e-ð bætist við á kortið hjá mér. Ég verð nú að segja að það er hálftómt hjá mér, 4% er fremur slök frammistaða. Mig langar mikið til að bæta Grænlandi á listann, og Færeyjum. En ég býst við að ég komist varla lengra en til Vestmannaeyja í ár, fyrir utan England, auðvitað.



create your own visited country map
or write about it on the open travel guide

Léleg frammistaða

Síðasta mánudag skrifaði ég langa færstu um stórskemmtilega skíðaferð frá Hellisheiði inn í Innstadal, þar sem við hittum skíðakappa sem hafði á sínum yngri árum keppt í heimsmeistarakeppninni og bókstaflega flaug áfram skautandi yfir ísbreiðuna. Því miður tapaðist allt sem ég hafði skrifað þegar ég ýtti á "Post" hnappinn. Ég nennti ekki að færa það allt inn aftur. Var annars á fullu alla síðustu viku við að klára hitt og þetta fyrir fundinn á föstudag. Vakti tvisvar fram á nótt við undirbúning. Það er nú bara fastur liður fyrir erindaflutning. Nú nú. Ég varð auðvitað yfir mig stressuð, byrjaði á að mismæla mig og varð bara eins og hálfviti. Gleymdi samt að líta á blöðin sem ég hafði í höndunum og romsaði þessu e-n veginn út úr mér. Fannst ég svo ekki geta horft framan í nokkurn mann eftir á af skömm. Ohhh. Var svo sagt eftir á að þetta hefði bara verið allt í lagi. Ég ákvað því að taka gleði mína á ný og fór með hópnum út að borða. Fékk svona líka nammi nammi mat hjá Einari Ben. Kíktum svo fjögur saman á Næsta bar.
Þrjár andvökunætur og áfengi fara ekki vel með kroppinn og ég var eins og aumingi á skíðunum á laugardeginum, máttlaus og komst varla úr sporunum. Og þrátt fyrir æðislegt veður í gær fór ég ekki lengra út úr húsi en rétt út á svalir til að dusta rykugar mottur og afþurrkunarklúta. Dagurinn fór sum sé í tiltekt og þrif þar sem ég hef algerlega vanrækt allt slíkt síðasta mánuðinn! Það er orðið aðeins huggulegra heima núna, og eftir smá meiri tiltekt ætti ég að geta tekið á móti gestum án þess að skammast mín.

Bjór, hamborgari, bjór, skíði, fusion...

Já, ofangreind fyrirsögn lýsir helginni í stuttu máli. Endaði niðri í kjallara eftir ágætis dagsverk á föstudaginn. Fékk mér einn írskan og endaði svo með þremur samstarfsmönnum í hamborgara á Kringlukránni um hálf-tíu. Stefnan hafði reyndar verið tekin á Hard Rock, en þar var vonlaust að fá borð vegna þess að þeir voru með stórt tjald og sýndu Idol í beinni. Ég missti því af úrslitunum. Ók svo heim í blindbyl og sá ekki bofs á köflum. Spennandi, samt. Nú, nú, laugardagurinn? Út að moka frá bílnum. Þvo þvott og annað jafn skemmtilegt. Þar til ég fór á hátíðarfund MOBS í Skólabæ. Fundurinn var rólegur. Ég fór heim fyrir miðnætti og beint í rúmið, enda ætlaði ég mér á skíði í dag. Í Bláfjöllum var lokað. Endaði því í skógarskíðagöngu í Heiðmörk. Þar var frekar margt um manninn. Eldaði svo "fusion"-mat þegar ég kom heim. Saknaði mömmu litlu. Ég ein heima með fullt af mat. Hún sennilega ein líka úti í Kantaraborg, kannski líka með fullt af mat. Óskaði þess að ég væri "norn" (þið vitið, eins og í sögunum um Harry Potter) og gæti bara birst si svona inni í stofu hjá mutti með kjúklinginn og kúskúsið og spínatið og hitt. Já, það væri nú sniðugt...

Stress, stress og meira stress

Ohhhh, ég er orðin frekar stressuð. Þarf að kynna niðurstöður/stöðu verkefnisins á fundi í lok mánaðarins, tala á ensku yfir vísindamönnum héðan og þaðan. Tvær ráðstefnur í apríl og kannski út í haust líka. Og á að vera búin með mest alla vinnuna og skila af mér niðurstöðum í sumar. Og þarf aldeilis að fara að herða róðurinn. Sj...!!! Af hverju í ósköpunum valdi ég mér starf þar sem ég þarf sífellt að vera að koma mér á framfæri og ota mér áfram? Ég er heimsins versti fyrirlesari og verð bara gríðarlega stressuð ef ég þarf að segja tíst fyrir framan hóp manns og ég veit ekki hvað. Lélegur nemandi og vísindamaður og langar bara að pakka saman núna og hætta við allt saman áður en ég geri mig að algeru fífli :-(

Ný íþrótt

Vindurinn gnauðaði við gluggann. Vaknaði í nótt og varð að loka til að fá svefnfrið. Klukkan hringdi allt of snemma. Mig langaði ekki á fætur. Kúrði aðeins lengur. Þegar mér tókst loksins að druslast á lappir drollaði ég og drollaði því mig langaði ekkert út í kuldann og í vinnuna. Allt eitthvað svo erfitt og óyfirstíganlegt. En... ég ætla nú að hressa mig við í dag og gera nokkuð sem ég hefi ætlað mér í mörg ár: að prófa skylmingar. Sé svo til hvort ég taki þetta fram yfir dansinn (ég tími nú varla að sleppa honum, þrátt fyrir misglæsileg tilþrif).

Skíðahelgi

Hó, hó. Smá tíst eftir langt hlé.
Annan í nýári skrifaði ég langa færslu um flutinga og áramótagleði en tókst klaufalega að tapa henni. Líklega var ég utan við mig sökum þreytu og svefnleysis. Já, ég fékk sum sé jólakvefpestina á annan í jólum, mætti í vinnuna um jólin og helgina á eftir, flutti út úr íbúðinni og þreif á gamlársdag og dansaði með Gerðu Björk og vinkonu hennar í Iðnó til sex á nýársnótt. Nei, í minni fjölskyldu láta menn ekki stíflað nef og smá slappleika hafa af sér svona skemmtun. Það var stórgaman, hitti líka hina og þessa sem ég hef ekki séð lengi, m.a. hana Rósu, bekkjarsystur mína úr MR, nokkta bekkjarbræður og núverandi og fyrrverandi vinnufélaga.
3. janúar hittist saumaklúbburinn svo hjá Arnþrúði í Hafnarfirðinum og raðaði í sig sex rétta máltíð með erfiðismunum.






Síðan voru skemmtistaðirnir í Rvk kannaðir. Enduðum á Sólon. Ég gafst upp rúmlega fjögur og ók heim. Held það sé bara ágætt að ég fari svona sjaldan á næturrölt. Tvær ferðir fram á morgun með þriggja daga millibili voru eiginlega of mikið. Ég á nefnilga ægilega erfitt með að sofa lengi út og finnst synd að missa af bjartasta tíma dagsins. Þarf því svolítið lengri tíma á milli til að ná úr mér þreytunni.


Um helgina dreif ég mig á skíði. Á laugardag bauð ég pabba með mér upp í Bljáfjöll. Pabbi hefur ekki stigið á skíðin sín í, ja, 12-13 ár. Ég stakk hann af uppi á Heiðinni háu. Sagðist ætla smá útúrdúr. Þegar Þangað var komið sá ég að lengri brautin lá þar upp að svo ég ákvað að fylgja bara henni, ætlaði svo að ná pabba þar sem brautirnar liggja aftur saman. Kom að bílnum og beið líklega í klukkutíma. Var orðin ansi hrædd, enda komið él, og var viss um að hann væri að leita að týndri dóttur uppi á heiðinni. Var búin að spyrja hina og þessa hvort þeir hefðu séð pa. Spennti loks aftur á mig skíðin og lagði af stað í björgunarleiðangur. Ég var ekki komin langt frá bílnum þegar pabbi birtist. Hann hafði þá líklega valið stærri hringinn og var örmagna, hafði ekki einu sinni rænu á að skipta um skó, ganga frá skíðunum eða vera reiður. Og ég lofaði að passa betur upp á hann næst!!!


Í gær ákvað ég svo að fara með Ferðafélaginu, í von um að komast e-ð lengra. En menn töldu ólíklegt að nægur snjór væri uppi á Hellisheiði eða í Henglinum svo ákveðið var að fara upp í Bláfjöll. Við tókum þar e-a útúrdúra svo þetta varð bara ágætisferð. Er svolítið lúin og löt í dag, með smá harðsperrur í rassinum, enda langt síðan ég steig á skíðin síðast. Stefni á að koma mér í fínt skíðaform svo ég geti farið í almennilega páskafer í ár. Er strax farin að hlakka til!!!

Nú er úti veður vont, verður allt að drullu - allt á fullu!

Hæ, hó.
Svartasta skammdegið. Rigning og rok. Mín beið hrina að vinna úr (Reykjaneshrygg) þegar ég kom í vinnuna í gærmorgun. Víííí. Búið að vera rólegt á vaktinni hingað til.

Er nú búin að skila af mér öllum jólabögglum sem ég kom með frá Uppsölum. Er annars sjálf á síðust stundu með allt. Ekki búin að skrifa á eitt einasta jólakort, á eftir að redda einni og hálftri jólagjöf og taka til og pakka og ég veit ekki hvað. Vildi að ég hefði meiri tíma. Í bjartsýniskasti í gærkvöldi ákvað ég að fara að föndra jólakort. Veit svo sem ekki hvenær ég ætlaði mér að ljúka við þau, í nótt kannski? Áttaði mig og keypti tvo pakka af miklu flottari kortum.

Hmm. Gleymdi að segja ykkur frá skemmtilegri bíóferð í Uppsölum. Ég fékk Jóhírisi með mér á Love Actually. Við vorum báðar ansi svangar og ákváðum að fara á McDonalds hinum megin götunnar, eftir að hafa keypt bíómiðann. Þar var löng röð, og við sáum ekki fram á að geta troðið í okkur kjúklingaborgurunum á nógu skömmum tíma þannig að við pökkuðum öllu niður í bakpokann minn og laumuðumst með matinn inn í bíóið. Þeir ætluðu aldrei að slökkva ljósin, og loksins þegar það var gert og ég fór að laumast í pokan angaði allt af matarlykt, lúffurnar mínar lika. Held að sessunautur Jóhírisar hafi verið hálf-hissa á þessu uppátæki (Sviar geta verið svo "ferkantaðir" og leiðinlegir), líklegra þó að hann hafi öfundað okkur af matnum. En myndin var fín og við komum með bros út að eyrum. Ég á eftir að horfa oftar á þessa mynd.

Mér finnst á lyktinni á ganginum að það verði skata í hádeginu. Ætli ég geti fengið saltfisk eða nætursaltað í staðinn?

Og að síðustu: Gleðileg jól!

Jólahlaðborð, jólagjafir, jóla- jóla...

Ég held bara að jólahlaðborðið hafi tekist með miklum ágætum. A.m.k. var ekki annað að heyra á fólki. Við Stína og Mattías fórum í fyrradag í innkaupaferð, keyptum fullt af búsi og gosi og e-ð skraut líka. Það var nóg af öllu, mat og drykk, ég held menn hafi haldið veislu í dag líka, a.m.k. vorum við búin að fylla ísskápinn af afgöngum þegar við fórum í gærkvöldi. Enduðum sex saman á bar niðri í bæ. Prófuðum kokteilinn "Rauðu mylluna", og "snjóbolta" og komumst lika að því að fræga jafnan sem Einstein setti fram á sínum tíma er í raun uppskrift að drykk (já!), E=mc-í-öðru, og urðum auðvitað að prófa hann líka. Var ekki vitund eftir mig í dag og arkaði upp og niður Drottningargötuna í Stokkhólmi í leit að jólagjöfum. Varð e-ð ágengt. Alls ekki búin þó, held samt að allt pláss í ferðatöskunni sé löngu upp urið, svo ég klára þetta bara heima. Einn dagur eftir í afslöppun og svo er friðurinn úti.

Bis dann, boys!

Uppsalir

Kæru lesendur!

Þá er ég komin aftur til Uppsala. Eftir langa og ferð (hleðslutöf, ísingartöf, Óslóarstopp) lenti ég loksins á Arlanda flugvelli um rúmum klukkutíma á eftir áætlun. Tók lestina til Stokkhólms og hitti þar Stínu, Pálma, Jón Loga og Álfrúnu, og Helga, sem býr í Stokkhólmi. Ég læsti töskurnar inni í skáp og við röltum um borgina fram á kvöld.

Í gær var Stína búin að skipuleggja piparkökubakstur. Gömlu skólafélagar mínir, Jóhíris, Björn og Cedric komu í baksturinn. E-r stakk upp á að gera hús og það varð úr. Mjög skrautlegt lítið hús með jólatrám, jólaketti, hundi englum og meira að segja brunni fyrir framan húsið. Um kvöldið fór ég svo með fjölskyldunni á Lúsíutónleika í dómkirkjunni, Álfrún söng með einum kórnum þar. Kirkjan var troðfull og við sátum til hliðar við kórinn og sáum því varla neitt. En söngurinn var fallegur.

Er nú í heimsókn í Geocentrum. Cedric er búinn að bjóða mér að koma á fyrirlestur sem hann ætlar að halda á fimmtudaginn og seinna um daginn er jólahlaðborð, sem Stína á að sjá um, og ég mun verða sérlegur aðstoðarmaður hennar.

Bis dann.

Lifði af

Ég lifði fyrirlesturinn af. Enda var ekki fjölmennt, ekki einu sinni öll deildin. En hvað með það, hef nú oft verið stressaðri í meira að segja minni hóp. Var að klára að undirbúa mig fram á síðustu stundu en stressið hvarf á annarrri glæru. Var líka að vinna hér til að verða hálf-fimm í nótt. Tæknin var e-ð að stríða mér. Gat hvorki notað glærugerðarforritið á minni persólulegu tölvu (Power Point krassaði í hvert skipti sem ég opnaði skjal og ætlaði að eiga við það; Open Office á Linux fór í óskaplegan hægagang þegar ég bætti inn mynd nr.2) svo ég endaði inni á næstu skrifstofu í gærkvöld. Held reyndar að mér hafi næstum tekist að svæfa e-a en það skiptir nú minna máli. Er nú í svo góðu skapi að ég er að hugsa um að fara að panta mér tíma í klippingu. Hvernig væri það?
Held meira að segja að ég sé alveg til í að fara að skreyta fyrir jólin núna. Og baka smákökur. Ummm. Og pakka niður í tösku. Fer út eftir aðeins fjóran og hálfan sólarhring. Já, já, nóg að gera.


Á föstudagskvöld komst ég ekki lengra úr vinnunni en niður í kjallara. Þar hékk ég þar til ég var orðin banhungruð og ákvað að fara heim. Hópurinn leysitist upp og við hungruðustu enduðum hálf-tólf í hamborgaraveislu á Vitabarnum. Ég er nú ekki mikið fyrir borgara, finnst helst varið í þá þegar ég er mjög svöng. Samt endaði ég aftur í hamborgara á HardRock í gærkvöldi með tveimur samstarfskonum sem voru líka að þvælast hér í vinnunni á sunnudagskvöldi. Held ég sé þar með búin með hamborgarakvótann fyrir árið sem er að líða.

Hallarbylting

Hér er í gangi hallarbylting. Verið að stokka upp allt skipulag. Áður en ég hætti á Orkustofnun var stokkað upp þar líka. Ég virðist elta uppi skipulagsbreitingar. En ég er ánægð á meðan ég fæ að vinna mína vinnu (á launum) áfram með mínu stórskemmtilega samstarfsfólki. Og laumast niðrí kjallara fimm á föstudögum til að heyra helstu slúðursögurnar sem eru í gangi.

Skammdegið er ansi svart núna í rigningunni. Ég er farin að hlakka til að fara til Uppsala í snjóinn og kuldann, a.m.k. til að hitta stuðfjölskyldu Stínu og Pálma og alla hina skólafélagana. Annars er ég ekkert farin að huga að jólaundirbúningi. Allt slíkt er nú eiginlega bannað þar til ég er búin að undirbúa fyrirlesturinn sem ég á að vera með á mánudag. Ég er kolómögulegur fyrirlesari (eins og Stína og Cedric ættu að vita eftir síðasta fyrirlestur í vor, þegar ég gat ekki staðið upp fyrir stressi og mundi ekki orð). Vona að sem fæstir mæti og að ég eigi ekki eftir að gera mig að algjöru fífli.

Íbúð til leigu

Ég auglýsi hér íbúð til leigu á fínasta stað á höfuðborgarsvæðinu. Þ.e. íbúðina sem ég er í nú. Íbúðin er Kópavogsmegin í Fossvogsdalnum, rétt við skógræktina. Örstutt á alla hjólastíga ;-). Ef þið fréttið af e-m sem er að leita, endilega látið hann/hana/þau hafa samband við mig (sigurlaugh@hotmail.com).

Myndir

Slembibullbræður fundu myndir á netinu hér.

Af splatter í eldhúsinu, rokki og netprófi

Framhald af baunabuffsögu síðustu viku (spennandi spennandi!!!): þegar gestirnir komu í mat, Berglind og Evvi, var enn allt á fullu í eldhúsinu. Átti m.a. eftir að þykkja sósuna. Þar sem engin undanrenna var til í ísskápnum, og mér datt ekki hug að nota bara vatn, ákvað ég að taka smá lögg af óþynntri sósunni í hristiglasið með hveitinu. Hún var heit. Ég var ekki varla búin að taka eina sveiflu þegar mjög óvænt heyrðist PLÚFFFFF og það varð þvílík sprenging með tilheyrandi slettugangi yfir allt og alveg fram í stofu. Þetta atriði stóðst fyllilega samanburðinn við svæsnustu splattersenurnar í Kill-Bill, sem ég sá í síðasta mánuði, nema hér slettist karrígul kókossósa. (Aldrei hefði ég getað ímyndað mér að gufuþrýstingurinn yrði svona mikill svona fljótt. )

Á föstudag var ég tekin inn í MOBS (Bjórvinafélag Veðurstofunnar). Ég hlaut þann heiður að vera fimmtugasti félaginn með tilheyrandi glaðningi. Síðan fékk ég að vera samferða Hjörleifi og tveimur vinum hans (allt Hafnfirðingar, nema hvað) á tónleikana, enda hafði ég gert árangurslausar tilraunir til að fá vinkonur mínar með mér. Mér fannst nú Brain Police skemmtilegri en Sub Dub M. og hefði keypt hjá þeim áritaðan disk, hefði ég átt e-n aur. Ég var meira að segja svo sparsöm að ég ákvað að ganga heim enda var veðrið fallegt og stjörnubjart.

Nú er enn einu sinni kominn mánudagur. Rakst á þetta netpróf hjá Siggu Sif. (Heyriði, eruð þið ekki til í að láta þetta berast til réttra aðila?)

-Perfect- You're the perfect girlfriend. Which
means you're rare or that you cheated :P You're
the kind of chick that can hang out with your
boyfriend's friends and be silly. You don't
care about presents or about going to fancy
placed. Hell, just hang out. You're just happy
being around your boyfriend.


What Kind of Girlfriend Are You?
brought to you by Quizilla

Rokk

Ég ætla að skella mér á rokktónleika á föstudag á Nasa. Sub Dub Micromachine og Brain Police. Er búin að vera að velta þessu fyrir mér fram og til baka í viku og loksins búin að taka ákvörðun. Og fer bara ein. Langar einhvern/einhverja með mér? Endilega látið mig vita. Það væri skemmtilegra.
Stóð í eldhúsinu fram yfir miðnætti í gær. Mér tekst e-n veginn alltaf að vera óskaplega lengi að öllu (þess vegna elda ég sjaldan). Ég ákvað sum sé að það væri sniðugt að undirbúa kvölmat dagsins í dag í gær og lagaði fullt af hnetubuffum í ísskápinn. Ég pillaði meira að segja skurnina af pistasíuhnetum til að saxa niður í rasp (þ.e. auðvitað hneturnar, skurnin fór í ruslið). Svo þurfti auðvitað að vaska upp allt draslið og að lokum tók ég matreiðslubækurnar inn i rúm til að finna hentuga sósu. Þar sem klukkan var orðin ansi margt (rúmlega eitt) taldi ég það næsta víst að það yrði fjandi erfitt að vakna klukkan sjö svo ég ákvað að setja vekjaraklukkuna inn í stofu. Þá þyrfti ég að fara lengra til að slökkva á henni. Þetta system brást aðeins í morgun. Ég stóð upp, stillti hana á átta og fór svo aftur í rúmið til að rifja aðeins betur upp furðulegan draum sem mig var að dreyma.
Ákvað að ganga í vinnuna, það var svolítið vesen að hjóla í gær. Og svo fannst mér tilvalið að prófa nýju, fínu, hvítu og feykilega hlýju loðhúfuna mína sem ég keypti mér í síðasta mánuði. Hún fer sko með til Svíþjóðar eftir rúmar tvær vikur!!!

Sjónvarpsgláp

Ég er komin í prýðilegt hjólastuð. Hef ekki snert við bílnum síðan síðasta sunnudag þegar ég átti erindi í Hafnarfjörðinn. Hef hjólað í vinnu, dans vestur í bæ og hingað og þangað og reyni ekki að finna afsökun til að nota bílinn. Þangað til í dag. Ráðstefna JFÍ eftir hádegi og svo kvöldmatur á A Hanssen í Hafnarfirði og pöbbarölt um Fjörðinn með Bjórfélaginu.

Í gærkvöldi, eftir dansinn, hékk ég hins vegar heima yfir sjónvarpinu frá tíu fram yfir miðnætti. Maraþon-gláp á Bachelor og Beðmál í borginni. Ég varð nú ekkert smá hissa þegar hann lét Kirsten róa, var alveg viss um það fyrir nokkrum þáttum síðan að Kirsten yrði fyrir valinu, fannst hann hafa verið hrifinn af henni lengi. Eeeeen, mín stelpa vann, jibbí fyrir henni! Ég tók upp Beðmálin og horfði á þau eftir baslara-þáttinn. Má ekki missa af neinu sko. Og meðan ég hreinsaði tennurnar fyrir svefninn gat ég horft á byrjunina á gamla þættinum. Almáttugur. Þetta er nú svolitið "sick". Hmmm, en skiptir það sosum nokkru þótt maður láti svona einu sinni í viku? Nei, a.m.k. ekki meðan ég ræð ein yfir sjónvarpinu...

Viðbjóður!!!

Ég ákvað í morgun að kíkja á pósthólfið mitt í HÍ. Man aðeins eftir því endrum og sinnum og missi þ.a.l. af ýmsu skemmtilegu eins og samkomum Stiguls og hinum og þessum fyrirlestrum. Og .forward skráin skilaði ekki tilætluðum árangri. Kannski bara eins gott því nú biðu mín tæplega 70 skeyti og flest með e-u viðbjóðslegu rusli, nokkur dæmi:


More Sperm pills. Come more and harder!
Fill her mouth with curn with these pills!
Don't be shy ever again! E.NLARGE YOUR P.ENIS
Finally a Safe natural way to E.nlarge your man.hood!
Re: sorry we can't go out again, size does matter to me!
Sa.tisfy your lover today!!
Free Pics Of Teen Lesbians


Hvernig kemst allt þetta djöf...... rusl inn fyrir á póstþjónunum. Er engin síun í gangi? Þarf ég kanski að redda því sjálf? Annað. Netfangið er nýtt. Hef hvergi gefið það upp. Liggja asnarnir yfir símaskrám á netinu? Hefði þá betur haft vit á því að láta fjarlægja netfang mitt þaðan.


Annars er ekki mikið að frétta af mér. Bíð eftir snjónum í fjöllum svo ég geti farið að þramma um á gönguskíðunum. Hvenær ætli það verði?

Pönk

Dró fram gaddabeltið frá Stokkhólmi í morgun, er að íhuga að lita hárið á mér bleikt og fá mér annað tattú og hring í nefið. Ætli ég sé undir e-m áhrif frá skrifstofufélaga mínum?
(Tek fram að aðeins tvennt af ofantöldu er satt).

Brjálæði?

Í gærkvöldi druslaðist ég í SAUMA-klúbb til frænku minnar í Hafnarfirði. Ég ætlaði ekki að nenna af stað og auk þess gekk mér ill að finna pokann með rétta efninu. (Það borgar sig greinilega ekki að taka til, hjá mér er alltaf reiða í óreiðunni). Ég er að reyna að klára bútateppi sem ég byrjaði á fyrir næstum tveimur árum, eftir fyrsta námskeiðið mitt. Ég tek það fram að ég er búin að klára hitt og þetta í millitíðinni. Flöskuhálsinn á saumaskapnum var annars sá að ég þurfti að handsauma niður fjöldann allan af smáberjum og laufblöðum og á tímabili fékk ég mig fullsadda og lagði stykkinu. Þessu er nú loks lokið og nú þarf ég bara að sauma saman framhlið, filt og bakstykki og ganga frá. En í gær fór ég að telja smábútana sem ég er búin að sauma saman eða ofan á:

Miðstykki: 660

innri og ytir kantur: 8 stykki

smástykki saumuð ofan á ytri kant (minnst um 1 cm2): 170

Filt og bakstykki: 5 (ég saumaði saman filtafganga sem ég átti til að spara...)

Kantur til að loka: 5

Sumsé, í allt tæplega 850 bútar. Jaðrar þetta ekki við brjálæði?

Og í aðra sálma: Langar e-n með mér á útgáfutónleika Dr. Gunna á Grandrokk í kvöld? 200.000 naglbítar spila líka. (Gerða, geturðu ekki skutlast ti RVK í kvöld?)

Sprungin blaðra

Mér líður eins og blöðru sem stungið hefur verið á (já eða þannig), allt loft úr mér. Stress síðustu viku yfirstaðið og barasta spennufall. Vann hér til að verða 11 í gærkvöld við að klára vaktstörf. Mér verður ekkert úr verki í dag. Nema helst að geyspa. ;-0

Af eingverri einskærri heppni þagnaði viðvörunarkerfið seinni part laugardags og ég fékk ekki eina einustu upphringingu eða símapíp aaaaalla nóttina. Ja, bara ekki fyrr en 11 á sunnudagsmorgni. Ég hefði nú getað notað þessa nótt til að vinna upp svefn. En það fór nú ekki alveg svo því ég var búin að skipuleggja innflutningspartý. Sem endaði með stuði og dansi á 22 til hálf-sex! Þið getið ímyndað ykkur hvað sumir voru hressir næsta dag.

Ég er búin að fá nýjan skrifstofufélaga til nokkurra daga. Hann Martin frá Hamborg. Hann er með tvígatað nef og hring í vör, grænan hanakamb og alles. Annars bara rólegasti stúdent að sækja gögn fyrir Master-verkefnið sitt. Lífgar upp á mannlífsflóruna hér.

Þriggja stjörnu vika

Þriggja stjörnu vika. Nýjasta stjarnan á kortinu kom rétt fyrir níu í morgun. Skjálfti upp á þrjá um 26km NNA af Sigló. Hrinan enn í gangi. Og við Öskju lika. Hlustaði einhver ykkar á hádegisfréttirnar á RUV? Held að flesta fréttastofur séu búnar að hringja. Sjónvarpsmenn á Stöð 2 komu í hádeginu og vildu viðtal. Sigurlaug litla að deyja úr stressi. Held það versta sé gengið yfir núna. Þótt það hætti ekki að skjálfa.

Allt á fullu

úff, púff. Sit hér sveitt við pikkið. Tvær skjálftahrinur í gangi, önnur 26 km NNA af Siglufirði og hin, sem hófst á mánudag, er milli Öskju og Herðubreiðartagla. Skjálftarnir þar virðast raða sér á snyrtilega sprungu og virðast fara stækkandi. Væri bara ekkert hissa ef við færum að sjá gosóróa... Hmmm. Spennandi að sjá hvað gerist. Vona það verði bara ekki um helgina. Þá ætlaði ég að dansa tryllt með saumó. Það væri ekki gaman ef síminn færi að pípa á mig þá, eins og síðustu þrjár nætur.

Síðasta föstudag var dansað til fjögur á októberfest Ví.. brjálað stuð... úps nú á að fara að færa til diska, verða að hætta...

Wilde

"Experience is the name everyone gives to their mistakes."

Eða hvað?


Fyrsta vetrarferðin í langan tíma var farin á hjólinu í morgun, -í vinnuna. Það brakaði í frosnum snjónum. Ég setti á mig lambhúshettuna og setti nýjar rafhlöður í afturljósið. Mér tókst líka að vakna á undan klukkunni í morgun, fyrir sjö, sem er þvílíkt aftrek því mér hefur ekki tekist að vakna svo snemma lengi. Er búin að vera að reyna síðustu vikur, stilli klukkuna, set hana í hinn enda herbergisins, stend upp og slekk á henni þegar hún hringir, leggst svo aftur undir sæng og sannfæri mig um að ég sé alltof þreytt til að fara á fætur. Og sef í klukkutíma. En ekki meir, ónei. Nú er það bara harkan sex. Eða sjö, reyndar.


Var einhver að tala um gúrkutíð?

Kötturinn sem hvarf

Ætli e-r ykkar hafi verið að velta fyrir sér hvað varð um kisa? Ég heyrði því miður ekkert í honum næstu nótt, né nokkuð síðan. Ég vildi gjarna vita um afdrif hans, en vona bara að hann hafi komist e-s staðar inn og sé í góðu yfirlæti.

Á föstudaginn hafði ég ákveðið að prófa eldavélina og elda mér súpu úr nýju matreiðslubókinni minni (Grænn kostur Hagkaupa). Ég fór því í innkaupaferð eftir vinnu. Ætlaði að vera sniðug og sparsöm og kaupa sem mest í Bónusi. Ég rogaðist með tvær hjólatöskur og handkörfu um búðina. Út kom ég með troðfullan poka sem ég gat troðið að mestu í tómu töskuna. Hin var hálffull af leikfimisdóti. Þá átti ég eftir að finna sérvörur eins og engiferrót, karrímauk, sellerírót og e-ð fleira sem ekki fékkst í Bónusi. Svo ég rogaðist með töskurnar yfir í hinn enda Kringlunnar í Hagkaup. Ojjj. Þetta er ein leiðinlegasta verslunarferð sem ég hef farið. Ég get svarið það. Að kaupa í matinn ein og billaus á föstudegi er sko miklu leiðinlegra en að vaska upp!!! Fjórði og síðasti skammtur súpunnar bíður inni í ískáp og verður hitaður upp í kvöld.

Og hvað gerði ég svo fleira skemmtilegt um helgina? Hmmm. Bakaði. Og svindlaði mér með í jómfrúrferð bátsins Karlsfars. Róið var yfir Fossvoginn og tilbaka og svo aftur yfir og báturinn tekinn á land þar. Ég fékk aðeins að taka í árarnar. Mér finnst gaman að komast út á sjó, sérstaklega í árabát en því miður er ég einstaklega ólagin við árarnar. Myndir af viðburðum helgarinnar og síðasta mánaðar eru væntanlegar .... daddaraddada.... kannski bara á morgun?

Kattavæl og meira svefnleysi

Þetta er ekki góð byrjun. Ég á greinilega ekki að geta unað mér í Birkigrundinni. Í gærkvöldi, þegar ég kom heim og ætlaði að fara að tengja sjónvarpið kom í ljós að loftnetssnúran passaði ekki, tengið í veggnum er eins og á sjónvarpinu og allar loftnetssnúrur sem seldar eru hafa mismunandi tengi í hvorum enda. Ég missti því af Alías. Ég setti þá Eurythmics í tækið og hélt áfram að raða bókum og skipta í flokka. Sorteraði líka geisladiskana eftir stafrófsröð og stússaði e-ð í hinu og þessu. Held að klukkan hafi verið orðin eitt þegar ég ætlaði loksins í rúmið. Haldiði ekki að kisi hafi þá farið að væla. Sami kisi og hélt vöku fyrir mér þarsíðustu nótt. Það var orðið ansi hvasst í gærkvöldi og ég vorkenndi greyinu svo ég æddi út á stétt á náttkjólnum og berfætt og kallaði kis kis og mjá mjá já já en ekki vildi kisi koma og tala við mig. Ég sá hann heldur ekki svo ég gafst upp. Mér tókst að sofna. Um fjögur-leytið vaknaði ég við stöðugt væl. ,,Hvað eru kattaeigendur að hugsa að hleypa dýrunum sínum ekki inn tvær nætur í röð í vonskuveðri?'' hugsaði ég. Ég gat ómögulega sofnað og dreif mig í buxur og úlpu og út. Kisi vældi og vældi. Loksins sá ég hann skjótast undan bílnum, sem stóð i innkeyrslunni við húsið á móti. Hann var bara pinkuponsu lítill og svartur. Ekki margra mánaða gamall. Hann skaust inn í þéttan runna og ég gat ómögulega náð honum. Ég gafst því upp. Ég gat ómögulega sofnað, hugsandi um lítinn, vanræktan kettling í garðinum á móti. Vindurinn gnauðaði. Úhhh, honum hlýtur að vera kalt. E-ð hlýt ég þó að hafa dormað, því enn vaknaði ég upp við væl hálf-sjö. Og aftur fór ég út til að reyna að handsama kisa. Í þetta skiptið kom hljóðið undan bílnum. Ég skreið og kíkti undir bilinn. Ekkert. Eftir mikið mjá mjá og kis kis kis fékk ég loksins svar aftur. Þá sat litli uppi á dekkinu, undir breittinu. Ég rétt sá glitta í svarta loppu í myrkrinu. Reyndi að tæla hann út með strái. Var að hugsa um að fara að grípa til hans þegar honum tókst að stökkva burt og bak við húsið. Þar missti ég af honum. Vildi ekki fæla hann í burtu og ekki heldur að vera að ráfa um bakgarð nágranna minna svona snemma morguns.

Og þannig fór nú það. Ég náði að blunda svolítið seinna um morguninn. Dreif mig svo loksins af stað. Kom við í raftækjabúð og fékk millistykki á loftnetssnúruna. Nú ætti ég að geta tengt í kvöld. Er annars e-r sem býður sig fram í að gista og hjálpa mér að handsama kattargrey í nótt? Hafið þið e-r góð ráð?

Flutningar og stúss

Jæja, þá er ég mætt aftur eftir enn eitt helgarfríið. Get nú varla talað um frí því ég er búin að vera að bera kassa og húsgögn, pakka, bera meira, pakka upp, færa til o.s.frv. Og fæstir hlutir hafa fundið sinn samastað eftir þetta umrót. Og varla ég heldur. Svaf illa í nótt á nýja staðnum og átti enga súrmjólk í morgun. Þegar ég ætlaði í vinnuna mundi ég eftir því að bíllinn var enn fullur að geymsludrasli (aðallega gömlum skólapappírum og garnafgöngum) sem mig langaði ekkert að fá inn. Ég fór því í það að bera áður en ég gat lagt af stað.

Í hádeginu skutlaðist ég til að kaupa loftnetssnúru. Eftir heimsókn til pabba í kvöld, ætla ég að tengja sjónvarpið og mynbandstækið, til að geta horft á Launráð í kvöld. Draslið má eiga sig til morguns.
Vinir eru velkomnir í heimsókn til mín. -Ef þeir þola smá óreiðu. Annars var Berglind fyrsti gesturinn. Hún var svo elskuleg að hjálpa mér að flytja húsgögn og kassa á laugardaginn. Og velja réttu hlutina í IKEA :-). Fyrir hjálpina þáði hún þurrt brauð og vatn. (Ég tek það reyndar fram að ég bauð henni flatbrauð með kæfu og sméri og kókómjólk, það var pent afþakkað.) Ég reyni að bjóða upp á e-ð betra næst., BH, og þið hin.

Lítil frænka

Í gærkvöldi fór ég á stórskemmtilega danssýningu í Borgarleikhúsinu. Íslenski dansflokkurinn var með lokaæfingu og fengu tveir fulltrúar frá hinum ýmsu fyrirtækjum að fara. Ég var sú eina sem gaf sig fram hér á Ví svo ég fékk báða. Sýndir voru þrír dansar:

1) Symbiosis- "Fáránleiki hversdagslegra ástarsambanda"
2) Party
3) Match
Dansarnir voru fjörugir og skemmtilegir. Inn í Party var blandað smá leik og Match var fullur af húmor. Í raun var hann skemmtilegasti fótboltaleikur sem ég hef séð. Þar er líka gert létt grín að kunnuglegum hreifingum og töktum sem sjást í fótboltaleikjum. Við hlógum öll mikið. Ef e-r ykkar hefur minnsta áhuga á dansi, mæli ég eindregið með þessari sýningu. Og ég ætla mér að fara oftar á sýningar flokksins.


Eftir sýninguna þreif ég saumavélina út í bíl heima og brunaði í saumaklúbb í Hafnarfjörðinn. Þar náði ég að strauja slatta af bútum sem saumaðir voru saman þegar við hittumst síðast, frænkurnar. Anna Beta var orðin kasólétt og gengin viku fram yfir. Hrefna Sif var að sauma eldhúsgardínur og Harpa að sauma út. Við fórum ekki heim fyrr en rúmlega hálf-tólf.
Rétt áðan hringdi Harpa í mig og sagði mér að Anna Beta hefði ekki fengið svefnfrið nema til fjögur í nótt, þá fór allt af stað. Hún var komin inn á fæðingadeild hálftíma síðar og allt yfirstaðið sjö í morgun. Ég er búin að eignast nýja, litla frænku, stóra og pattaralega. Ég óska Önnu Betu og Gunnari innilega til hamingju! :-)

kvart kvart og fuglalíf

Ég for að sækja bílinn í gær. tikka-tikk hljóðið reyndist vera ventlabank. Mói hefur því fengið ný ventillok (eða ventla ?), ný kerti og vatn á rafgeyminn. Já, vatnsstaðan á geyminum var alls ekki góð. Vatnið virðist hafa gufað upp af honum. Vona bara að hann sé ekki ónýtur. Hitt var nógu dýrt. 20 þúsund kall fyrir bílaviðgerð. Úff, það er dýrt að reka bíl. Fegin að hafa sloppið við það hingað til... Nú á Mói bara eftir að fá smurningu fyrir veturinn og vetrardekk þegar það fer að snjóa e-ð að ráði.

Í sumar var mikið fuglalíf hér á túninu við Veðurstofuna. Þar höfðust við hópar af lóum. Ég sá reyndar nokkrar á vappi hér fyrir utan gluggann í fyrradag. Það voru ungir fuglar, hálfstálpaðir. Ég var að velta því fyrir mér hvort þeir hafi misst að hópnum sem fór suður. Ætli allar lóur séu ekki þegar farnar? Ætli þessi litlu grey lifi veturinn af hérna? (Hef að þessu þungar áhyggjur...) Sé núna grágæsir á beit hér fyrir utan gluggann. Ætli þeim finnist túnið hér ekki ákjósanlegur vetrarstaður. A.m.k. meðan þær geta e-ð kroppað í grasið.

Í strætó

Í morgun tók ég strætó. Ég þurfti nefnilega að fara með Móa litla (bílinn) á verkstæði. Það er búið að vera e-ð tikk tikk auka-ganghljóð undanfarið og svo kom ég aftur að bílnum rafmagnslausum hér við Veðurstofuna á sunnudaginn, þegar við komum heim úr helgarferðinni. Ég er reyndar farin að halda að bíllinn kunni ekki við að láta skilja sig eftir annars staðar en heima því ég kom líka að honum rafmagnslausum hjá farfuglaheimilinu þegar ég kom að austan (úr sumarskólanum) fyrir mánuði. Þetta hefur hins vegar aldrei gerst þegar hann stendur úti í Furugrundinni.

Jæja, ég tók sum sé strætó úr Hafnarfirðinum í vinnunna. Á biðstöðinni hitti ég gamla skólasystur úr Öldutúni svo ferðin varð miklu skemmtilegri fyrir vikið. Við höfðum báðar verið að ræða það við vinkonur okkar, að tími væri komin á "reunion" og ætlum að reyna að gera e-ð í því bráðlega. Hún fékk netfangið mitt. Vona bara að e-ð verði úr þessu...

Þórsmerkurferðin var stórskemmtileg. Við komum inn í Goðaland um hálf-ellefu. Þá var komið frost og orðið heldur kalt, en samt lygnt. Ég ákvað því að tjalda, eins og þrír aðrir. Svaf í úlpunni minni en vaknaði samt öðru hverju út af kulda. Ég er nokkuð víst um að dýnan mín sé aðal-sökudólgurinn. Hún er alltof þunn og varla fyrir meira en sumarferðir. Snemma morguns vaknaði ég við dynki. Það var eins og einhver væri að hamast í stögunum á tjaldinu mínu eða e-ð að detta á það. Ég sofnaði þó aftur, enda dimmt. Seinna, um hálf-átta, vaknaði ég aftur við dynkina. Í þetta skiptið var orðið bjart og ég sá því hvað olli. Þetta voru laufblöð úr birkitrénu fyrir ofan mig. Hmmm. Ansi eru þau þung, hugsaði ég. Ákvað að kíkja út. Og viti menn. Alhvítt. Það hafði snjóað um nóttina. Og farið niður í -6 gráður þegar kaldast var. Laufið féll niður af greinunum á tjaldið með snjó. En dagurinn var fallegur og við fórum í göngu inn á Morinsheiði. Um kvöldið var grill, varðeldur, glens og gaman. Og það byrjaði að rigna, ansi mikið , svo ég nennti ekki með svefnpokann minn út í tjald og svaf inni þá nótt. Morguninn eftir fór hluti hópsins upp á Réttarfell og niður glæfralegt einstigi að Álfakirkju. Ég mæli með þessum hring. Útsýnið er stórkostlegt og stígurinn ævintýralegur, þó ekki fyrir mjög lofthrædda! Auðvitað var svo stoppað í Stakkholtsgjá.

Ég tók nokkrar myndir í ferðinni en hef auðvitað ekki enn drifið þær inn. Er hins vegar búin að gera myndirnar úr gönguferðinni vestur á Fjörðum aðgengilegar, ef e-r skyldi hafa áhuga að kíkja.

Þórsmörk

Ég kom mér frekar seint í vinnuna í morgun. Átti eftir að pakka niður fyrir Þórsmerkurferðina um helgina. Nú er allt klárt og ég meira að segja búin að setja nýjar rafhlöður í vasaljósið. Tek tjaldið með ef þarf. Hlakka mikið til að komast upp á fjöll í labb. Vera úti heila helgi.

Hef lítið afrekað í vikunni. Mér tókst þó að læsa bíllyklana einu sinni inni í bílnum. En það var ekkert alvarlegt því það var nú bara að kvöldlagi hér við Veðurstofuna svo ég gat gengið heim úr vinnunni og til baka morguninn eftir með aukalykilinn. Það er nú gott að búa í göngufjarlæð!
Er líka búin að finna íbúð. Hún er máluð í lítum svo ég býst við að þurfa að mála allt. Sé nú samt til hvort ég nenni því strax. Öll herbergin eru annars í mismunandi litum: mintugrænt, rautt, gult....

Slúður

Í fyrrakvöld hitti ég nokkrar æskuvinkonur mínar. Við reynum að hittast af 2-3 á ári til að halda sambandi og "updeita" slúðursögurnar. Ég missti af síðasta fundi, þar eð ég var úti. Núna hafði heldur betur mikið gerst. Ein var búin að gifta sig og önnur á von á öðru barninu. Sú þriðja var búin að kaupa íbúð með kærastanum sínum á Suðurgötunni í Hafnarfirðinum. Ég hafði engin sérstök afrek að segja frá.


Og þó. Ég afrekaði að fara í þriðja danstímann. Og er búin að ákveða að halda áfram. Jájá, vonandi fer mér e-ð fram þegar líður á námskeiðið. Þakka góðu vinkonum mínum hvatninguna og að peppa mig upp. Stundum þarf maður bara á því að halda. (Hmm og sumir oftar en aðrir).
Gerði mér dagamun áðan og fór í klippingu. Sat þar í 2 og hálfan tíma og er nú komin með nýjan lit og topp. Borgaði offjár fyrir en fór samt skælbrosandi út. Arkaði svo nið'rí Stork og keypti mér garn i vesti. Það verður því fjör hjá mér í kvöld: Braithwaits-fjölskyldan og prjónarnir... Víhí. ;-)

Sauðárkrókur

Eftir vinnu á föstudag sótti mamma mig og við brunuðum norður á Sauðárkrók. Það var mikið fjör í bílnum og við sungum og dönsuðum (ja svona eins mikið og hægt er sitjandi í bíl og við stýrið) með Fat Boy Slim, Depeche Mode, Coldplay og Ham alla leiðina. Já, það er sko munur að eiga svona hressa mömmu sem fílar þetta allt! Á laugardeginum fékk ég (eftir svolítið japl og jamm) mömmu og Þorstein með mér upp á Tindastól. Fjallið er eiginlega Esja þeirra Sauðkrækinga, 995m hátt og yfir 20 km á lengdina. Við fórum bara upp á fyrstu bunguna, ferðin tók okkur 5 tíma (rólega farið) og við hefðum líklega þurft 2-3 í viðbót til að komast upp á efsta tind, inni á ca. miðju fjallinu. Þegar við komum niður og heim fengum við gómsætt lambalæri sem Sara hafði eldað. Í gær var komið hálf-hryssingslegt veður og við fórum í bíltúr að Hólum í Hjaltadal og út á Hofsós. Þar kíktum við á gömlu húsin niðri við höfnina og Vesturfarasafnið. Skoðunarferðinni lauk svo í bakaríinu á Króknum þar sem við settumst niður með kaffi og dúndurkökusneiðar.

Seinni partinn var lagt af stað heim aftur. Og áfram var spilað og sungið á leiðinni: "Ég bý í sveit, á sauðfé á beit og sællegar kýr út'á túni..." Ég hlakka bara til að fara aftur norður í heimsókn í vetur með skíðin...



Fyrir þá sem e-n áhuga höfðu á að kíkja á veggspjaldið og geta ekki lesið PostScript skjal, þá er hér, loksins pdf-skjal.

fönkídjönk

Ókei, það má alltaf tala mig til. Gef dansinum kannski einn séns í viðbót. Má ekki líka bara setja þetta i Vísa, fresta peningaáhyggjum fram yfir næstu mánaðarmót... Ætli það verði svo ekki einhver séns á að fá aukavinnu út á þetta, dansa í myndböndum og á tónleikum. Vá, kannski Júróvísjón? (Ekki taka mig alvarlega).


Önnur vandamál. Hvort á ég að fara í innflutningspartý hjá Arnþrúði eða dvelja í sveitarsælunni í Skagafirði (Króknum) um helgina. Helst vildi ég af hvorugu missa...

Af dansæfingum, vettvangsferðum og öðru ómerkilegu

Þá er ég komin aftur heim frá Geysi. Kom á mánudaginn var. Ég er búin að vera ægilega tuskuleg síðan, enda var hangið á barnum á næstum hverju kvöldi og alltaf vaknað snemma til að hlusta á fyrirlestra eða til að fara í vettvangsferðir. Á leiðinni austur var auðvitað stoppað við Nesjavelli og á Þingvöllum. Einnig var stoppað við Kálfstinda (móbergshrygg) til að skoða mannvistahelli og fallegt bólstraberg. Við komum að Geysi um hádegi, fengum hádegismat, komum okkur fyrir og svo var hlustað á tvo fyrirlestra, kaffipása og svo kíkt á hverasvæðið. Næsta dag voru fyrirlestrar fyrir hádegi og eftir hádegi kynnti fyrsti hópurinn af fjórum veggspjöldin sín. Þar á meðal var Kristín Jóns. Á miðvikudegi var farið í langa vettvangsferð um eystra gosbeltið. Við ókum inn í Þjórsárdal, áfram norður fyrir Búrfell og fórum þar yfir Þjórsá. Síðan var ekið inn að Heklu og svo Dómadalsleið inn í Torfajökulsöskjuna. Stoppuðum hér og þar á leiðinni og gengum lítinn hring í Landmannalaugum (inn í Grænagil, að Brennisteinsöldu og meðfram Laugahrauni að skálanum) því sólin var svo vinsamleg að láta sjá sig þar. Annars rigndi eldi og brennisteini (eða svona næstum því!). Ég kom í Eldgjá og upp að Ófærufossi í fyrsta skipti. Því næst var ekið suður í Vík og þar borðuðum við fínasta kvöldmat og skoðuðum sögusafn. þetta var langur dagur, við komum ekki heim fyrr en hálf-tólf. Næsta dag kynnti ég pósterinn minn. A4-stærð á PostScript formi má nálgast hér. Nú nú, á föstudegi skoðuðum við sprungur á Suðurlandi undir leiðsögn Páls Einarssonar. Mér fannst sérlega gaman að sjá sprunguna við Seltún (nærri Heklu) en hún myndaðist í stóra skjálftanum 1912, mig minnir að hann hafi verið um 7 að stærð. Það er sjaldgæft að svona stórir skjálftar verði þetta austarlega. Skoðuðum líka fleiri sprungur vestar. Það gekk á með þungum skúrum. Mjög þungum! Næstu tvo daga tóku við fyrirlestrar og kynningar á veggspjöldum, át og meira át. Já, það væsti ekki um okkur á Hótel Geysi. Fengum heitar máltíðir tvisvar á dag, kaffi og meðlæti, gátum farið í sund og heita potta, og á barinn. Ég var farin að hafa svo miklar áhyggjur af öllu þessu áti og hreyfingarleysi að ég brá mér í fjallgöngu næstsíðasta daginn. Þá var sólin loksins farin að skína. Ég fór upp á Bjarnarfell og fékk þetta líka fína útsýni yfir allt, Langjökul, Jarlshettur, Bláfell, Kerlingarfjöll, Heklu, Eyjafjallajökul, Tindfjöll og Þríhyrning, svo það helsta sé nefnt. Daginn eftir (á mánudaginn var) yfirgáfum við svæðið og ókum út á Reykjanesskaga og skoðuðum þar misgengi og ganga undir leiðsögn Amy Clifton. Um kvöldið var svo kveðjukvöldverður á Iðnó.

Nú er öllu lúxuslífi lokið í bili og grámygla hversdagsleikans tekin við. Það er svolítið erfitt að koma sér aftur inn í gömlu rútínuna.

Á þriðjudagsköld var fyrsti danstíminn í fönk- eða götudansinum sem við stöllurnar úr saumaklúbbnum (Berglind, Kata, Arnþrúður og Ella) vorum búnar að skrá okkur á. Mér brá svolítið þegar ég sá fræga söngkonu smeigja sér í gegnum búningsklefann og inn í salinn sem námskeiðið mitt var í. Þegar ég kom þar inn var þar önnur sönkona stödd, ásamt hinum sem áttu að vera með mér á námskeiðinu. Ég gat engan veginn fylgt með í tímanum, kennarinn fór alltof hratt yfir fyrir minn smekk. Var alveg eins og idjót. Úff. Þetta var svona svipað og þegar við Stína fórum í "advanseraða", sænska pallatímann úti í Uppsölum. Þótt mig hafi dreymt um að vera með stelpunum á námskeiðinu síðasta vor og hlakkað mikið til, hef ég ákveðið að ég láti hér staðar numið á þessum dansferli mínum og láti ekki sjá mig þarna aftur.

Veggspjaldið

Hæ, hó. Er enn í vinnunni. Hvar annars staðar? Er að reyna að klára veggspjaldið. Er nú orðin reynslunni ríkari við notkun xfig. Verð kannski aðeins fljótari næst...
Annars tekur það ansi langan tíma hjá mér að berja saman e-n texta. Mér þykir æði erftitt að finna réttu orðin (eða bara e-r orð), orðaröð, hvað ég á að segja. Hvaða stafastærð... bla bla... Ætla núna að rembast við að fylla út i síðasta textaboxið.
Er orðin ægilega svöng. Fékk mér tebolla. Á bréfinu utan af pokanum stóð: Great things are made of little things. Bara nákvælega það sem ég er að gera núna. Sniðugt.

Meðan ég man. Fyrir þá sem lesa þetta, hafa unnið á Veðurstofunni og langar til að sjá myndir af fyrrverandi samstarfsmönnum sínum:
Myndir af bjórfundi...

Hitasvækja

Maður, maður, úff, það er heitt úti! Mælirinn úti í reit sýndi 16,6°C þegar ég mætti í vinnuna áðan, hjólandi. Ég hefði betur farið í stuttbuxur og tekið e-ð annað en svarta peysu og klút um hálsinn til að vera í/með í dag. Ég mætti líka í vinnuna í gærkvöld. Þegar ég gekk heim rúmlega níu var svo hlýtt að það var vel hægt að vera á ermalausum bol. Mér leið svolítið eins og ég væri í borg í útlöndum. Það kemur svo sterk lykt í loftið að gróðrinum (og ýmsu öðru reyndar) í svona ,,hita''.

Nú er mikið stress í gangi hjá mér. Það virðist ganga alveg ægilega hægt að klára allt sem á að fara á veggspjaldið. Í gærkvöldi varð mér svo loksins e-ð ágengt, fann villu í kortateikniskránni eftir margra daga leit. Þrátt fyrir stress í vikunni leyfði ég mér nú samt að taka þátt í smá gleðskap hér við Veðurstofuna á föstudagskvöld, enda veðrið þá með eindæmum gott. Bjórvinir VÍ héldu sinn árlega garð- og grillfund. Menn átu grillað góðgæti, sötruðu bjór, sumir fóru í snú snú og enn aðrir heilluðu liðið með breikdansi. Og nú skal í bara drífa í að setja inn myndir á morgun. Líka úr gönguferðinni. Ég var búin að fá nóg klukkan tíu (enda byrjaði gleðskapurinn snemma) og hjólaði þá heim. Þeir hörðustu þrömmuðu á Kringlukránna og dönsuðu víst fram á rauða nótt.

Jarðskjálftar við Krísuvík og Kleifarvatn

Í morgun vaknaði ég seint og um síðir (þ.e. um níu leytið) og þrammaði með Týru út í bakarí. Síðan var ryksugunni sigað á teppið. Þegar ég var nærri búin hringdi mamma og sagði mér að hún hefði vaknað upp í nótt við jarðskjálfta. Sjálf svaf ég á mitt græna. Hafði verið í grillpartýi hér við Veðurstofuna í góða veðrinu til klukkan 10 í gærkvöldi (garðfundur Bjórvinafélagsins). Er komin í vinnuna. Það er nóg að gera. Kortið er ansi fjörugt. Kíkið á sjálfvirku staðsetningarnar. Stærsti skjálftinn var rúmlega fimm, 7 mínútum síðar kom annar tæplega 4, kl 02:14 2,8, 02:22 annnar 2,8 o.s.frv. Meira síðar, ætti að fara að koma mér að verki.

Enginn svefnfriður

Hæ, hó, fréttir af skjálftavaktinni...

Lítill svefnfriður þessa helgina. Var ræst út klukkan rúmlega fimm í gærmorgun. Og svo aftur að verða eitt í nótt, einmitt þegar ég var nýkomin upp í rúm og búin að koma mér þægilega fyrir með Harry Potter. Bara gagnavesen. Kom í nótt og reddaði málunum. Nú virðist ég ekki eiga að komast heim eða út í sólina vegna enn meira vesens. Ohhh. Tölvudruslur. Af hverju getur þetta ekki bara gengið eins og smurt?

Kíkti á menninguna í gær. Dansaði og söng með Stuðmönnum á útitónleikum Rásar 2. Frábær flugeldasýning í lokin. Komst svo að lokum í gegnum þvöguna að hjólinu mínu og brunaði heim og varð á undan þeim sem voru á bíl. Bara svona rétt að hita upp fyrir fyrirtækja keppnina í þessari viku. Allir á hjóli í vinnuna!!!!! Víiíí.

Nammismjatt!

Já, nammismjatt (eins og Sigga Sif segir). Var að fá skúffuköku með rjóma í kaffinu.

Annars er það af mér að frétta að ég sit hér vaktina þessa vikuna. Ég get því ekki stungið af austur í góða veðrið um helgina. Er heldur ekkert ofsalega kát. Kannski er það sem amar að mér bara stress. Er svo sem nokkur að ætlast til þess að menn séu í góðu skapi alla daga?

Blíða og meiri blíða

Sæl, öllsömul.

Vissuð þið að það er stórgott veður úti? Ég vissi það ekki, fyrr en ég stalst út í fimm mínútur áðan... Nú væri ég alveg til í að vera í fríi, uppi á fjöllum, eða bara liggja í leti part úr degi niðrí í Nauthólsvík. (Mælirinn úti í reit sýnir 15,2°C og 4,2m/s úr VNV).

Er á vakt þessa vikuna. Ferðasagan og myndirnar að vestan verða að bíða betri tíma.

Af barferð, túristadegi og fjallaferð...

Ég þykist lítinn tíma hafa til að skrifa nú orðið. Ástæðan eiginlega sú að ég er heima og nær öllum vinum núna. En þó ekki öllum. Svo ég ætla að reyna að halda þessu gangandi.

Nú, síðasta föstudag (þ.e. fyrir viku) var ég á leið heim úr vinnunni. Veðrið var ljómandi gott og ég ætlaði mér að fara niður á strönd eftir að hafa skift um föt. Þá hringdi Cedric. Ég var búin að lofa að lóðsa hann e-ð um áður en hann færi heim. Hann vildi fara í Bláa lónið svo þangað fórum við um kvöldmatarleytið. Þar var allt pakkað af túristum, enda með betri dögum. Við fórum ekki upp úr fyrri en að verða níu. Ókum þá niður í Grindavík þar sem ég tók bensín. Svo sýndi ég honum gömlu kirkjuna (sem nú er leikskóli) og höfnina (vissi ekki hvað annað væri hægt að sýna honum þar). Svo var brunað í bæinn. Ráfuðum um í miðbænum í leit að ódýrum en góðum veitingastað. Enduðum loks á að fá okkur mexíkanskan mat í Lækjargötunni, ljómandi góðan og vel úti látinn. Klukkan var rétt að verða tólf þegar við loks kláruðum að borða. Cedric var e-ð þreyttur eftir ferðalagið svo ég skilaði honum heim. Mælti mér svo mót við Gerðu niðrí bæ og dreif mig í að skipta um föt. Við byrjuðum á Thorvaldsens-bar niðri við Austurvöll. Þar voru Maggi Kj. og félagar hans að koma úr skírnarveislu. Þeir áttu hvorki peru-cider né Kilkenny (uss) svo við fengum okkur eina flösku hvor að glæru sulli með lime-bragði. Staðurinn var troðinn svo við héldum af stað. Ráfuðum um lengi og enduðum loks á Dubliners-kránni þar sem ég bauð Gerðu upp á einn Kilkenny. Auðvitað gat ég ekki keyrt bílinn eftir þetta en ég hafði skilið hjólið mitt eftir í vinnunni. Fannst hins vegar of langt að ganga þangað á bleiku skónum svo ég tók leigubíl þangað. Bílstjórinn varð nú svolítið hissa þegar ég sagði "á Veðurstofuna" klukkan hálffjögur um nótt. Hjólaði svo heim og var ekki komin í rúmið fyrr en um fjögur. Og ég hafði lofað Cedric að koma klukkan 10 morguninn eftir að sækja hann. Vaknaði klukkan tíu, bíllinn niðrí bæ.... En þetta reddaðist allt saman, kom kanski aðeins of seint. Fórum rakleiðis niður á Laugarveg, og svo á Þingvelli, Gullfoss og Geysi í frábæru veðri og hita.

Daginn eftir fór Cedric heim en ég dreif mig ein í fjallgöngu. Gekk upp úr Botnsdal á Botnssúlur (Vestur-Súlu), áfram niður að Hvalvatni og áfram kringum það. Áfram niður með Botnsá og niður með gljúfri Glyms. Ég komst loks í bílinn hálf-tíu um kvöldið. Á leiðinni tókst mér að týna myndavélinni. Eða öllu heldur gleyma henni þar sem ég stoppaði til að bregða mér afsíðis á kindagötu við Hvalvatn. Já. ég uppgötvaði það líklega þremur korterum seinna, þegar ég var kominn góðan spotta niður með ánni sem rennur úr vatninu (Botnsá). Úff, ég fékk sjokk. Hugsaði með mér að ég yrði að drífa mig strax til baka og leita. Eg byrjaði á því að göslast yfir ána á skónum því ég taldi mig fljótari að fylgja vegslóðanum til baka heldur en að klöngrast meðfram fjallshlíðinni. Svo setti ég í fimmta gír og strunsaði og strunsaði. Ég hafði heppnina með mér, því mér tókst að fylgja réttu kindagötunni og líta til hliðar á hárréttu augnabliki. Svo strunsaði ég til baka. Þetta tafði mig um klukkutíma. Ég var vel lúin daginn eftir.

Í vikunni er ég búin að vera að teikna myndir og keyra staðsetningarforritið á ný svæði. Í fyrramálið legg ég svo af stað vestur á Firði til að ganga með OS-hópnum og mömmu. Við munum halda til í Önundarfirði og fara líklega í eins dags göngur, annars er ekki búið að ákveða það nákvæmlega. Kem líklega ekki heim fyrr en eftir Verslunarmannahelgi, en þá líklega með fullt af nýjum mynum og ferðasögu. Veriði blessuð á meðan.

Það er nú meiri blíðan

Oooooo það er alltof gott veður til að vera inni. Mér finnst það ætti að banna fólki að vinna inni í svona góðu veðri. Sérstaklega fólki á Veðurstofunni.
Af hverju á ég ekki inni þúsund frídaga?

Ég læt mig dreyma um ...að svamla úti í sjó í Nauthólsvíkinni, flatmaga í sólinni og sandinum ...ganga á Heklu, ábyggilega frábært útsýni þar í dag
... og fleira og fleira

Nú hefi ég loksins komið því í verk að setja inn myndir úr miðsumarferðinni. Ég fór með Jóhíris, Cedric, Daníel hollenska og öðrum Hollendingi, Bart, sem er vinur Jóhírisar. Bart kom til Svíþjóðar helgina áður til að taka þátt í maraþoni í Stokkhólmi. Hann var skiptinemi í Uppsölum fyrir nokkrum árum og er núna að skrifa mastersverkefi í sögu um sænsk dagblöð u.þ.b. síðustu fimmtíu árin.

Þegar þau komu að sækja mig var mér tilkynnt að búið væri að panta gistingu inni með morgunverði. Það var eins gott, því það rigndi eins og hellt væri úr fötu. Ekið var til Leksand og gist þar á heimili utan við bæinn. Daginn eftir voru tínd blóm úti í skógi í miðsumarkransinn sem var svo borinn á miðsumarhátíðinni. Þ.e. þegar blómastöngin var reist og svo dansað í kringum hana (í rigningunni). Um kvöldið buðu hjónin, sem við gistum hjá, okkur að borða með sér og vinafólki þeirra. Ég smakkaði heimsins besta síldarsalat og sitthvað fleira góðgæti. Um miðnætti var svo farið út í göngutúr og allir tíndu sjö tegundir af blómum til að sofa með undir koddanum. Sögur segja að menn eigi þá að dreyma verðandi maka sinn. Tveir vina minna vöknuðu þokkalega sáttir. Hinir sögðust hafa tækifæri næsta sumar.

Loksins stytti upp daginn eftir. Þá ókum við til Rättvíkur, fórum á bak á gráum Dala-hesti, gengum út á bryggju sem liggur langt út á Siljan-vatnið, kíktum í handverksbúð og ókum loks heim gegnum Falun. Svo var ákveðið að halda áfram. Grill og partý. Fámennt en góðmennt. Það var dansað fram á nótt. Alveg þangað til Cedric var alveg að sofna (aðeins of mikill bjór). Ég fylgdi honum heim og tók svo til við að þrífa. Fór sum sé aldrei að sofa þá nóttina. Jóhíris, Cedric og Bart fylgdu mér að lokum út á flugvöll. Ég fékk versta sætið í vélinni. Alveg aftast við ganginn. Eftir matinn var stöðug biðröð á klósettið, fólk var alltaf að rekast utan í mig og ýta á sætið mitt, sem ég var að reyna að halla aftur. Mér kom varla dúr á auga. Já. Var bara frekar úrill þann daginn.

Og þar með lýkur þeirri sögu...

Nóg að gera...

Jább. Það er nóg að gera og að mörgu að huga þessa dagana.
Þegar ég kom í vinnuna í gær var komin önnur græn stjarna á skjálftakortið. Og fjölmiðlar byrjuðu að hringja... Frétt í vef-mogganum...
Og núna rétt í þessu var Steinunn að tilkynna mér að maður hefði hringt og tilkynnt að skálavörður í Emstruskála fyndi aukna hverafýlu frá Mýrdalsjökli.
Það hafa einmitt verið að aukast viðvaranir það í dag, og síðustu daga. Ætli eitthvað fari að gerast???

Núna rétt áðan voru tveir nýir skjálftar... Og spennan eykst... Kemst ekki heim alveg strax. Þetta þarf nu ekki endilega að vera neitt.